Peepi na myeshi ibidi kunyima kw’abo kukatuka mu Ejiipitu, beena Isaleele abaakafikile ku Mwengye wa Sinaayi, abo nkushaala mu tushibo twa mapema. Yehowa balungwile Moyiise bwadya kukaamina ku mwengye, aye nkumulungula shi: ‘Ne mupaashe beena Isaleele. Su bakookyela na kulama miiya yande, abekala mwilo wande’mi.’ Moyiise baalukiile alungula beena Isaleele byabamulungwile kwi Yehowa. Abaadi bamwalule naminyi? Abambile shi: ‘Kyooso kibamba Yehowa, atwikikitshi.’

Moyiise baadi mukamine dingi ku mwengye. Kwakwa, Yehowa bambile shi: ‘Mwifuku dya kasatu, nakesamba neenu. Elela mwilo mikalo shi, tanukaaminanga pa Mwengye wa Sinaayi.’ Moyiise bayikile, aye nkulungula beena Isaleele bwabadya kwilumbuula bwa kuteemesha Yehowa.

Kunyima kwa mafuku asatu, beena Isaleele abamwene mipenyo n’ekumbi dyetaata na mufito ku mwengye. Abo nkupusha dingi tupandapanda n’eyi dikata dya mpungi. Akupu Yehowa nkuyika mu kaalo kwakwa ku mwengye. Beena Isaleele abapushishe moo abo nkusuusa. Mwengye ooso nkubanga kutshinkatshinka, ao nkubwikilwa na miishi. Eyi dya mpungi dibanyishiishe kukaamina. Kunyima Efile Mukulu nkwakula shi: ‘Nnaami Yehowa. Tanwikalanga anulangwilanga bangi b’eefile.’

Moyiise nkwalukiila ku mwengye, Yehowa nkumupa miiya bwa mwilo pabitale byabadi balombeene kulangwila na byabadya kwikala. Moyiise nkufuda yaaya miiya na kwiyibadikila beena Isaleele. Abo nkumulaa shi: ‘Atukitshi kyooso akyamba Yehowa.’