Moyiise bashaleele mu Madyane munda mwa bipwa 40. Aye nkwibakila na kutanda bana. Dingi efuku pabaadi adiisha mikooko yaaye peepi na Mwengye wa Sinayi, baadi mumone kilengyeleshi. Ebuula dya mutshi diina ndjimi ya kaalo, anka tadibaadi adipi nya! Moyiise baadi akimbi shi akamone kibaadi akikitshika, bapushiishe eyi aditukila mwibuula adyamba shi: ‘Moyiise! Twefubwilanga peepi na dino ebuula. Fuula sandale yoobe mwanda pano poodi mwimane nyi pa mbalo ya kishila.’ Yehowa nyi baadi esamba naaye ku bukwashi bwa mwikeyilu.

Moyiise bapushiishe moo, aye nkwishikiila kilamba ku meeso. Eyi dibambile shi: ‘Naapu kumona kufwambuka kwa beena Isaleele.’ Nakyebe kwibapososha ku matalwa a beena Ejiipitu na kwibalusha mwiumbo dibuwa. Nnoobe akakunkusha mwilo wande bwa kwiutusha mu Ejiipitu.’ Ouku shi bibaadi bikaanyishe Moyiise?

Moyiise bamwipwishe shi: ‘Ne kukita kinyi ‘su baangipusha shi: Nnanyi, bakutumu? Nkinyi kya nebalungula? Efile Mukulu balungwile dimo Moyiise shi wakula bino: Yehowa, Efile aa Abrahame, Efile aa Isaake Efile aa Yaakobo, nyi bakutumu.’ Moyiise nkwaluula dingi shi: ‘A su mwiilo tangumpushishe?’ Yehowa nkupa Moyiise bishinkamisho shi Akamukwasha. Aye nkulungula Moyiise shi: Asumbule mukombo ubaadi nao mu nsenga. Wawa mukombo nkwaluluka bu nyoka! Nsaa i bakumine dingi Moyiise nyoka ku mukila kwaye, nyoka balulukile dingi bu mukombo. Yehowa nkwamba shi: ‘Su bolombasha nka kino kitundwilo, akibashinkamisha shi Nnami bakutumu.’

Moyiise nkwamba shi: ‘Ami ntangakulaa kalolo nya.’ Yehowa nkumulaa shi: ‘Nankulambukisha byodya kwisamba, na nankatumu mukwenu Aarone bwa shi akukwashe.’ Bibaadi ashinkamisha shi Yehowa e naaye, Moyiise baadi mwate mukashi aaye na bana baaye abo nkwenda ku Ejiipitu.