Tshiite mwakwidi mukata e panundu Eliya baadi na bana balume babidi abaadi abafubu bu batshiite mwakwidi ku tabernakele. Abaadi abeebetamina bu Hofeni na Finease. Tababaadi abakokyela Yehowa nya, na dingi abaadi abakyengyesha bantu bikile. Nsaa ibaadi beena Isaleele abalambula Yehowa milambu, Hofeni na Finease abaadi abaata bisumbwe bibuwa. Eliya baadi mupushe bibakitanga bana baaye, kadi kushii kukita kintu nsu nkimune. Yehowa baadya kutadiila bwa shi byabya biyididiile na kukitshika su?

Sunga byekala shi Samwele baadi mukinga kwi Hofeni na Finease, tabaadi mwibambule nya. Samwele baadi asangasha Yehowa. Dingi efuku bufuku pabaadi kii mulaale, Samwele bapushiishe eyi adimwitamina. Aye nkubuuka, nkwenda lubilo kwi Eliya, aye nkumulungla shi: ‘Nnami uno!’ Anka Eliya bambile shi: ‘Ntshi mukwitamine nya. Aluka okalaale.’ Samwele nkwalukiila dingi ku lusala. Wawa mwanda umune nkukitshika dimo. Nsaa ibaadi Samwele mupushe dyadya eyi misuusa isatu, Eliya nkutundula shi Yehowa nyi baadi ayitanyina Samwele. Aye nkulungula Samwele shi, su bapusha dingi dyadya eyi adimwitanyina, akule shi: ‘Akula Yehowa. Mufubi oobe ateemesha.’

 Samwele nkwalukiila ku lusala. Akupu bapushiishe dingi shi: ‘Samwele! Samwele!’ Aye nkwaluula shi: ‘Akula, mufubi oobe ateemesha.’ Yehowa nkumulungula shi: ‘Uukisha Eliya shi namunyooko na kifuko kyaye. Auku shi bana baaye bakwete kukita bibubi mu tabernakele kadi kushii kwibatosha.’ Butookye namashika, Samwele nkufungula biibi bya tabernakele nka bu bibaadi akitshi mafuku ooso. Baadi apusha moo bwa kulungula tshiite mwakwidi mukata e panundu bimulungule Yehowa. Kadi Eliya nkumwitamina, aye nkumwipusha shi: ‘Mwana’nde, Yehowa bakulungula kinyi? Ndungule byooso bibaamba.’ Samwele nkumulungula myanda yooso.

Yehowa baadi na Samwele pabaadi eende na kukula. Mu nsenga yooso ishima ya Isaleele babaadi abauku shi Yehowa mmusangule Samwele bwa kwikala mutemuki na nsushi.