1, 2. Su mwiyibakishi mwi myanda, byabya abilesha shi dibakutwa kobeleka? Patuula.

EYIBAKISHI nyi nkyabuntu akifiki kwi Yehowa. Ndilombene kwikasha muntu na nshalelo a muloo. Anka, eyibakishi dyoso di na yadyo myanda. Bi kumweka nka bu shi yaya myanda tangilombene kupwa, dingi mulume na mukashi be kumona shi tabe mu kipwano bu bibabadi kumpala.

² Su eyibakishi dyetu dyekala na myanda nsaa yoso, ta mbilombene kwi tukanyisha nya. Mwanda, kwikala na myanda takulesha shi eyibakishi ta ndyobelekye nya. Sunga bena dibaka be na myanda ikata, mbapete mushindo wa kulumbuula kipwano kyabo na kunyingisha eyibakishi dyabo. Mushindo kinyi?

3, 4. Nkinyi kilombene kukitshika ingi nsaa mwiyibakishi?

³ Eyibakishi ndibungye bantu babidi belekene, mu binangu, kipaso kya kukita myanda, na oso a kwabadi e na myanda y’akumiinaa na yash’akuminaa. Dingi, mbatuukile mu ma mbalo na bipikwa bilekene. Abitungu mafuku e bungi bwa shi mulume na mukashi beukene na kwipushena kalolo.

 ⁴ Mwenda mafuku, muntu na muntu mulombene kubanga kutala penda myanda yaye, nka bu shi mbashale muntu kwaye muntu kwaye. Nkinyi kilombene kwibakwasha bwabadya kwikala pamune?

5. (a) Nkinyi kilombene kukwasha mwina Kidishitu bwa kwikala pamune na mwina dibaka naye? (b) Muyile Beena-Ebelu 13:4, mbikunyi abitungu shi tumone eyibakishi?

⁵ Yehowa kwete kutusha malango akile buwa alombene kwinukwasha bwanudya kwikala pamune. (Misambo 25:4; Yeeshaya 48:17, 18) Etulungula shi: “Bantu booso banemekye bulunda.” (Beena-Ebelu 13:4) Kintu kyonemeka we kyataa na muulo ukata. We kikalwilaa na twekimonaa bu kya bisumanga nya. Nyi abikumina Yehowa shi twikale atumono eyibakishi.

6. Mukanda wa Mateo 19:4-6 awitulungula kinyi pabitale mweneno a Yehowa bwa eyibakishi?

⁶ Yehowa nyi bakitshine eyibakishi dya kumpala. Mwan’aye Yesu bambile shi: ‘Anwe tanwibabadikye’shi, yawa bebapangile kubanga ku kibangilo bebapangile mulume na mukashi, na nkwakula’shi: ‘Ngi bwa kinyi mulume akaleka nshaye na nyin’aye, n’akalamate kwi mukashi aaye; na abo babidi abakeekala mbidi imunenka’? Biabia, abo tabebubidi nya, anka be mbidi imunenka. Biabia kiakia kibuungye Efile Mukulu, muntu tekilamuunanga nya.’ (Mateo 19:4-6) Kubanga nka ku mbangilo, Yehowa bakuminyine shi eyibakishi dikale kwanka bwa looso. Bakuminanga dingi shi bifuko bikale mu kwipushena na kwikala na muloo mu nshalelo.

7. Beyibakishene mbalombene kunyingisha eyibakishi dyabo naminyi?

⁷ Lelo uno bantu beyibakishene bakwete ku fumankana na twinyongoshi twi bungi. Ingi nsaa nkalakashi i kwikala bukopo mu kipaso kyayidi ilombene kubofusha beyibakishene na kwibatakula mu kunangushena shi, tambalombene kupaasha eyibakishi dyabo. Anka kupusha mweneno a Yehowa pabitale eyibakishi kwi kwitukwasha.—1 Yowano 5:3.

8, 9. (a) Nsaa kinyi ayitungu shi tulonde bukunkushi bwa Yehowa mwiyibakishi dyetu? (b) Mbikunyi byatudya kulesha shi eyibakishi dyetu dii na muulo?

⁸ Bukunkushi bwa Yehowa bwi kwanka bwa buwa bwetu. Nka bu byatumonanga, kwete kwitulanga shi: “Bulunda bwikale bunemekibwe.” (Beena-Ebelu 13:4; Mulungudi 5:4) Su twalonda bukunkushi bwa Yehowa sunga byekala bukopo, atupete bukwashi.—1 Beena-Tesalonika 1:3; Beena-Ebelu 6:10.

 ⁹ Tabibuwa twakula sunga kukita kintu kilombene kulwisha eyibakishi dyetu, mwanda tukwete kwidyata na muulo. Kadi abitungu tunyingishe kipwano kyetu na mwina dibaka netu. Mbikunyi byatudya kwibikita?

10, 11. (a) Mmyanda kinyi i bukopo ayisanganyibwa mu angi mabaka? (b) Bwakinyi mushindo wa twisamba na mwina dibaka netu wi na muulo?

¹⁰ Kwi mishindo i bungi ilombene muntu kukyengyesha mwina dibaka naye. Atuuku shi bena Kidishitu ta mbalombene kukupila bena dibaka nabo sunga kukita kintu kampanda bwa kwibakyengyesha ku mbidi. Anka, twi balombene kwibatapa na bishima. Bishima bi kwikala nka bu kapete. Ungi mwana mukashi bambile shi: “Mulume ande antapaa na bishima. Ne kukita bu’mi shi mukalakashwe, kadi, nsaa yoso kwete kungamba bishima abitapa bu: ‘we bushito bu ntentekwe!’ na ‘we mubulakane!’ abintapaa kwishimba.” Ungi mulume bambile shi mukashi aye amwishaa milongo na bishima, dingi amudikaa mashina. Bambile shi: “Bishima byakwete ku ndungula ntshi bya kwibyambuula na bukalanga nya. Nyi bwakinyi, nalukaa ku mudimo nsaa ikile bwa kupela kwisamba naye. Kwakwa ne biya pe ku nshibo.” Lelo uno bantu be bungi be na ngakwilo e bubi, a bu ntomboshi, a kukutwa kanemo, atapa bangi ku mashimba.

¹¹ Nsaa i mulume na mukashi abeambishena bishima bi bubi, bikwete kwibatapa malonda ku mashimba ashy’aapanda bukidi. Eyendo, Yehowa takumiina shi mulume na mukashi bekale byabya nya. Kadi, mbibofule bwa kutapa mwina dibaka nobe kwishimba kushi  kuuka. We kumona bu’be kwete kumukitshina myanda na kalolo, kadi aye kwete kupusha byabya su? Su mwanda okwete kwakula ukwete kutapa mwina dibaka nobe kwishimba, we kushintuula su?—Beena-Ngalatea 5:15; badika Beena-Efeso 4:31.

12. Nkinyi kilombene kulwisha kipwano kya mwina dibaka na Yehowa?

¹² Mushindo w’esamba na mwina dibaka nobe panudi munkatshi mwa bantu sunga pabupenka bwenu wi na muulo kwi Yehowa. (Badika 1 Mpyeele 3:7.) Mukanda wa Shake 1:26 awitutentekyesha shi: “Su muntu eamba shi ne muntw’Efile Mukulu, kushi kulama ludimi lwaye, . . . kwete kwidimba aye nabene, bwin’Efile bwaye mbwa bisumanga.”

13. Ungi mushindo kinyi ulombene mwina dibaka kutapa mwina dibaka naye kwishimba?

 ¹³ Kwi ingi myanda ayitungu shi bantu beyibakishene badimukile. Bu kileshesho, we kupusha naminyi su mwina dibaka nobe babanga kukisha nsaa i bungi na ungi muntu? Sunga byekala bwa kabingilo ke buwa bu, kwenda mu bulungudi sunga kumukwasha ku mwanda kampanda, bi kukalakasha mwina dibaka nobe su? Ungi mukwetu mukashi bambile shi: “Kumona shi mulume ande kwete kupasukila ungi mukwetu mukashi na kukisha nsaa i bungi naye, akuntapaa kwishimba. N’emonaa bu’mi mushadile.”

14. (a) Mbya binyibinyi kinyi byatulongyela mu mukanda wa Kibangilo 2:24? (b) Ndukonko kinyi alutungu shi twiyipushe?

¹⁴ Bu byatudi bena Kidishitu, twi na bushito bwa kupasukila baledi betu na bakwetu ba mu kakongye. Anka, nsaa yatwibakila, muntu atudya kupasukila ngofu, mmulume sunga mukashi eetu. Yehowa bambile shi mulume “akalamata kwi mukashi aaye.” (Kibangilo 2:24) Abipusha mwin’eyibakishi n’etu nyi bi na muulo ukata kwatudi. Eyipushe shi: ‘Nkwete kukisha nsaa i bungi na mwina dibaka nami, kumupasukila na kumulesha kifulo kyadi nakyo lukalo?’

15. Bwakinyi t’abitungu shi mwina Kidishitu mwibakile ekala pepi pepi na muntu shi mulume sunga mukashi aaye?

¹⁵ Su twakamba kwikala pepi pepi na ungi muntu shi mwina dibaka netu, mbilombene kufwisha twinyongoshi mwiyibakishi dyetu. Twi balombene kulamata muntu shi mwina dibaka netu na kubanga kumufula. (Mateo 5:28) Byabya binangu mbilombene kutama na nkutakula bwa kukita kintu kampanda kilombene kulwisha eyibakishi dyobe.

16. Bible mwele mwiya kinyi pabitale eyibakishi?

¹⁶ Kunyima kwa kwamba shi: “Bulunda bwikale bunemekiibwe,” Bible akula shi: “Lusala [lwa beyibakisheene] lwikale lushalulwishiibwa; anka Efile Mukulu akatshibila baasha lukyebanokyebano na beena lusandji kiimu.” (Beena-Ebelu 13:4) Pano, “lusala [lwa beyibakisheene]” alulesha kwifikena kwa mulume na mukashi. (Nkindji 5:18) Mbikunyi byatudya kulesha kanemo bwa kwakwa kwifikena na kupela kwikulwisha?

17. (a) Bantu be bungi lelo uno abamonaa kutambuka lusandji naminyi? (b) Mbikunyi abitungu bena Kidishitu bamone kutambuka lusandji?

¹⁷ Bangi bantu lelo uno abamonaa shi kukutwa lulamato kwi mwina dibaka naye, ta mwanda wi bubi nya. T’abitungu tutadiile byabya binangu bwa shi bitwele mwatudi nya. Yehowa muleshe patoka shi mmushikwe kutambuka lusandji. (Badika Beena-Looma 12:9; Beena-Ebelu 10:31; 12:29) Su twefikena pepi na muntu shii mwina dibaka netu, atulwisha eyibakishi dyetu. Atulesha shi tatukwete kunemeka miiya ya Yehowa, dingi atulwisha kipwano kyetu naye. Byabya, abitungu tusuukye myanda ilombene kwitufisha mu kutambuka lusandji. Bino abilesha kupela kwelela muntu shii mwina dibaka netu binangu bi bubi.—Yoobo 31:1

18. (a) Bwakinyi kutambuka lusangi kwi bu lulangwilo lwa b’efile ba madimi? (b) Yehowa amonaa kutambuka lusandji naminyi?

¹⁸ Mu Isaleele a kala mu Mwiya wa Moyiise, kutambuka lusandji kubaadi mulwisho ukile bukata anka bu kulangwila kwa b’efile ba madimi. Dinyooka dya byoso dibaadi dya lufu. (Beena-Levi 20:2, 10) Kutambuka kwa lusandji kubaadi bu kulangwila b’efile ba madimi  naminyi? Su mwina Isaleele alangwila b’efile ba madimi, baadi atshibi mutshipo waye wa kushaala mulamate kwi Yehowa. Su batambuka lusandji, batshibi mutshipo waye wa kushaala mulamate kwi mwina dibaka naye. (Efilu 19:5, 6; Miiya Ikituulwe 5:9; badika Malaki 2:14.) Eyendo, kala, Yehowa baadi amono kutambuka lusandji bu mulwisho ukile bukata.

19. Nkinyi kilombene kwitukwasha bwa kwata kitshibilo kya kupela kutambuka lusandji?

¹⁹ Kadi lelo uno? Sunga shi tatukii dingi mu Mwiya wa Moyiise, mweneno a Yehowa pabitale kutambuka lusandji ta mwalulukye nya. Anka bu byatushii balombene kulangwila efile a madimi, tatwi balombene kukutwa lulamato kwi mwina dibaka netu. (Misambo 51:1, 4; Beena-Kolose 3:5) Su twebikita, atusabulusha dibaka dyetu mpa na Efile eetu, Yehowa.—Tala Mayi a ku nfudilo 26..

20. Mbikunyi bilombeene binangu kwikala na bukwashi mu dibaka?

²⁰ Mbikunyi byodi mulombene kunyingisha dibaka dyobe? Bible aleesha shi: “Na binangu, muntu mmulombene kwibaka nshibo, eeyinyingisha na kapatupatu.” (Nkindji 24:3) Nshibo ngilombene kwikala mashika na i bisumanga, inyingye na ilamibwe kalolo. Bi mumune na eyibakishi. Abitungu muntu sha binangu ashinkamishe shi dibaka dyaye ndilamibwe kalolo na dii na muloo.

21. Kiukilo nkilombene kunyingisha kifuko naminyi?

²¹ Bible akula pabitale nshibo shi: “Na kupatuluka ee kuusha tudimbo twayo na bintu bya muulo ukata na bilongame, bya bipaso byooso.” (Nkindji 24:4) By’olongo Mwiyi dy’Efile Mukulu bi kulumbuula eyibakishi dyobe.  (Beena-Looma 12:2; Beena-Fidipe 1:9) Nsaa yanubadika Bible na mikanda yeetu pamune na mukashi sunga mulume oobe, esambileyi byanudya kufubila byabya byanubadika. Kimbayi kipaso kyanudya kwileshena kifulo, kwinemekyeshena kwileshena kalolo na kwikwashena. Tekayi Yehowa bwa shi enukwashe nutamishe ngikashi ilombene kunyingisha eyibakishi dyenu na bwa shi nwifulene ngofu.—Nkindji 15:16, 17; 1 Mpyeele 1:7.

22. Bwakinyi abitungu kwileshena kifulo na kanemo na mwina dibaka netu?

²² Abitungu tukite mwetu mooso bwa kufula mwina dibaka netu na kumupa kanemo. Byabya, bulunda bwetu tabwikala mashika nya abwikala bunyingye. Kii na muulo ukata, atusangasha Yehowa.—Misambo 147:11; Beena-Looma 12:10.