Bufumu bwa bisamba ekumi bwa beena Isaleele bubaadi na ba nfumu b’ebubi, anka, Ahabe baadi mukilekile bubi. Baadi mwibakile mukashi mubi baadi alangwila Baale. Dyaye mbu Yezabele. Ahabe na Yeezabele abaushiishe eumbo na lulangwilo lwa Baale abo nkwipayisha batemuki ba Yehowa. Yehowa bakitshiine naminyi? Baadi mutume mutemuki Eliya na mukandu kwi Ahabe.

Eliya balungwile Nfumu Ahabe shi, pa mwanda wa bubi bwaye, takubaadi na kya kunoka mpeshi mu Isaleele nya. Munda mwa bipwa bikile ku bisatu, takubaadi mitshi ayikulu, bantu nkukyenga na nsala. Kunyima Yehowa batumine Eliya bwa kwalukiila kwi Ahabe. Nfumu nkumulungula shi: ‘Nnobe mutwadile Isaleele malwa! Bino byoso abikitshika nkilema kyobe.’ Eliya nkumwaluula shi: ‘Ta naami mufwishe uno munanga nya. Nwi beufwishe pa kulangwila Baale. Abitungu twitompene bwa kuuka. Bunga mwilo ooso na batemuki ba Baale ku Mwengye wa Karmele.’

Mwilo ubeebungile ku mwengye. Eliya bambile shi: ‘Sangulayi kyanudya kukita. Su Yehowa nyi Efile Mukulu a binyibinyi, mulondeyi. Su nyi Baale, mulondeyi. Atukitshi uno mwanda, abitungu batemuki ba Baale 450 balumbuule mulambu, akupu betamine efile aabo, ami namu nalumbuula mulambu n’etamine Yehowa. Yawa atuusha lwaluulo na kaalo, nyi Efile Mukulu a binyibinyi.’ Mwilo nkukumiina.

Batemuki ba Baale nkulumbuula mulambu. Abo nkwitamina efile aabo shi: ‘Oo Baale etwaluule!’ Pabaadi Baale mukutwe kwaluula, Eliya babangile kwibasesamisha. Bambile shi: ‘Mwitamineyi n’eyi dibukopo pangi enwaluula. Pangi e mu tulo, abitungu muntu a kumubuusha.’ Batemuki ba Baale abaadi bayididiile na kwitamina mpa na kukyolwa. Anka tabaadi mwibaluule nya.

Eliya nkutuula waye mulambu ku kitapilo, abo nkwiupongolwela meema. Akupu aye nkuteka shi: ‘Oo Yehowa, bakuukye shi noobe Efile Mukulu a biinyibinyi.’ Yehowa batumine musango umune kaalo mwiyilu kabashikile mulambu. Bantu nkusama shi: ‘Yehowa nyi Efile Mukulu a biinyibinyi!’ Eliya nkwakula shi: ‘Tanupashanga mutemuki su  ngumune a Baale!’ Abo nkwipaa batemuki 450 ba Baale mu dyadya efuku.

Pabamwekyele kakumbi kapeela ka mpeshi dya ku mwela, Eliya balungwile Ahabe shi: ‘Kwi kipapi kikata kya mpeshi. Ata etempu dyobe walukile ku nshibo.’ Eyilu nkufiita na makumbi, kipapi nkupuka, mpeshi e bungi nkupongoloka. Nfudiilo a byoso munanga ubapwile. Ahabe nkwata etempu dyaye nkwenda lubilo lwaye looso. Ku bukwashi bwa Yehowa, Eliya basukile lubilo kukila lwa etempu! Kadi myanda ya Eliya, ibaadi ifudiile nka paapa su? Tubande kutala.