Yosafate nfumu a mu Yuuda baadi mulwiishe bilambwilo bya Baale na ma nkishi mwiumbo. Baadi akumiina shi bantu baukye miiya ya Yehowa. Baadi mutume ba nfumu na beena Leevi mu Yuuda bwa kulambukisha bantu miiya ya Yehowa.

Miilo ibaadi iifunyishe Yuuda ibaadi ayitshiinyi kwibalwisha ngoshi mwanda ibaukanga shi Yehowa baadi na bafubi baaye. Abaadi mpa na batwadile Nfumu Yosafate bya buntu. Anka beena Moabe, beena Amone na baaba abaadi mu mwengye wa Seyiire abafikile bwa kulwa na Yuuda. Yosafate bamwene shi baadi na lukalo na bukwashi bwa Yehowa. Baadi mubungye balume, bakashi na baana booso bwabadya kwenda mu Yeelusaleme. Kumpala kwa bantu booso baadi mutekye shi: ‘Yehowa, tatwi balombeene kutshokola kushii’be nya. Etulungule namu kya kukita.’

Yehowa nkwaluula luteko lwabo shi: ‘Tanutshiinanga. Nakyebe kwinukwasha. Shalaayi bemane, nwilongye bwa kumona byankyebe kwinupaasha.’ Yehowa baadi mwibapaashe naminyi?

Butookye namashika, Yosafate nkusangula ba tuyimba, aye nkwibalungula bwa kutambuka kumpala kwa basalayi. Abatambukile kubanga ku Yeelusaleme mpa na ku mbalo ya kulwiila ngoshi yabetanyina bu Tekoa.

Pabaadi apende tuyimba na kutumbisha Yehowa na muloo n’eyi dikaamine, Yehowa baadi mulwile bafubi baaye ngoshi. Baadi mutweshe kafuutakanyi munkatshi mwa beena Moabe abo nkubanga kwitapeena, takubaadi su ngumune a kwabadi bapandjile. Kadi Yehowa baadi mukalwile bantu ba mu Yuuda, basalayi na ba tshiite mwakwidi. Bantu booso ba mu maumbo ebeefunyishe abapushiishe bibaadi Yehowa mukite, abo nkushinguula shi Yehowa kya kalwila bafubi baaye. Yehowa kwete kupaasha bafubi baaye naminyi? Mu bipaso bibungi. Te na lukalo lwa bukwashi bwa bantu bwa kwibikita nya.