1, 2. Bwakinyi we mufule Yehowa Efile Mukulu?

WE MUFULE Efile Mukulu su? Eyendo shi we mumufule bikata, nyi bwakinyi bodi mwilambule kwadi. Bodi mumumone bu kuuku oobe e buwa. Kadi, kumpala kwashi ofule Yehowa, aye babadidiile nkufula. Atubadika mu Bible shi: “Atwe twi nee kifulo, mwanda aye ngi babadidiile kwitufula.”—1 Yowano 4:19.

² Banda kunangusheena ku mishindo yoso ituleeshe Yehowa kifulo. Mmwitupe nsenga, mbalo i buwa kushaala na byoso byatudi nabyo lukalo bwa kusangeela muwa. (Mateo 5:43-48; Kibafumbwilwe 4:11) Akumina shi twikale mu kipwano ki buwa naye, na mmwitukwashe bwatudya kulonga myanda imutale. Nsaa yatubadika Bible tukwete kutemesha Yehowa. Na nsaa yatumutekye, kwete kwitupusha. (Misambo 65:2) Etukunkushaa na kwitunyingisha ku bukwashi bwa kikudi kyaaye ki selele. (Luka 11:13) Baadi mpa na mutume Mwana aaye bwa shi etukuule ku mulwisho na ku lufu.—Badika Yowano 3:16; Beena-Looma 5:8.

3. Twi kulama bu kuuku bwetu na Yehowa naminyi?

³ Banda kutentekyesha kuuku oobe a p’eshimba,  muntu ekalaa noobe mu nsaa ya muloo sunga ya malwa. Bwa kulama bwabwa bu kuuku, abitungu kwitatshisha ngofu. Bi mumune na bu kuuku bwetu na Yehowa, Kuuku eetu a p’eshimba mukile bangi boso. Bu kuuku bwetu naaye bwi kushaala bwa loso. Bible etulungula shi: “Elameeyi mu kifulo ky’Efile Mukulu.” (Yunda 21, Kilombeeno kipya 2014) Twi kwibikita naminyi? Bible aluula shi: “Kifulo ky’Efile Mukulu ki bino, tulame miiya yaaye. Na iinyi miiya yaaye ta mbushito bwitutentekwe nya.”— 1 Yowano 5:3.

4, 5. (a) “Kifulo ky’Efile Mukulu” akipatuula kinyi? (b) Kifulo kyobe bwa Yehowa kibabangile kutama naminyi?

⁴ Mwaku “kifulo ky’Efile Mukulu” mu Bible aupatulaa kinyi? Ta mbitale kifulo ky’Efile Mukulu bwetu nya, mbitale kifulo kyatudi nakyo bwaaye. Otentekyesha nsaa ibobangile kufula Yehowa su?

⁵ Tentekyesha bibopushishe nsaa ibolongyele shi Yehowa akumiina shi wekale na muwa wa loso mu nsenga ipya. Bolongyele pabitale byoso byadi mukite bwa shi wemutwele, obe nkumona shi Yehowa baadi mwitupe kya buntu kikile buwa p’aye kutuma Mwanaaye pa nsenga. (Mateo 20:28; Yowano 8:29; Beena-Looma 5:12, 18) Pobolongyele byabadi bakufule kwi Yehowa, eshimba dyobe dibasangele, obe nkubanga kumufula.—Badika 1 Yowano 4:9, 10.

6. Kufula muntu akutekye kinyi? Kifulo kyobe bwa Yehowa nkikutakule mu kukita kinyi?

⁶ Kadi kwakwa kufula kwa Efile Mukulu kukibaadi ku mbangilo. Bu kileshesho, nsaa yatufulu muntu tatwimena nka penda pa kwamba shi “ne mukufule”  nya. Kifulo akitutakula mu kukita myanda ayisangasha yawa muntu. Mu kipaso kimune, kifulo kyobe bwa Yehowa akikutakula mu kwikala na nshalelo amusangasha. Pabatamine kyakya kifulo, bodi mwilambule kwadi obe nkubatshishibwa. Yaaya nsaa, bomulayile’shi omufubila bwa loso. (Badika Beena-Looma 14:7, 8.) We kulama wawa mulayilo naminyi?

7. Nkinyi kyatudya kukita su twi bafule Yehowa? Mmiiya kinyi yadi mwitwelele?

⁷ Mwanda twi bafule Yehowa, “atulama miiya yaaye.” Twi kwibikita naminyi? Nsaa y’atumukookyela. Mu Bible atulongo mwikelo aukumiina Yehowa shi twikale nao. Bu kileshesho, etulungula shi kukolwa maalwa, kudimba, kwifikena pepi na muntu oshi mwiyibakishene naye, kulangwila muntu sunga kintu kampanda pe kumulangwila aye, kwi bubi.—1 Beena-Kodinda 5:11; 6:18; 10:14; Beena-Efeso 4:28; Beena-Kolose 3:9.

8, 9. Atuuku naminyi akikumiina Yehowa shi tukite nsaa yakushii mwiya wabadi betwelele patooka mu Bible? Tuusha kileshesho.

⁸ Anka, bwa kusangasha Yehowa t’abitungu nka shi twimene pa kukookyela miiya yaaye nya. Ta mmwitwelele miiya pabitale ka mwanda koso ka mu nshalelo nya. Ingi nsaa twi kufumankana na myanda ishi na mwiya kampanda mu Bible awitulesha kya kukita. Twi kwata bitshibilo bi buwa naminyi? (Beena-Efeso 5:17) Mu Bible atusangana mayi a kulonda, ekale bya binyibinyi bya kitako abitulongyesha abimonaa Yehowa myanda. Dingi, nsaa y’atubadika Bible, atuuku bi bu Muntu bwa Yehowa. Atulongo ngyelelo aaye a binangu,  byadi mufule na byadi mushikwe.—Badika Misambo 97:10; Nkindji 6:16-19; tala Mayi a ku nfudilo 1.

⁹ Bu kileshesho, mbikunyi byatwataa kitshibilo pabitale kyatudya kubandila ku TV sunga ku Internete? Yehowa ta mwitulungule patooka akitungu kukita nya. Anka, mayi a kulonda adi mwitupe aetukwasha bwa kwata bitshibilo bi buwa. Lelo uno myanda ya kukisha nayo kapapi ngiule na bu ntomboshi na lusandji. Mu Bible Yehowa etulungula shi: ‘Mmushikwe baaba bafule etombo’ na shi “akatshibila baaba abatambuka lusandji kiimu.” (Misambo 11:5; Beena-Ebelu 13:4) Ano mayi a kulonda e kwitukwasha naminyi bwa kwata bitshibilo bi buwa? Nsaa yatuuku shi Yehowa mmushikwe kintu sunga shi ekimonaa bu ki butete, abitungu twikishikwe.

10, 11. Bwakinyi atukokyelaa Yehowa?

¹⁰ Bwakinyi atukokyelaa Yehowa? Ta mbwa kupela dinyoka sunga kutshiina myanda ilombene kutuuka kunyima kwa kwata bitshibilo bi bubi nya. (Beena-Ngalatea 6:7) Atukokyela Yehowa mwanda twi bamufule. Anka abikalaa bana abakumiina kusangasha nshaabo, atukumiina kusangasha Yehowa, Nshetu e mwiyilu. Takwi kintu ki buwa kukila kuuka shi Yehowa asangalaa netu!—Misambo 5:12; Nkindji 12:2; tala Mayi a ku nfudilo 2.

¹¹ Tatukokyela Yehowa penda mu myanda ibofule sunga patushi na kingi kya kukita nya. Na t’atusangulaa mwiya wa kukookyela na watusha kukookyela. (Miiya Ikituulwe 12:32) Anka, atumukokyelaa mu byoso, anka bu bibambile mufundji a misambo shi:  “Naapusha mwenyi wa mayi oobe ne mwiafule ngofu.” (Misambo 119:47; Beena-Looma 6:17) Atukumiina kwikala bu Nowa, badi mufule Yehowa pa kukita kyoso kibamutekyele. Bible amba shi Nowa “nkukita nka byabya.” (Kibangilo 6:22) Okumiina shi Yehowa ambe byabya pa mwanda obe?

12. Twi kusankisha Yehowa naminyi?

¹² Yehowa apushaa naminyi p’atumukokyela? Atusankisha ‘eshimba dyaaye.’ (Nkindji 11:20; 27:11) Banda kutala namu! Atusankisha Mupangi a eyilu na nsenga nsaa yatumukokyela. Anka tetukitshisha byanka pa bukopo nya. Kadi mmwitupe bulungantu bwa kwisangwila. Nyi nkwamba shi, twi na bulungantu bwa kusangula kukita bi buwa sunga bi bubi. Yehowa akumiina shi kifulo kyetu bwaaye kitutakule mu kwata bitshibilo bi buwa bwa shi twikale na nshalelo ebuwa.—Miiya Ikituulwe 30:15, 16, 19, 20; tala Mayi a ku nfudilo 3.

13, 14. Atwiuku naminyi shi miiya ya Yehowa tayi bukopo kukokyela? Tuusha kileshesho.

¹³ Twi kukita kinyi su twabanga kupusha shi miiya ya Yehowa ngikile bukopo bwa kwiyikokyela sunga shi ayitukutshishwa kwikala na bulungantu? Bible alesha shi: “Miiya yaaye ta mbushito bwitutentekwe nya.” (1 Yowano 5:3) Mwaku wa mu kina Greeke wabadi baluule bu “bushito” aulesha “kintu akineeme bushito.” Mu angi ma verse, kino kishima abafubaa nakyo bwa kwisambila miiya ya bisumanga sunga muntu akunkusha bangi na kwibatapa ku mashimba. (Mateo 23:4; Bikitshino 20:29, 30) Bible a New English  Translation, aleshe shi: “Miiya yaaye tangitunemeene bushito nya.” Miiya ya Yehowa tayii “bushito,” mwanda tayi bukopo kukookyela. Ekalaa na binangu bi buwa mu byoso by’etutekye shi tukite.

¹⁴ Bu kileshesho, banda kunangushena shi okwete kukwasha kuuk’obe akyebe kufiluka bwa nkatwela mu nshibo ipya. Mmupwe kwanya bintu byoso. Bingi mbipelepele na mbibofule bwa kwibitwala, bingi namu bi bushito na be kwibitwala nka kwi bantu babidi. Kuuku oobe e nkuteka bwashi otwale kintu kii bushito bupenka bobe? Nya! Bwakinyi? Mwanda t’akumiina shi okyengye. Anka bu yawa kuuku, Yehowa tetutekaa bwa shi tukite mwanda kampanda witukile bukopo nya. (Miiya Ikituulwe 30:11-14) Yehowa auku kyatudi. “Auku kalolo kyakya kyabadi betubumbe nakyo, mmushinguule shi twi lufufi.”—Misambo 103:14.

15. Bwakinyi atushinkamisha shi miiya ya Yehowa i kwanka bwa buwa bwetu?

¹⁵ Moyiise balungwile mwilo wa Isalele shi, miiya ya Yehowa i kwanka bwa shi bekale na “muloo mafuku ooso” na shi kwakwa kukookyela kwabo akwibakwasha bwa “kushaala na muwa.” (Miiya Ikituulwe 5:28-33; 6:24) Bi nka byabya mpa na lelo. Kyoso akitutekye Yehowa bwa kukita, akitukwasha bwa kwikala biya. (Badika Yeshaya 48:17.) Nshetu Yehowa aukaa kyakya kii na muulo kwatudi. (Beena-Looma 11:33) Bible etulungula shi: “Efile Mukulu nyi nkifulo.” (1 Yowano 4:8) Bino abilesha shi, kyoso akyakula Yehowa sunga kyakitshi ekikitshi mwanda wa kifulo.

16. Mbikunyi byatuuku shi twi kukookyela Yehowa sunga twekala bakutwe kupwidika na twi mu nsenga i bubi?

 ¹⁶ Ta mbibofule kukokyela Efile Mukulu misusa yoso nya. Twi mu nsenga i bubi, i ku matalwa a Diabulu. Kwete kutakula bantu mu kukita myanda i bubi. (1 Yowano 5:19) Abitungu dingi tulwe na binangu byetu bikutwe kupwidika, mwanda bi kwitutakula mu kukutwa kukokyela Efile Mukulu. (Beena-Looma 7:21-25) Anka kifulo kyetu bwa Yehowa akitupa bukome bwa kukita myanda i buwa. Kwete kumona byatwitatshisha bwa kumukookyela, na etukwasha na kikudi ki selele, bukome bwaye. (1 Samwele 15:22, 23; Bikitshino 5:32) Kikudi ki selele akitukwasha bwa kwikala na ngikashi ayitutakula bwa kumukokyela.—Beena-Ngalatea 5:22, 23.

17, 18. (a) Nkinyi kyatukyebe kulonga mu uno mukanda? (b) Nkinyi kyatukalongo mu shapitre alondo?

¹⁷ Mu uno mukanda, atulongo bya kwikala na nshalelo asangasha Yehowa. Atulongo dingi bya kutumikila mayi a kulonda na miiya itale mwikelo wi buwa mu nshalelo etu. Tentekyesha shi Yehowa tetutakulaa bwa kumukookyela pabukopo nya. Kadi su twamukookyela, nshalelo etu alongama na atwikala na muloo mu mafuku e kumpala. Kintu ki na muulo ukata, p’atukookyela Efile Mukulu atulesha byatudi bamufule.—Tala Mayi a ku nfudilo 4.

¹⁸ Bwa shi tuukye ki buwa na ki bubi, Yehowa mwitupe kondo k’eshimba. Su twalongyesha kondo k’etu k’eshimba, aketukwasha bwa ‘kulama miiya yaaye.’ Byabya, kondo k’etu k’eshimba nkinyi, na twi kwikalongyesha naminyi? Tubandeyi kutaluula.