Yehowa balungwile Samwele shi: ‘Enda mu nshibo ya Yeese. Umune a ku bana baaye ekala nfumu a kabidi mu Isaleele.’ Samwele bayiile mu nshibo ya Yeese. Nsaa ibamwene mwana mbedi a Yeese, belele kinangu shi: ‘Uno nsongwalume nyi’ye uno.’ Kadi Yehowa balungwile Samwele shi: Ta ngyawa nya. Yehowa bakwile shi: ‘Natalaa eshimba dya muntu, kushii byamweneka.’

Yeese batushishe dingi bana baye basamombo. Samwele bakwile shi: ‘Yehowa tamusangule su ngumune a ku banka nya. Twe na bangi bana? Yeese bambile shi: ‘Kukii kushaale mukile bukinga ku booso, Daavide. Ee mu kudiisha lombe lwa nyema.’ Pabaadi Daavide mwalukye, Yehowa balungwile Samwele shi: ‘Nnaye yawa!’ Samwele nkupongoola mwimu ku mutwe wa Daavidi, aye nkumusangula bwa shi akekale nfumu mu Isaleele.

Kunyima kwa mafuku, beena Isaleele abaadi mu ngoshi na beena Filistine, abaadi na kilobo kyabayitamina bu Golyate bwadya kwibalwila ngoshi. Efuku dyooso, Golyate baadi’nka asepe beena Isaleele. Baadi mwele musase shi: ‘Ntumineyi muntu afikye alwe nami. Su bantshokola atwikala bapika beenu. Anka su namutshokola anwikala bapika beetu.’

Daavide baafikile ku lupese lwa beena Isaleele mu kupa ba tuutu baaye abaadi basalayi bya kudya. Pabapushiishe Golyate, akula byabya, Daavide bambile shi: ‘Nalu naaye!’ Nfumu Saule nkumulungula shi: ‘Okii mwana mukinga.’ Daavide nkumwalula shi: ‘Yehowa ankwasha.’

 Saule bakimbile shi Daavide afubishe biina ngoshi byaye, kadi Daavide nkumulungula shi: ‘Ta ngobesha kulwa nabyo nya.’ Daavide baatshile mipila yaaye ya ndundo nkwalaala ku mwela. Aye nkusangula minoono itaano nkwiyela mu kampaaya. Akupu bayiile kwi Golyate. Kyakya kilobo nkwela musaase shi: ‘Fika pano mwan’abe. Bwa shi mpe toonyi twa mwiyilu na nyema ya mapya mwita oobe.’ Daavide tabaadi na moo nya. Aye namu nkwela waye musaase shi: ‘Obe ofiki kwandji mukwate mwele, mulumbu na esola, ank’ami nafiki mwishina dya Yehowa. T’oolu neetu nya; Efile Mukulu oolu naye. Abitungu’shi booso be pano bamone shi Yehowa e na bukome butabukile mulumbu na lupete. Etupa booso ba kwanudi mu maasa eetu.’

Daavide nkwela munoono mu mipila yaaye, aye nkwiyifunyisha na bukome bwaye booso. Ku bukwashi bwa Yehowa, munoono ubaatukile awo nkwasa Golyate mu mpala. Kilobo kya balume nkwituuta mu nsenga akyo nkufwa. Beena Filistine nkusuuka booso. Okwete kukulupila mwi Yehowa bu bibakitshine Daavide su?