1. Nkinyi akitungu tukite bwa kushinkamisha shi lulangwilo lwetu alusankisha Yehowa na bwa kinyi?

YESU bambile shi: ‘Balangwidi b’eyendo abakalangwila Yaya mu kikudi na mwiyendo; mwanda namu Yaya akimbi [balangwidi] be biabia bwa kumulangwila.’ (Yowano 4:23; 6:44, Kilombeeno kipya 2014) Abitungu oso a kwatudi ‘atungunukye na kukimba bya kushingûla byabya abisangasha Nfumu.’ (Beena-Efeso 5:10, EEM.) Bino ta mbibofule nya. Satana kwete kwitudimba bwa shi tatukitanga myanda ayisangasha Yehowa.—Kibafumbwilwe 12:9.

2. Patuula kibaadi kikitshikye pepi na Mwengye wa Sinayi.

² Satana kwete kukimba kwitulubisha naminyi? Kwete kwitubulakasha pabitale ki buwa na ki bubi. Tala kibaadi kikitshikile mwilo wa Isaleele paubaadi ushale pepi na Mwengye wa Sinayi. Moyise bakamine ku mwengye, mwilo ubaadi aumutengyela. Anka, bena Isaleele abaadi bakookye kutengyela na abatekyele Aarone bwa kwibakitshina efile. Aye nkupwa nkishi a òolo e bu kaana ka ngombe. Ndjo mwilo nkubanga musangelo. Ababangile kusha befunyanga kana ka ngombe na kwikakunamina. Abaadi abamono shi nsaa y’abakunamina kaana ka ngombe, bakwete kulangwila Yehowa.  Sunga shi mwilo ubaadi awamba shi nyi “musangelo bwa Yehowa,” byabya tabibaadi biwikashe bu wi buwa nya. Yehowa bebimwene shi ndulangwilo lwa mankishi, na bebungi ba kwabadi abafwile. (Efilu 32:1-6, 10, 28) Bino abitulongyesha kinyi? Tatudimbikwanga. ‘Tatukumanga ku bintu bi [butete],’ na tulekye Yehowa etulongyeshe ki buwa na ki bubi.—Yeeshaya 52:11; Esekyele 44:23; Beena-Ngalatea 5:9.

3, 4. Bwakinyi bi buwa shi tutaluule nsulo ya misangelo?

³ Pabaadi Yesu pa nsenga, balongyeshe batumibwa bwabadya kuleka kileshesho ki buwa pabitale lulangwilo lwi selele. Kunyima kwa lufu lwaye, batumibwa abatungunukile na kulongyesha balongi bapya miiya ya Yehowa. Kadi kunyima kwa lufu lwa batumibwa, balongyeshi ba madimi ababangile kutwesha myanda i bubi, bipikwa na misangelo ya ba mpangano mu kakongye. Abaadi mpa na bape ingi ya ku yaya misangelo mashina, bwa shi imwekye bu ya bena Kidishitu. (2 Beena-Tesalonika 2:7, 10; 2 Yowano 6, 7) Bantu bebungi lelo uno bakwete kukita ingi ya ku yaya misangelo, na kukwatshishena malongyesha a madimi, na ba demo. *—Kibafumbwilwe 18:2-4, 23.

⁴ Lelo uno mu nsenga ishima, bantu bakwete kwata misangelo na muulo ukata mu nshalelo abo. Byabya, su otungunuka na kulonga bi mmweneno a Yehowa pabitale yaya misangelo, we kumona shi abitungu kulumbula mweneno obe pabitale ingi ya ku yanka. Bino ta mbibofule nya, anka uuka shi Yehowa e nkukwasha. Tubande kutaluula kutuukile ingi ya ku ino misangelo bwatudya kumona abipushaa Yehowa bwayo.

5. Mbishinkamisho kinyi abilesha shi Yesu ta mmutandjikwe mu 25 a mweshi w’ekumi na wa Kabidi?

⁵ Mu ma mbalo e bungi, bantu abakitaa musangelo wa Nowele mwifuku dya 25, mweshi w’ekumi na wa Kabidi, efuku dyabapwandjikishaa shi, ndjo dibatandjikilwe Yesu. Bible t’etulungula efuku sunga mweshi ubadi Yesu mutandjikwe nya, anka etulungula pabitale kipungo kampanda kya ku kipwa. Luka bafundjile shi, pabadi Yesu mutandjikwe mu Beteleme, “balami ba mikooko babaadi bashaale mu mapya” abalama nyema yabo. (Luka 2:8-11) Mu mweshi w’Ekumi na wakabidi, mu Beteleme amwikalaa mashika, mpeshi na milemba, byabya, balami ba mikooko tababaadi balombene kushala pasha bufuku na mikooko yabo nya. Uno mwanda awitulongyesha kinyi? Pabatandjikilwe Yesu, takubaadi mashika e bungi, ta mu mweshi w’ekumi na wa Kabidi nya. Bible na bingi bishinkamiisho bya myanda ya kala abileesha shi, Yesu baadi mutandjikwe pangi mu mweshi wa Kitema sunga w’Ekumi.

6, 7. (a) Bipikwa bya musangelo wa Nowele bibabangile naminyi? (b) Atupeyaa bangi ma kado na kabingilo kinyi?

⁶ Byabya, Nowele babangile naminyi? Mmutuukile ku misangelo ya ba mpangano, bu musangelo wa mu Looma wa Saturnales ubabadi abakitshiina Saturne, efile a ba kidime. Ungi mukanda wa The Encyclopedia Americana auleesha shi: “Saturnales, sunga musangelo wa madyo a beena Looma, ubabadi abakitshi munkatshi mwa mweshi w’ekumi na wa Kabidi, nyi baadi mutuushe bipikwa bi bungi bya mu Nowele. Bu kileshesho, ku uno musangelo, abaadi abateekye kidiibwa ki buwa, kwipeshena ma kado, na kutembesha ma buji.” Na dingi, efuku dya kutandjikwa kwa Mithra efile-nguba a beena Perse, abaadi abedisangela mu 25 mweshi w’ekumi na wa Kabidi.

 ⁷ Kadi, bantu be bungi abasangela Nowele lelo uno, t’abauku shi mmutuukile ku bipikwa bya ba mpangano nya. Abatala nka penda ku miloo ya Nowele bu nsaa ya kwibunga na kifuko, kudya pamune, na kwipesheena ma kado. Eyendo shi twibafule bifuko byetu na ba kuuku betu, na Yehowa akumiina shi bafubi baye bakishe nsaa pamune. Anka bu abitulungula mukanda wa 2 Beena-Kodinda 9:7, “Efile Mukulu mmufule apaana na mulòo.” Yehowa t’akumina shi twipesheene bintu nka mu kipungo kampanda nya. Bafubi ba Yehowa abasangelaa  kwipesheena ma kado na kusanka pamune na ba kuuku, na bifuko byabo nsaa yoso yabakumiina, kushi kutengyela shi bebalwishe kintu. Abepeshena mwanda mbefulene.—Luka 14:12-14.

8. Bantu abaadi abele lubuko lwa nyenyenyi abapeele Yesu ma kado pabaadi mwana tooka su? Patuula.

⁸ Bwa kukwatshishena binangu byabo bya kupa bantu ma kado mu Nowele, bantu bebungi abambaa shi, basha binangu basatu abatwadiile Yesu ma kado mu kikutu pabaadi ki mwana tooka. Eyendo shi baaba bantu abayile mu kutala Yesu na babamutwadile ma kado. Kala, bantu abaadi na kipikwa kya kutwadila bantu babataa na muulo ma kado. (1 Banfumu 10:1, 2, 10, 13) Kadi ouku shi Bible amba shi, baaba bantu abaadi abele lubuko lwa nyenyenyi na tababaadi abalangwila Yehowa? Dingi, tababaadi bende mu kumona Yesu pabaadi kii tooka mu kikutu nya, Yesu tabaadi “mwana mukinga,” na abaadi naye mu nshibo.—Mateo 2:1, 2, 11.

9. Mmisangelo kinyi ya kutandjikwa yabadi batemune mu Bible?

⁹ Efuku aditandjikwa mwana adikalaa efuku dya muloo. (Misambo 127:3) Kadi byabya tabilesha shi abitungu tusangele efuku dya kutandjikwa nya. Banda kunangushena: Mu Bible mbatemune misangelo ya kutandjikwa penda ibidi. Umune ngwa kutandjikwa kwa Faraone mwina Ejiipitu, ungi ngwa kutandjikwa kwa Nfumu Eroode Antipase. (Badika Kibangilo 40:20-22; Maako 6:21-29.) Bano bantu boso babidi tababaadi bafubi ba Yehowa nya. Byabya, kasha tatwabadikile mu Bible shi, kwi mufubi a Yehowa baadi musangeele efuku dya kutandjikwa kwaye.

10. Mbikunyi bibaadi bena Kidishitu ba kumpala abamono musangelo w’efuku dya kutandjikwa?

 ¹⁰ Mukanda wa The World Book Encyclopedia awamba shi bena Kidishitu ba kumpala “abaadi abamono kusepela efuku dya kutandjikwa kwa muntu ese yawa bu kipikwa kya ba mpangano.” Kyakya kipikwa kibadi akitukila ku nkumiino ya madimi. Bu kileshesho, bena Greeke ba kala abaadi abakumiina shi muntu ese ekala na kikudi akimulamaa, kibaadi panka efuku dya kutandjikwa kwaye. Dingi abaadi abanangushena shi, kyakya kikudi ki mu kwipushena n’efile kampanda baadi mutandikwe efuku dimune na yawa muntu. Kukatusha aa malongyesha a madimi, mafuku a kutandjikwa e mu kwipushena na lubuko lwabakitaa na nyenyenyi na horoscope.

11. Yehowa apushaa naminyi pabitale kupaana kwetu?

¹¹ Bwa bantu bebungi, efuku dya kutandjikwa kwabo nyi efuku dikata, dyabakumiina kwipusha shi, mbebakumiine na kwibafula. Kadi, pamutwe pa kulesha bena kifuko na ba kuuku betu kifulo nka mwifuku kampanda di pabwadyo, abitungu twibaleshe kyanka efuku dyoso. Yehowa akumiina shi twikale atupaana na kulesha bantu kalolo nsaa yoso. (Badika Bikitshino 20:35.) Twi na lutumbu lukata kwadi bwa kyabuntu kya muwa watudi nao efuku dyoso, kushi penda efuku dya kutandjikwa.—Misambo 8:3, 4; 36:9.

12. Efuku dyetu dya lufu di buwa kukila efuku dya kutandjikwa kwetu naminyi?

¹² Mulungudi 7:1 amba shi: “Kwikala na nkumo i buwa nkukile kwishinga kwa malashi. Efuku dya kufwa namu ndjikile dya kutandjîbwa.” Efuku dya lufu lwetu di buwa kukila efuku dya kutandjikwa naminyi? Patutandjikwa, tatwi babande kukita kintu ki buwa sunga  ki bubi mu muwa wetu. Kadi, nsaa yatwipana bwa kufubila Yehowa na kukitshina bangi bi buwa, atwikala na “nkumo ibuwa,” sunga eshina di buwa, paapa, sunga twafwa Yehowa aketutentekyesha. (Yoobo 14:14, 15) Bafubi ba Yehowa tabakitaa musangelo wa kutandjikwa kwabo sunga kwa Yesu. Anka, kintu kimune kyabadi betutekye bwa kukita kwi Yesu, nyi mpenda Kitentekyesho kya lufu lwaye.—Luka 22:17-20; Beena-Ebelu 1:3, 4.

13, 14. Musangelo wa Pasaka ngwipushene na kinyi?

¹³ Bantu be bungi abambaa shi nsaa y’abasangela Pasaka bakwete kusangela kusanguka kwa Yesu. Aku namu, musangelo wa Pasaka ngwipushene na Éostre, efile a namashika na a printemps a bena Anglo-Saxon. Mukanda wa The Dictionary of Mythology aulesha shi, nyi efile a kutanda. Bingi bipikwa bya Pasaka, mbipushene na yaya myanda. Bu kileshesho, mukanda wa the Encyclopædia Britannica awamba shi, mayi “abaadi na muulo ukata bu kifwanyi kya muwa upya na lusangukilo.” Abaadi dingi abafubisha tululu twa pasha ngofu bu kifwanyi kya kutanda, mu lulangwilo lwa ba mpangano. Abipushika kalolo shi Pasaka ta mutale lusangukilo lwa Yesu nya.

¹⁴ Nsaa ikale Yehowa amono bantu abasangakana bipikwa bya mu lulangwilo lwa madimi na lusangukilo lwa Mwan’aye, asangala su? Nya. (2 Beena-Kodinda 6:17, 18) Byabya, Yehowa tetutekaa bwa kusangela lusangukilo lwa Yesu nya.

15. Bwakinyi fete a bunane te buwa bwa bafubi b’Efile Mukulu?

¹⁵ Mu bipikwa bya kala bya ba mpangano mwi ma fete a bunane sunga kipwa kipya. Efuku na myanda ayikitaa bantu mu ma fete a Bunane mbilekene muyile eumbo n’eumbo. Ungi mukanda wa (Standard Dictionary of Folklore, Mythology, and Legend) aulesha shi: “Mu maumbo ebungi a ku Mputu abasangelaa kukila kwa kipwa na kufika kwa kipwa kipya na ma fete akata, kutoma kwa malwa ebungi, na misango i bungi abakitaa myanda ya bufu.” Wawa mukanda umune aulesha shi mu angi maumbo namu “abamonaa kupwa kwa  kipwa na kubanga kwa kingi bu nsaa ya muloo.” Kadi, mu Beena-Looma 13:13 atupete dino elango: “Twikaleeyi na bwikashi bwibuwa, bu bantu be mwitaata, kushii budyedye sunga buntomi, kushi lukyebanokyebano sunga miloo i bubi, kushi tulee sunga mikao.”—1 Mpyeele 4:3, 4; Beena-Galate 5:19-21.

16, 17. Myanda kinyi ayitungu tutaluule nsaa yatulumbuula musangelo w’eyibakishi?

¹⁶ Nsaa ya musangelo w’eyibakishi nyi nkipindji kya muloo. Mu nsenga ishima bantu abasangelaa eyibakishi mu mishindo ilekene. Bantu bebungi tabauku kutuukile bipikwa bya kusangela eyibakishi, byabya tabauku shi bingi bipikwa mbitukile ku nkumino ya ba mpangano nya. Anka, abitungu bena Kidishitu abelumbuula bwa kukita musangelo w’eyibakishi, bekale bashinkamishe shi ausangasha Yehowa. Su bauka kutukile bipikwa bya misangelo ya mabaka, mbalombene kwiuka bya kwata bitshibilo bi buwa.—Maako 10:6-9.

¹⁷ Bingi bipikwa bya musangelo w’eyibakishi bi kwanka bwa kwabikisha baaba abeyibakishena “myabi”. (Yeeshaya 65:11) Bu kileshesho, mu angi ma mbalo bantu abamyaminaa mupunga sunga bingi bintu kwi mukashi sunga mulume. Abamba shi byabya abikebapa bana, muloo, na kushala mafuku e bungi na shi abikebakalwila ku bubi. Kadi bena Kidishitu abekala badimukye bwa kusuka bipikwa byoso bipushene na lulangwilo lwa madimi.—Badika 2 Beena-Kodinda 6:14-18.

18. Angi mayi kinyi akulonda a mu Bible aakwila pabitale eyibakishi?

¹⁸ Mulume na mukashi bena Kidishitu abakumina  shi, musangelo w’eyibakishi dyabo wikale nsaa ya muloo na wibape kinemo, na usankishe bantu boso abekufiki. Tabitungu shi bantu betaminyibwe ku musangelo w’eyibakishi dya bena Kidishitu bakule myanda i bubi, i bufu, sunga kukutwa kanemo kwi mulume, mukashi sunga kwi bangi bantu. (Nkindji 26:18, 19; Luka 6:31; 10:27) Ku musangelo w’eyibakishi dya bena Kidishitu ta nkwa ‘kulesha bintu byabadi nabyo na kwitatula’ nya. (1 Yowano 2:16) Su okwete kwilumbuula bwa kukita musangelo w’eyibakishi, uuka shi wekala na muloo wa kutentekyesha bibaadi bikidikye musangelo w’eyibakishi dyobe.—Tala Mayi a ku nfudilo 28.

19, 20. Nkunyi kutukile kipikwa kya kwikookoshena bilawudi?

¹⁹ Kingi kintu akikita bantu bebungi kwiyibakishi sunga ku ingi misangelo, nkwikookoshena bilawudi. P’abekookoshena bilawudi, muntu umune akula bishima bya kwabikishena myabi pe bangi bakwete kwibwesha byabo bilawudi mwiyilu. Mmweneno kinyi mulombene kwikala naye bena Kidishitu pabitale kwikookoshena bilawudi?

²⁰ Mukanda wa The International Handbook on Alcohol and Culture awamba shi, kwikookoshena bilawudi akufiki pangi ku kipikwa kya ba mpangano ba kala “abaadi abalambula b’efile bintu bya kishila bisungulukye.” Abadi abakitshi byanka “pabeyeleshena myabi, pabatekye mu kikoso na bishima abipatula: ‘tofu bukidi!’ Sunga shi ‘ikala na mbidi bukome!’” Mu mafuku a kala bantu abadi abele makopo abo mwiyilu bwa kuteka myabi kwi efile. Kadi Yehowa telelaa bantu myabi mu kyakya kipaso nya.—Yowano 14:6; 16:23.

21. Ingi misangelo kinyi ayitungu shi bena Kidishitu basukye?

²¹ Nsaa ywata kitshibilo kya kwenda sunga kupela kwenda ku musangelo kampanda, nangushena pabitale mwikelo na bikitshino byaukwatshishena. Bu kileshesho, kwi ku ingi misangelo kwabashiya masha e bubi, kukolwa maalwa, mpa nka na kutambuka masandji. Mu yaya misangelo mwi kutuka dingi bantu abakwatshishena eyibakishi dya balume na balume na bakashi na bakashi sunga ntondo y’eumbo. Su twapetekyelwa mu ino misangelo, twikulesha shi twi bashikwe binyibinyi kyakya kyabadi bashikwe kwi Yehowa su?—Misambo 1:1, 2; 97:10; 119:37.

22. Nkinyi kilombene kukwasha mwina Kidishitu bwa kwata kitshibilo su akumina kwenda ku musangelo?

²² Abitungi bena kidishitu bekale badimukye bwa badya kusuka misangelo ishaipa Efile kinemo. Mpoolo mutumibwa bafundjile shi: “Byabya, sunga nwadya sunga nwatoma, sunga nwakita kinyi, kitaayi byoso bwa ntumbo y’Efile Mukulu.” (1 Beena-Kodinda 10:31; tala Mayi a ku nfudilo 29.) Eyendo, ta mmisangelo yoso i mu kwipushena na myanda i butete na lulangwilo lwa madimi sunga ntondo y’ekoba nya. Su musangelo tautupilwa mayi a kulonda a mu Bible, twi kwata kitshibilo atwe banabene su atwikwende sunga kukutwa kwikwenda. Twikutaluula dingi bilombene kupusha bangi bwa kyakya kitshibilo.

23, 24. Mbikunyi byatudi balombene kupatulwila bena kifuko netu bashi Batemwe pabitale kitshibilo kyetu bwa ingi misangelo?

²³ Pangi wemupwe kupela kwenda ku misangelo ishayipa Yehowa kanemo. Kadi bangi ba mu kifuko kyobe bashi ba Temwe ba Yehowa be kwela binangu shi, twemwibafule  sunga shi tokumiina kwikala dingi nabo. Be kumona shi nka penda mafuku a misangelo nyi alombene bena kifuko kushala pamune. Byabya, we kukita kinyi? Kwi mishindo i bungi yodi mulombene kwibalesha shi we mwibafule na shi webataa na muulo. (Nkindji 11:25; Mulungudi 3:12, 13) We kwibetanyina bwa kukisha nabo nsaa pamune mu bingi bipungo.

²⁴ Su bena kifuko kyenu abakyebe kuuka bwakinyi tokumiina ingi misangelo, we kutaluula myanda i mu mikanda na mu jw.org ilombene nkukwasha bwa kwibapatulwila. Tokimbanga bya kwibalesha shi okwete kwibingisha sunga kwibatakula bwa shi banangushene bu’be. Kwasha bena kifuko kyenu baukye shi, bodi mutaluule myanda i bungi, obe nkwata kitshibilo. Shala mumiine, na “Eyi dyenu diikale misuusa yoso mu [kikudi] kya buntu, ditobiibwe mungwa.”—Beena-Kolose 4:6 Esambi dipya.

25, 26. Ba nambutwile be kukwasha bana babo bwa kufula miiya ya Yehowa naminyi?

²⁵ Bi na muulo ukata bwa shi atwe boso tupushe kalolo bwakinyi tatukumiinaa kwenda ku ingi misangelo. (Beena-Ebelu 5:14) Kepatshila nka kusangasha Yehowa. Na su twi baledi, abitungu twate nsaa ya kukwasha bana betu, bwa kupusha na kufula mayi a kulonda a mu Bible. Su babanga kumona Yehowa bu muntu a binyibinyi, abakumiina kumusankisha.—Yeeshaya 48:17, 18; 1 Mpyeele 3:15.

²⁶ Yehowa ekala na muloo wa kwitumona atwitatshisha bwa kumulangwila mu kipaso ki selele na kilulame. (Yowano 4:23) Anka bantu bebungi abapwandjikisha shi ta kwi muntu mulombene kwikala mululame mu uno ndumbulwilo mukutwe kululama. Nkya binyi su? Atutaluula wawa mwanda mu shapitre alondo.