1, 2. (a) Bena dibaka bapya abakulupilaa kinyi? (b) Nkonko kinyi yatukyebe kutalula mu uno shapitre?

BANDA kunangushena mulume na mukashi be mwifuku dyabo dya dibaka. Be na muloo pabitale abikala nshalelo aabo a mu mafuku aafiki, abakulupila na kulota myanda i bungi. Abakulupila shi dibaka dyabo adiyisha na abekala na muulo.

² Anka, malunda e bungi aabanga bi buwa, taayididiilaa nka byabya nya. Bwa shi dibaka diyishe na dikale na muloo, abitungu beyibakishene balonde bukunkushi bw’Efile Mukulu. Byabya, tubandeyi kutaluula lwalulo lwa Bible ku ino nkonko: Dibaka di na myabi kinyi? Su okyebe kwibakila, we kusangula muntu e buwa a kwiyibakishena naye naminyi? We kwikala mulume sunga mukashi e buwa naminyi? Na nkinyi kilombene kukwasha dibaka bwa shi diyishe?—Badika Nkindji 3:5, 6.

3. Opwandikisha shi bwa shi muntu ekale na muloo abitungu atwele mu dibaka su? Patuula.

³ Bangi bantu abambaa shi muntu ta mulombeene  kwikala na muloo su tamwibakile. Anka bino ta mbya binyibinyi nya. Yesu bambile shi bukupi bwi kwikala bu kya buntu. (Mateo 19:11, 12) Na Mpoolo mutumibwa bambile shi kushaala bukupi kwi na miloo i bungi. (1 Beena-Kodinda 7:32-38) Kwibakila mmwanda ukutale bupenka bobe. Twe mulombene kutadiila ba kuuku, kifuko, sunga kipikwa kyenu bwa shi kikutakule mu kwibakila.

4. Dibaka di buwa adifwishaa miloo kinyi?

⁴ Bible alesha shi dibaka nkyabuntu akifiki kwi Efile Mukulu na di na ingi miloo. Yehowa bakwile pabitale Adame muntu a kumpala shi: ‘Ta bi buwa muntu ekale bupenka, nakyebe kumupa mukwashi mumupwandjikile.’ (Kibangilo 2:18) Yehowa bapangile Eeva bwa shi ekale mukashi a Adame, na abo nkufika kifuko kya kumpala kya bantu. Su mulume na mukashi abatanda bana, abitungu eyibakishi dyabo dikale mbalo i buwa ya kukusha bana. Anka dibaka tadikwanka penda bwa kutanda bana nya.—Misambo 127:3; Beena-Efeso 6:1-4.

5, 6. Mbikunyi bilombene eyibakishi kwikala bu “kipâba kilukwe na myoshi isatu”?

⁵ Nfumu Salomone bafundjile shi: “Kwikala bubidi nkukile buwa pe kwikala bupenka, mwanda bantu babidi p’abafubu pamune, be na kamweno ke bungi. Su umune apona, mungi namu by’amukwasha, anka yawa e bupenka e na malwa, mwanda su apona, ta kwi a kumukwasha, ooo. . . . Kipâba kilukwe na myoshi isatu t’akitshibikâ, ooo.”—Mulungudi 4:9-12, Ñono na malango.

⁶ Eyibakishi di buwa nyi mbu kuuku bukata bwi pankatshi pa bantu babidi abekwashena, abenyingishena na kwilamishena. Kifulo akinyingishaa eyibakishi, kadi  eyibakishi ndilombene kwikala dinyingye ngofu su mulume na mukashi bakwete kulangwila Yehowa. Paapa, eyibakishi dyabo adikala bu “kipâba kilukwe na myoshi isatu,” moshi wabadi balukye bi bukopo na myoshi isatu. Moshi wi byabya awikalaa bukopo kukila moshi wabadi balukye na penda myoshi ibidi. Eyibakishi ndilombene kwikala bukopo su Yehowa e mwanka.

7, 8. Mpoolo mmutushe elango kinyi pabitale eyibakishi?

⁷ Su mulume na mukashi abeyibakishena, be kupudisha nkalo yabo ya kwifikena pepi. (Nkindji 5:18) Anka, su muntu ayibakila penda bwa kusankisha nkalo ya mbidi, ta mulombene kusangula muntu akwiyibakishena naye na binangu. Nyi bwakinyi Bible amba shi bwa kwibakila, abitungu muntu abande kukisha ‘mafuku a buwa bwa bu nsongwa bwaye,’ kipungo akikalaa muntu na malaka e bukopo a kwifikena pepi na mulume sunga mukashi. (1 Beena-Kodinda 7:36) Bi buwa kubanda kutengyela bwa kwiyibakishena su yaya nkalo ibataala. Yaya nsaa muntu ekala na binangu bi buwa na e kusangula muntu e buwa.—1 Beena-Kodinda 7:9; Shake 1:15.

⁸ Su okwete kwilumbula bwa kwibakila, abitungu kwikala na binangu bi buwa, na kuuka shi mwiyibakishi amwikalaa nkalakashi. Mpoolo bakwile shi, baaba abebakila “abakekala na nkalakashi i bungi.” (1 Beena-Kodinda 7:28) Sunga bena eyibakishi be na muloo, bakwete kufumankana na nkalakashi. Su bwata kitshibilo kya kwibakila, sangula muntu akwiyibakishena naye na binangu.

9, 10. Nkinyi kilombene kukitshika su tweyibakishena na muntu shalangwila Yehowa?

⁹ Mu Bible mwi elango di na muulo ukata, aditungu  kutaluula nsaa yokyebe kusangula mulume sunga mukashi adyamba shi: ‘Tanwitentekanga kikumbo kilongye bibi na bashi bena kukumiina.’ (2 Beena-Kodinda 6:14) Kino kileshesho nkipushene na abikitaa ba kidime. Su nyema ibidi ngilekene ku bukata na bukome, kidime ta mulombene kwiyanya pamune bwa kudima mu mafuba nya. Tabi buwa bwa yaya nyema, mwanda yoso ibidi ayikyengye. Mu mushindo umune, kwiyibakishena na muntu shalangwila Yehowa, kwi kutusha bilumbu bi bungi. Byabya Bible kwete kwitupa elango di buwa dya kwiyibakishena “penda mu Nfumu.”—1 Beena-Kodinda 7:39.

¹⁰ Kala bangi bena Kidishitu abaadi abamono shi bi buwa kwiyibakishena sunga na muntu shalangwila Yehowa pe kushala bukupi. Kadi su twakutwa kutumikila elango dya mu Bible, twi kupeta twinyongoshi twi bungi na tatwikala na muloo. Bu byatudi balangwidi ba Yehowa, kumufubila nyi kintu ki na muulo ukata mu muwa wetu. We kukita kinyi su twe na oobe mulume sunga mukashi odya kukisha naye kyakya kipungo ki na muulo ukata mu muwa oobe? Be bungi mbate kitshibilo kya kushala bukupi, pe kwiyibakishena na muntu shii mufule Yehowa sunga kumufubila.—Badika Misambo 32:8.

11. Mbikunyi byodya kusangula kalolo muntu a kwiyibakishena naye?

¹¹ Kadi, bino tabilesha shi muntu oso afubila Yehowa mmulombene kwikala mulume sunga mukashi e buwa nya. Su okyebe kwibakila, kimba muntu odi mufule binyibinyi na anwipushena naye. Tengyela na pokapetela muntu anudi naye mpàngo i mumune na atuulu mufubo w’Efile Mukulu pa mbalo ya kumpala. Ata nsaa ya kubadika na kunangushena ku malango atale eyibakishi e  mu mikanda yabadi batuushe kwi mpika sha kishima na mupatulukye.—Badika Misambo 119:105.

12. Nkinyi kyatulongyela ku malunda a mu Bible a kusangwila muntu mukashi sunga mulume?

¹² Mu bingi bipikwa, ba nambutwile ndjo abasangwilaa bana babo mukashi sunga mulume. Abimweka shi ba nambutwile abauuku kalolo muntu e buwa bwa mwan’aabo. Kino kipikwa kibaadi kwanka mu mafuku a kala. Byabya, su kifuko kyenu akilondaa kyakya kipikwa, Bible mulombene kukwasha ba nambutwile bwa kuuka ngikashi ayitungu kutala. Bu kileshesho, pabaadi Abalahame musangwile mwan’aye Isaake mukashi, tabadi  munangushene ku makuta sunga ku nshalelo aaye, kadi baadi mutale kifulo kyaye bwa Yehowa.—Kibangilo 24:3, 67; Tala Mayi a ku nfudilo 25.

13-15. (a) Mbikunyi bilombene mwana mulume kwilumbula bwa kwikala mulume e buwa? (b) Mbikunyi bilombene mwana mukashi kwilumbula bwa kwikala mukashi e buwa?

¹³ Su todi okyebe kutwela mwiyibakishi, ikala mushinkamishe shi bopu kwilumbuula. We kupwandikisha shi wemupwe kwilumbuula, kadi tubande kutaluula akipushisha kwilumbuula bwa kutwela mwiyibakishi. Pangi bi nkukanyisha.

¹⁴ Bible alesha shi balume na bakashi be na mashito elekene mu kifuko. Byabya, kwikala pepi bwa kutwela mwiyibakishi kwi kupushisha kintu kampanda kilekene muyile kwikala bu mulume sunga bu mukashi. Su mwana mulume akumiina kwibakila, abitungu eyipushe su mmupwe kwilumbuula bwa kwikala mutwe wa kifuko. Yehowa atekye mulume bwadya kulombasha nkalo ya ku mbidi na ya mbinangu ya mukashi na ya bana baye. Kintu ki na muulo ukata, abitungu mulume atuule lulangwilo lw’Efile Mukulu pa mbalo ya kumpala mu kifuko kyaye. Bible alesha shi muntu shalombasha nkalo ya ba mu kifuko kyaye e bu muntu “mubi mukile shii-na-lukumiino.” (1 Timote 5:8) Byabya, su we mwana mulume kwete kwela kinangu kya kwibakila, nangushena pabitale dino eyi dya kulonda dya mu Bible adyamba shi: ‘Lumbuula midimo yodi nayo pasha, odime efuba; kunyima webakye nshibo yobe.’ Twi kwamba dingi shi, kumpala kwa kwibakila, ikala mushinkamishe shi, wekala mulume e byabya abikutekye Yehowa shi wekale.—Nkindji 24:27.

 ¹⁵ Su mwana mukashi kwete kwela kinangu kya kwibakilwa abitungu abande kwiyipusha su bapu kulombana bwa kutwala mashito a kwikala mukashi pangi nambutwile. Bible mmuleshe imune ya ku mishindo ilombene mukashi e buwa kupasukila mulume na bana baye. (Nkindji 31:10-31) Lelo uno, balume na bakashi be bungi abanagushenaa nka ku kilombene kwibakitshina mwina dibaka nabo. Anka Yehowa etutekye bwatudya kunangushena pabitale kyatudya kukitshina mwina dibaka netu.

16, 17. Su we na lukalo lwa kutwela mwiyibakishi, nkinyi akitungu shi onangushene?

¹⁶ Kumpala kwa kutwela mwiyibakishi, banda kunangushena ku akyamba Yehowa pabitale balume na bakashi. Kwikala mutwe wa kifuko, takulesha shi mulume ekale akyengyesha bangi ku mbidi sunga mu binangu. Mulume e buwa ambulaa Yesu, aye e na kifulo na kalolo kwi baaba bakwete kupasukila. (Beena-Efeso 5:23) Mwana mukashi namu, abitungu aukye akilesha kukwatshishena bitshibilo bya mulume aaye na kumukwasha. (Beena-Looma 7:2) Abitungu eyipushe su ekala na muloo wa kukookyela mulume aaye, muntu mukutwe kupwidika. Su bamono shi t’obesha, bi buwa abande kutengyela.

¹⁷ Abitungu balume na bakashi bekale abakimbi muloo wa bena dibaka nabo, kushi penda wabo’bo banabene. (Badika Beena-Fidipe 2:4.) Mpoolo mutumibwa bafundjile shi: ‘Ooso a kwanudi, e na kya kufula mukashi aaye bu byadi mwifule aye nabene, mukashi namu anemekye mulume aaye.’ (Beena-Efeso 5:21-33) Abitungu mulume na mukashi befulene na kwinemekyeshena. Bwa shi eyibakishi dikale kalolo, mulume akumiina kupusha shi mukashi aaye kwete kumunemeka, na  mukashi namu akumiinaa kupusha shi mulume aaye mmumufule.

18. Bwakinyi abitungu shi bantu abeyilena bekale badimukye?

¹⁸ Kipungo kya kwiyilena, abitungu kikale kipungo kya muloo bwa baaba abakyebe kwiyibakishena, bu byabakwete kwilongeena bwa kwiuukena kalolo. Nyi nkipungo akitungu shi bekale abakumiina myanda bu byayidi, na kwikala balulame mu kipaso kyabadya kumona su abakumiina binyibinyi kushaala pamune. Mu kipungo kya kwiyilena, abitungu mulume na mukashi balongye bya kwisambanga na kukimba kuuka bi mwishimba  dya ungi. Apende kifulo kyabo na kutama, abende na kwipushena buwa. Anka abitungu badimukile kipaso kyabeleshena byabya byabapusha kupela kwa shi, tala bakita mwanda wi butete. Kifulo ky’eyendo ki kwibakwasha bwa kwikala na butontshi bwa mbidi na akibalama mu kukita kintu kampanda kilombene kulwisha kipwano kyabo banabene mpa na kipwano kyabo na Yehowa.—1 Beena-Tesalonika 4:6.

19, 20. Bena Kidishitu abamona eyibakishi naminyi?

¹⁹ Mu mikanda na mu ma filme e bungi, abaleshaa bantu abeyibakishena bu be na muloo ukata. Kadi, mu nshalelo a binyibinyi, kwiyibakishena nyi mpenda mbangilo. Yehowa bakitshine eyibakishi bwadidya kwikala kwanka bwa loso.—Kibangilo 2:24.

²⁰ Lelo uno bantu be bungi bakwete kumona bulunda bu kwipushena kwa kapindji kapela. Mbibofule bwa kwiyibakishena na mbibofule dingi bwa kutshiba bulunda. Bangi abamonaa shi nsaa ayituuku bilumbu, ndjo nsaa ya kuleka mwina dibaka nabo na kutshiba bulunda. Anka tentekyesha kileshesho kya mu Bible kya kipâba ki bukopo kilukwe na myoshi isatu. Kipâba ki byabya ta nkilombene kutshibika sunga mu nkalakashi i bukopo. Nsaa yatukulupila kwi Yehowa bwa kupeta bukwashi, eyibakishi dyetu ndilombene kuyisha. Yesu bambile shi: “Kiakia kibungye Efile Mukulu, muntu tekilamuunanga nya.”—Mateo 19:6, Kilombeeno kipya 2014.

21. Nkinyi ki kukwasha mulume na mukashi bwabadya kwifulena lusa?

²¹ Atwe boso atwikalaa na ngikashi i buwa kadi atukitaa bilubilo. Mbibofule bwa kumona penda bilubilo bya bangi, bikishekishe bya mwina eyibakishi netu. Su twakita  byabya, tatwikala na muloo nya. Kadi, su twemena penda pa ngikashi i buwa ya mwina eyibakishi netu, atwikala na muloo. Kwikala na uno mweneno bwa mwina dibaka netu kwi buwa su? Oolo! Yehowa auku shi twi bantu bakutwe kupwidika, kadi amonaa nka penda ngikashi yetu i buwa. Kadi su takitaa byabya! Kayimba ka misambo bambile shi: “Su olubiila bito bya bantu Yehowa, Yehowa, nnanyi a ku panda?” (Misambo 130:3) Abitungu balume na bakashi bambule Yehowa pakutala bi buwa bi  mu mashimba a balume na bakashi babo na kwibafwila lusa.—Badika Beena-Kolose 3:13.

22, 23. Abrahame na Sara mbalekyele bena dibaka kileshesho kinyi ki buwa?

²² Mwenda bipwa, eyibakishi adyende na kunyinga. Abrahame na Sara abayishile mwiyibakishi na abadi na muloo. Pabaadi Yehowa mulungule Abrahame bwa kukatuka kwabo ku Ur, Sara baadi pangi na bipwa 60. Banda kunangushena byabibaadi bukopo bwadya kukatuka mu kibundji kyabo ki buwa bwa kwenda mu kushala mu tushibo twa mapema. Kadi Sara baadi lole na mukashi e buwa kwi mulume aaye, na baadi amunemeka. Nyi bwakinyi baadi mukwatshishene bitshibilo bya Abrahame na kumukwasha bwadya kwibilombasha.—Kibangilo 18:12; 1 Mpyeele 3:6.

²³ Eyendo, kwikala n’eyibakishi di buwa takulesha shi mulume na mukashi abekala abepushena nka mu myanda yoso nya. Pabaadi Abrahame mupele kutemesha Sara, Yehowa bamulungwile shi: “Temesha kyoso akikulungula Sara.” Abrahame bamutemeshe, na bipeta bibatukile bibaadi bi buwa. (Kibangilo 21:9-13) Su ingi nsaa nwakutwa kwipushena na mwina kobe, tobofulanga. Kintu ki na muulo nkya shi, sunga nwekutwena, abitungu nwikale nka befulene na kwinemekeshena.

24. Eyibakishi dyetu ndilombene kutumbishisha Yehowa naminyi?

²⁴ Mu kakongye ka bena Kidishitu, mwi bantu be bungi be na muloo mu malunda aabo. Su okyebe kutwela mwiyibakishi, tentekyesha shi kusangula muntu a kwiyibakishena naye nyi kitshibilo ki na muulo ukata. Nkitale muwa obe oso, byabya teka Yehowa bwa shi akukunkushe. Paapa we mulombene kusangula muntu a kwiyibakishena naye na binangu, kwilumbula kalolo bw’eyibakishi na kwitatshisha bwa kwikala na kipwano ki bukopo na kifulo akitumbishisha Yehowa.