Aye kwididishi dyaye, Ahabe Nfumu a mu Isaleele baadi bya kumona efuba dya nfinyo dya Nabote. Ahabe baadi na lukalo na dyadya efuba, bakimbile bya kwidiula kwi Nabote. Anka Nabote bapelele kwidiudisha mwanda tabibaadi bipusheene na Mwiya wa Yehowa wa kupela kuudisha mbalo ya bupyaanyi. Ahabe baadi munemekye Nabote bwa kulonda mwiya wa Yehowa su? Nya. Ahabe baadi mufiite munda bikata. Aye nkwinyongola bikile, apela kudya sunga nkutuuka mu kadimbo kaaye ka kulaala.

Mukashi a Ahabe, Nfumu mukashi ebubi Yezabele nkumulungula shi: ‘Obe nyi nfumu a Isaleele. We kupeta kyooso kyokumiina. Nakwatshila dyadya efuba.’ Yezabele bafundjile mukanda kwi bakulu ba kibundji, ebalungula bwa kufunda Nabote shi musaabuule Efile Mukulu, abitungu bamwase mabwe bwadya kufwa. Bakulu ba kibundji abakitshiine bibaadi Yezabele mwibalungule, akupu Yezabele nkulungula Ahabe shi: ‘Nabote baapu kufwa! Efuba dya nfinyo ndyobe.’

Nabote tabaadi penda bupenka ku bantu bashii basoole babaadi Yezabele mwipayishe nya. Baadi mwipayishe bantu bebungi babaadi bafule Yehowa. Baadi alangwila ma nkishi na kukita ingi myanda ibubi. Yehowa baadi amono byoso bibaadi abikitshi Yezabele. Yehowa baadya kukita naaye kinyi?

Kunyima kwa lufu lwa Ahabe, mwan’aye Yehorame bafikile nfumu. Yehowa batumine Yehu bwa kunyooka Yezabele na kifuko kyaye.

Yehu bayiile n’etempu dyaye ku Izreele kubaadi kushalele Yezabele. Yehorame nkufika n’etempu mu kufumankana na Yehu, amwipusha shi: ‘Kwi kufukama pankatshi peetu su?’ Yehu nkumwaluula shi: ‘Ta kwikala kufukama p’ekale nyinoobe Yezabele akitshi myanda ibubi.’ Yehorame  bakimbile bya kwifunyisha etempu dyaye bwa kusuuka. Anka Yehu nkumwasa mukyetwe, aye nkufwa.

Akupu Yehu nkwenda kubaadi Yezabele mushale. Yezabele pabapushiishe shi Yehu kwete kufika, baadi mwipente, alumbuula nyene, aye nkubanga kumutengyela kwididishi dyaye dya kwiyilu. Pabafikile Yehu, baadi mumwimune kushi bukalanga. Yehu nkusamina bafubi ba Yezabele babaadi bemane kunyima kwaye shi: ‘Mweleeyi paashi!’ Abaadi basukume Yezabele kwididishi, aye nkupona mu nsenga, akupu bafwile.

Kunyima kwa byabya, Yehu baadi mwipee bana 70 ba Ahabe aye nkusuula nsenga pa kukatusha lulangwilo lwa Baale. Bomono shi Yehowa auku myanda yooso na shi anyookaa baaba abakitshi bibubi mu nsaa yakumiina su?