Ungi mwina Isaleele abeetamina bu Elkana baadi na bakashi babidi, Aana na Penina, kadi baadi mufule Aana bikile. Penina baadi asepe Aana mwanda tabaadi na mwana kadi Penina baadi na bana bebungi. Kipwa kyoso, Elkana baadi aata kifuko kyaye bwa nkalangwila ku Shilo mu tabernakele. P’abaadi kwakwa, Elkana baadi mumone Aana mmwinyongole bikata. Aye nkumulungula shi: ‘Leka kudila Aana. We nami. Ne mukufule.’

Kunyima Aana bayile mu kusambila bupenka bwaye. Tabaadi oobesha kuleka kudila pabaadi atekye Yehowa bwa kumukwasha. Aye nkulaa shi: ‘Yehowa, su napeta mwana mulume, nakulambula anka bwadya nkufubila mu muuwa waye ooso.’

Tshiite mwakwidi Mukata e panundu Eliya, baadi mumone Aana kwa kwete kuwunawuna, aye nkumona shi mmukolwe. Aana bamwalulwile shi: ‘Nya mwanana, ntshi mutome malofu nya. Ne na mwanda ukata, nyi wankwete kulungula Yehowa.’ Eliya batundwile shi baadi mumukokoshe kwishimba aye nkumulungula shi: ‘Efile Mukulu akupe kibomutekye.’ Aana bapushiishe muloo aye nkwalukiila kwaye. Kumpala kwa shi kipwa kilombane, batandjile mwana amuudika bu Samwele. We kupwandjikisha muloo ubaadi nao Aana su?

 Aana tabaadi mulube mutshipo ubaadi mulee Yehowa nya. Kunyima nka kwa’ye kutshiba Samwele kwibeele, baadi mumutwale ku tabernakele bwa kufuba. Aana nkulungula Eliya shi: ‘Nyi winyi mwana anaadi neelela luteko. Na mulambula Yehowa bwa mafuku aaye ooso.’ Elkana na Aana abaadi abende mu kutembela Samwele ku kipwa kyooso na kumutwadila bilamba bipya bya mufubo. Yehowa baadi mupe Aana baangi bana balume basatu na bana bakashi babidi.