Mukandu wa kibundji kya Yeeriko ubaadi upalakane mu bibundji byoso bya mu Kanaana. Ba nfumu baabyo nkwata mpàngo ya kufika mu kulwisha beena Isaleele ngoshi. Anka beena Gabaone abaatshile ingi mpàngo. Abafikile kwi Yooshwa bafwale bilamba bisanukye abo nkwakula shi: ‘Tubafiki ku nsenga i kula. Twibapushe nkumo pabitale Yehowa na byoso byadi mwinukitshiine mu Ejiipitu na mu Moabe. Etutshipeeyi bwa kupela kwitulwisha bwa shi twikale bapika beenu.’

Yooshwa nkukumiina kutwela nabo mu kipwano bwa kupela kwibalwisha. Kunyima kwa mafuku asatu, baadi muukye shi tabaabadi bafikye kula nya. Abaakatukile mu nsenga ya Kanaana. Yooshwa nkwipusha beena Gabaone shi: ‘Bwakinyi nubetudimbi?’ Abo nkwaluula shi: ‘Atutshiinanga! Atuuku shi Yehowa Efile Mukulu eenu kwete kwinulwila. Tanwitwipanga namu.’ Yooshwa nkulama mulayilo waye, aye nkwibaleka na muwa.

Mu angi mafuku, ba nfumu bataano ba mu Kanaana na basalayi baabo abakimbile nkatuuka beena Gabaone ngoshi. Yooshwa na basalayi baaye abatambukile bufuku bushima bwa kwibapaasha.  Abalwile ngoshi bufuku bushima mpa na ku namashika. Beena Kanaana nkubanga kusuuka mu mpese yooso. Kooso kubaabadi abasuukila, Yehowa baadi ebaponeesha mabwe akata. Akupu Yooshwa nkuteka Yehowa bwa kwimika nguba mbalo imune. Bwakinyi baatekyele Yehowa bwa kukita byabya, aku namu kasha tabyabandjile kukitshika? Mwanda Yooshwa baadi mukulupile mwi Yehowa. Nguba tabaadi musaane efuku dishima na pabapwile beena Isaleele kutshokola ba nfumu ba beena Kanaana na basalayi baabo.