Bakwetu ba kifulo:

Bu byatudi balangwidi ba Yehowa, twi bafule Bible Eyi dyaye. Atushinkamisha shi kwete kwitulungula myanda ya binyibinyi, kutusha buludiki bwibuwa mu nshalelo na kwitupa bishinkamisho abitukumu ku mashimba abilesha kifulo kya Yehowa bwa bantu. (Misambo 119:105; Luka 1:3; 1 Yowano 4:19) Twi na lukalo lukata lwa kukwasha bangi bwabadya kulonga bya binyibinyi bi na muulo bi mu Eyi dy’Efile Mukulu. Nyi bwakinyi twi na muloo ukata wa kutusha uno mukanda wa “Malongyesha odya kupeta mu Bible.” Banda kwitutadiila tukulungule bipeela pabitale uno mukanda.

Twi balumbuule kipindji kikata kya uno mukanda bwa kukwasha bana. Anka, twi kwiufubisha dingi bwa kukwasha bantu bakulu abakumina kulonga bibungi pabitale Bible. Na biikale Bible bu mukanda wa muntu eese, ooso a kwatudi akapete bukwashi pa kutaluulanga malongyesha aaye e kwitukwasha bwa kwikala na muloo wa binyibinyi.

Pa kufubisha myanda ya mu Bible, uno mukanda awitulondela myanda ya kifuko kya bantu kubanga ku bupangi. Twi betatshishe bikata bwa kuleesha myanda ya mu Bible mu kipaso kibofule na akipushika kalolo na ilondene muyile bibayidi ikitshikye.

Byabya uno mukanda t’aulondo nka penda myanda ya mu Bible bisumanga nya. Nfundjilo na bifwatulo bi mwanka mbilumbulwe mu kipaso kya kwikasha myanda bu ayikitshika na kumwesha binangu bya bantu babesambila.

Uno mukanda awitukwasha bwa kuuka kipaso kiikale Bible esambila bwa bantu—babaadi bakokyele Yehowa na bashibaadi bamukokyele. Awitukwasha dingi bwa kupeta malongyesha ku bileshesho byabo. (Beena-Looma 15:4; 1 Beena-Kodinda 10:6) Uno mukanda ngwabulwe mu bipindji 14. Ku mbangilo kwa kipindji kyoso kwi mayi a mu kikoso e na malongyesha atudya kulonga.

 Su we nambutwile, we kubadika dilongyesha na mwan’oobe na kwisambila bifwatulo bi mwanka. Akupu, nwi kubadika Maverse a mu Bible mwabadi baate dyadya dilongyesha. Kwasha mwan’oobe bwa kulesha kwipushena kwi mu byabadika mu Bible na dilongyesha di mu mukanda. Kukita byabya kwi kukwasha dingi muntu mukulu bwa kwikala na mweneno mulombane a myanda ya mu Bible.

Atukulupila shi uno mukanda aukwasha booso basha mashimba alulame—bakulu na bakinga—bwa kulonga Eyi dy’Efile Mukulu na kufubisha malongyesha aadyo mu nshalelo aabo. Su abakitshi byabya, n’abo namu mbalombeene kumulangwila bu bantu ba mu kifuko kyaye kyadi mufule.