Mu mafuku abatwelele nsala mu Isaleele, ungi mwina Isaleele abeetanyina bu Naomi bakatukile kwabo enda ku Moabe na mulume aaye na bana baabo balume babidi. Kunyima kwa mafuku mulume a Naomi bafwile. Bana baaye nkwibakila Luuta na Opa babaadi beena Moabe. Bana baaye babidi abafwile.

Pabapushiishe Naomi shi nsala ibaapu mu Isaleele, baatshile kitshibilo kya kwalukiila kwabo. Luuta na Opa abayiile naye, p’abaabadi mwishinda, Naomi bebalungwile shi: ‘Nwikeele bakashi bebuwa kwi bana bande, nwibekale bakasha-mwana bebuwa kwandji. Nakyebe shi nutwele dingi ku malunda. Byabya, alukiilayi kwenu ku Moabe.’ Abo nkumulungula shi: ‘Twi noobe kifulo! Tatukumiina nkuleka nya.’ Naomi nkutungunuka na kwibalungula bwabadya kwalukiila. Opa nkuwuka kwalukiila, kadi Luuta bashadile. Naomi nkumulungula shi: ‘Opa, baalukiila kwi bakwenu na kwi b’efile beenu. Alukiila naaye.’ Kadi Luuta bamulungwile shi: ‘Ntankulekye’mi. Mwilo oobe awikala mwilo wande, na Efile Mukulu oobe ekala Efile Mukulu ande.’ Omono shi Naomi bapushile naminyi pa kupusha bibaambile Luuta?

Luuta na Naomi abafikile mu Isaleele mu kipungo kya kuumbula. Dingi efuku Luuta nkwenda mu kupumbuula ntete mwifuba dya muntu abetaanyina bu Boaze baadi mwana a Rahabe. Bapushishe shi Luuta mwina Moabe bashadile na lulamato kwi Naomi. Aye nkulungula beena mufubo baaye bwabadya kuleka ndambo ya ntete mwifuba bwa Luuta.

 Kyakya kyoolwa, Naomi bayipwishe Luuta shi: ‘Mmwifuba dya nnanyi mubokafubila?’ Luuta nkumulungula shi: ‘Mmwifuba dya muntu abeetamina bu Boaze.’ Naomi nkumulungula shi: ‘Boaze ngumune a ku beena kifuko kya mulume ande. Tungunuka na kufuba mwifuba dyaye na bangi ba nsongwakashi. Kwadi nyi kokapetela bulami.’

Luuta nkutungunuka na kutumika mwifuba dya Boaze mpa’nka na pabapwile kipungo kya kuwumbula. Boaze bamwene shi Luuta mmukashi e buwa afubu kalolo. Mu aa mafuku, su mwana mulume baafu kushi kutanda mwana mulume, mukwabo mulume baadi na kya kwibakila yawa mukashi kilele. Nyi bwakinyi Boaze baadi mwibakile Luuta. Abatandile Obede, aye baafikile kunyima bu nshaye kulu na Nfumu Daavide. Ba loole ba Naomi abapushishe muloo ukata. Abo nkumulungula shi: ‘Kya kumpala, Yehowa mmukupe Luuta, baadi mukulamate bikata, binobino boopete mwikulu. Yehowa atumbishibwe.’