Yezabele baadi na nsogwakashi e n’eshina bu Ataliya, baadi na mwikeelo wi bubi nka bu wa nyinaye Yezabele. Ataliya baadi mwibakilwe kwi nfumu a mu Yuuda. Mulume aye pabafwile, mwan’aye babangile kukunkusha. Nsaa ibafwile mwan’aye, Ataliya baadi mwituule aye nabeene bu nfumu a Yuuda. Kunyima, bakimbile bya kushimisha mulongo ooso wa bufumu p’aye kwipaa muntu ooso baadya kwikala bu nfumu pa mbalo yaaye, mpa na beekulu baaye. Bantu booso ababangile kumutshiina.

Yekoyada baadi tshiite mwakwidi mukata, baadi auku na mukashi aaye Yekosheba shi Ataliya baadi akitshi bibubi. Abatudile na muwa wabo mu masaku bwa kufwamisha mwana tooka baadi umune a ku beekulu ba Ataliya abetamina bu Yoashe. Abo nkumukusha mu ntempelo.

Pabaadi Yoashe mulombashe bipwa musambo, Yekoyada babungile bakunkushi ba mwilo na beena Leevi booso ebalungula shi: ‘Lamaayi ku biibi bya tempelo, tanutadilanga muntu su ngumune bwa kutwela.’ Akupu, Yekoyada bekeeshe Yoashe bu nfumu a Yuuda, aye nkumufwadika kifulu kya bufumu ku mutwe waye. Mwilo wa Yuuda ubakupiile nkasa wakula shi: ‘Nfumu abikale!’

Pabapushile nfumu mukashi Ataliya tuleo twa kibumbu ku ntempelo, bayile kwanka bukidi. Pabamwene nfumu mupya, bambile shi: ‘Babandiila lukuku! Babandiila lukuku!’ Bakunkushi ba mwilo abakwatshile nfumu mukashi, bamutusha paasha, abo nkumwipaa. Kadi Yekoyada bakitshiine kinyi pabitale mwikeelo wibubi wa Ataliya ubaadi nao kwi mwilo?

Yekoyada bakwashile mwilo bwa kukita kilombeeno na Yehowa, abo nkumulaa bwa kumulangwila nka penda Aye bupenka. Yekoyada nkwibalungula  bwa kubumbula ntempelo a Baale na kufinga ma nkishi abaadi mwanka. Aye nkutuula ba tshiite mwakwidi na beena Leevi bwabadya kufuba ku tempelo bwa shi bantu babangye dingi kulangwila mwaka. Baatudile bantu ba kulama ntempelo bwa kupela muntu su ngumune e butete emutwela. Akupu Yekoyada na bakunkushi ba mwilo abaatshile Yoashe bamutuula mu nkwasa a bufumu. Bantu ba mu Yuuda nkushaala mu muloo. Binobino abaadi bya kulangwila Yehowa mu bulungantu kushii nfumu mubi Ataliya sunga lulangwilo lwa Baale. Bomono bibaadi katshintshi ka Yekoyada kakwashe bantu bebungi su?