Kunyima kwaye kukunkusha mwilo wa beena Isaleele munda mwa bipwa bibungi, Moyiise bafikile ku nfudiilo kwa muwa waye. Yehowa nkumulungula shi: ‘Ta noobe akatwesha beena Isaleele mu Nsenga ya mulayilo nya. Anka, nakuleesha yanka.’ Moyiise batekyele Yehowa bwadya kusangula mukunkushi mupya bwa mwilo waye. Yehowa nkumulungula shi: ‘Enda kwi Yooshwa, omulungule shi nnaye.’

Moyiise nkulungula mwilo shi akyebe kufwa mu mafuku apeela, anka Yehowa bamulungwile bwa kusangula Yooshwa bwadya kwibatwesha mu Nsenga ya Mulayilo. Moyiise nkulungula Yooshwa shi: ‘Totshiinanga nya. Yehowa akukukwasha.’ Kunyima kwa byabya, Moyiise baadi mukaamine ku mwengye wa Nebo kubaadi Yehowa mumuleeshe nsenga ipya Ibaadi mulee Abrahame, Isaake na Yakobo. Moyiise baadi mufwe na bipwa 120.

Yehowa nkulungula Yooshwa shi: ‘Abuka mwela wa Yoordane, wende mu Kanaana. Nakakukwasha nka binakwashishe Moyiise. Anka ikala obadika Mwiya wande efuku dyooso. Totshinanga. Nyinga eshimba. Enda okakite binakulungula.’

Yooshwa nkutuma ba mpuupa babidi bwa nkatala kibundji kya Yeeriko. Atukesambila bibungi pabitale  bibaadi bikitshikye mu mwisambo aulondo. Pabaabadi baalukiile, abafikile na mukandu shi ibaadi nsaa ibuwa kwenda mu Kanaana. Butookye bwa dyadya efuku, Yooshwa balungwile mwilo bwaudya kushimuna tushibo twabo twa mapema. Aye nkutuma ba tshiite mwakwidi babaadi abatwala musheto wa kilombeeno kumpala bwa kusabuka Mwela wa Yoordano. Mwela ubaadi uwule na meema. Kadi pabafikile ngwa ya ba tshiite mwakwidi mu meema, mwela ubalekyele mpumo, meema nkwilonga! Ba tshiite mwakwidi nkutambuka kubanga ku kyese abo nkwimana munkatshi mwa mwela pabaadi apasabuka beena Isaleele booso dingi eshiya. Omono shi kino kilengyeleshi kibaadi kibatentekyeshe mwanda kinyi ubaadi Yehowa mwibakitshiine ku Kalunga Kamonga?

Nfudiilo a byoso kunyima kwa byabya bipwa byoso, beena Isaleele abafikile mu Nsenga ya Mulayilo. Abaadi na kya kwibaka mashibo na bibundji. Abaadi dingi na kya kudima mafuba a mitshi, a nfinyo na a mitshi ya pome. Dibaadi eumbo adyalaala mabeele na buuki.