Mafuku apeela kunyima pabaadi beena Isaleele mu kabaaka, Kora, Datane na Abirame na bangi beena Isaleele 250 abaadi batombokyele Moyiise. Abamulungwile shi: ‘Nubaapu kwitukookyesha! Bwakinyi’nk’obe nyi e kwikala mukunkushi eetu na Aarone bu tshiite mwakwidi mukata e pa nundu? Yehowa e neetu booso, kushii penda obe na Aarone.’ Tabibaadi bisangashe Yehowa nya. Bebimwene bu abamutombokyela!

Moyiise nkulungula Kora na abamukwatshishenanga shi: ‘Nufikye maaloba ku tabernakele, nutwale tweso twa bishiikwanga tuwule na kabanda. Yehowa etuleesha muntu aadi musangule.’

Butookye, Kora na bantu 250 abayiile kwi Moyiise ku tabernakele. Abo nkushiika milambu kwanka nka bu batshiite mwakwidi. Yehowa nkulungula Moyiise na Aarone shi: ‘Elamuneeyi munkatshi mwa Kora na bantu baaye.’

Sunga byekala shi Kora bapwile kukatuka kwi Moyiise ku tabernakele, Datane, Abirame na bifuko byabo babapelele kukatuka. Yehowa nkulungula beena Isaleele bwabadya kwisesela kula na tushibo twa mapema twa Kora, Datane na Abirame. Beena Isaleele nkukatuka musango umune. Datane, Abirame na bifuko byabo  nkutuuka paasha pa tushibo twabo twa mapema. Nsenga ibeelele mitanta musango umune ayo nkwibamina! Kaalo kabayikile mwiyilu ku tabernakele, ako nkushiika Kora na bantu baaye 250.

Yehowa nkulungula Moyiise shi: ‘Ata mukombo wa mukata a kisamba kyoso ofunde eshina dya ooso a kwabadi ku mukombo waye. Kadi ku mukombo wa Leevi, ofunde eshina dya Aarone. Weyituule munda mwa tabernakele, mukombo wa muntu ankyebe kusangula, aumene bilongo.’

Pa bubatokyele Moyiise baatushiishe mikombo yooso eyileesha bakunkushi. Mukombo wa Aarone ubabangile kumena na kutuusha bilongo, na bikuba bya amandiye bimongye. Mu kyakya kipaso, Yehowa nkuleesha patooka shi naaye basangwile Aarone bwa kwikala bu tshiite mwakwidi mukata e panundu.