1, 2. Twi kukita kinyi bwa kushaala mu kifulo ky’Efile Mukulu?

ATWE boso atukuminaa kwikala na bukome bwa mbidi. Nyi bwakinyi atudiyaa bidibwa bi buwa, atukitaa kalashishi, na kukalwila mbidi yetu. Sunga shi abitungu kwitatshisha, bipeta abituku abitusankisha, nyi bwakinyi t’atukooko nya. Kadi twi na lukalo dingi lwa kwikala na bukome bwa mbidi mu ungi mushindo.

² Sunga shi twibakite bi buwa p’atwe kwiuka Yehowa, abitungu tutungunukye na kunyingisha kipwano kyetu naye. Pabaadi Yunda munyingishe bena Kidishitu bwa ‘kwilama mu kifulo ky’Efile Mukulu,’ bapatulwile bibabadi balombene kwibikita. Bebalungwile shi: ‘Ekankamisheneeyi anwe banabene pa lukumiino lwenu lwi selele.’ (Yunda 20, 21) Byabya, mbikunyi byatudya kunyingisha lukumiino?

3-5. (a) Satana akumina shi omone Miiya ya Yehowa naminyi? (b) Opusha naminyi pabitale miiya na mayi a kulonda a Yehowa?

³ Bi na muulo bodya kwikala mushinkamishe shi mashinda a Yehowa e buwa bukile. Satana akyebe omone shi kutumikila miiya y’Efile Mukulu kwi bukopo na shi, wekala  na muloo su obe nabene osangula ki buwa na ki bubi. Kubanga nka mu lupango lwa Edene, Satana batakwile bantu bwa shi bakumine byabya. (Kibangilo 3:1-6) Na dingi kyatungunuka mpa na lelo.

⁴ Satana e na kabingilo su? Miiya ya Yehowa ngikile bukopo su? Nya. Bu kileshesho, banda kunangushena shi okwete kutambuka mu parke e buwa. Bomono lupango lwi bula ngofu lushikiile mbalo kampanda. Pangi we kwiyipusha shi, ‘Bwakinyi luno lupango lubanshikiila mwishinda?’ Kadi yaya nsaa, bopusha ntambwe kwete kukungula abwa busambu bwa lupango. We kupusha naminyi bwa lwalwa lupango? Wekala na lutumbu mwanda lubakukalwila ku ntambwe! Mayi a kulonda a Yehowa ngekale nka bu lwalwa lupango, Diabulu namu e nka bu ntambwe. Eyi dy’Efile Mukulu aditudimusha shi: “Edingyeyi, nupasukye: mulwiishi n’eenu, diabulu, kwete kwinwifuunya, bu ntambwe akuumbu, akiimbi muntu adia kudya.”—1 Mpyeele 5:8, Kilombeeno kipya 2014.

⁵ Yehowa akumina twikale na nshalelo e buwa. T’akumina shi tudimbikwe na Satana nya. Nyi bwakinyi mmwitupe miiya na mayi a kulonda bwa kwitukalwila na kwitwikasha na muloo. (Beena-Efeso 6:11) Shake bafundile shi: “Anka yawa namu batala mu mwiiya upwidikye, wiinyi wa bulungantu, na bashimatshiila [mwanka] . . . yawa akeekala sha muloo mu kukita kwaye.”—Shake 1:25, Kilombeeno kipya 2014.

6. Mbikunyi byatudya kushinkamisha shi mashinda a Efile Mukulu e buwa?

⁶ P’atulondo buludiki bwa Yehowa, nshaleelo etu alumbuluka na dingi kipwano kyetu naye akitama. Bu kileshesho atupete bukwashi nsaa y’atukumina ku muteka nsaa na nsaa. (Mateo 6:5-8; 1 Beena-Tesalonika 5: 17) Atwikala na muloo nsaa y’atukookyela buludiki bwaye patwibungu bwa ku mulangwila, patwikankamishena, na nsaa yatukitshi mudimo wetu wa bulungudi na wa kulongyesha. (Mateo 28:19, 20; Beena-Ngalatea 6:2; Beena-Ebelu 10:24, 25) P’atunangushena pabitale bitukwashe ino myanda bwa kulama lukumiino lwetu lunyingye, atushinkamisha shi mashinda a Yehowa e buwa.

7, 8. Nkinyi kya kwitukwasha bwa kupela kutshina bitompwanga bi kwitufwila mu mafuku e kumpala?

⁷ Pangi twi kutshina shi mu mafuku aafiki lukumiino lwetu alukapete bitompwanga bi bukopo. Su okwete kupusha byabya, tentekyesha eyi dya Yehowa adyamba shi: “Nnami Yehowa Efil’enu, enulambukishâ myanda ya kwinwikasha bi buwa na kwinukunkusha mwishinda  dyanudya kutambukila. Ai babô! Su nubadya kutê matwi ku mikamiko yande! Nubadya kwikala na kufukama kwa loso kwi bu mwela ashyaukamâ, kuîdidîla mu kukita kwa bi buwa nka bu ntanki ya kalunga ka mema ishyaitshibikâ kwikupila ku kyêse.”—Yeeshaya 48:17, 18, EEM.

⁸ Nsaa y’atukookyela Yehowa, butaale bwetu abwikala nka bu mwela ushi ulombene kukama, kululama kwetu akwikala nka bu ntanki ya kalunga ayikupila nsaa yoso ku kyêse. Sunga twafumankana na mwanda kinyi mu nshalelo etu, twi kushala na lulamato. Bible amba shi: “Tentwila bushito bwobe kwi Yehowa, aye akunyingisha; sunga byaa-naminyi taakuleka mululame esheete.”—Misambo 55:23.

9, 10. Kwenda na kukula akupatuula kinyi?

⁹ Su onyingisha kipano kyobe na Yehowa, okyebe ‘[kwenda] na kukula.’ (Beena-Ebelu 6:1, Kilombeeno kipya 2014) Kwenda na kukula akupatuula kinyi?

¹⁰ Kukula ku mbidi t’akulesha shi tubakulu mu kikudi nya. Bwa kukula mu kikudi, abitungu twikashe Yehowa bu Kuuku eetu e buwa na kwitatshisha bwa kwikala na mweneno a myanda bu aaye. (Yowano 4:23) Mpoolo bafundjile shi: “Mwanda bee kumatalwa a mbidi, abalondo bya ku mbidi, bee ku matalwa a kikudi naamu, abalondo bya mu kikudi.” (Beena-Looma 8:5) Muntu mupwe kukula t’epaana nka ku miloo sunga mu kukimba bintu bya ku mbidi nya. Kadi, epanaa mu kufubila Yehowa na kwata bitshibilo na binangu. (Nkindji 27:11; badika Shake 1:2, 3.) T’elekyelaa ku bukitshishi bwa kukita myanda i bubi nya. Muntu mupwe kukula ashinguulaa kyakya ki buwa na kwata kitshibilo kya kwikikita.

11, 12. (a) Nkinyi kibakwile Mpoolo mutumibwa pabitale ngobesha ya mwina Kidishitu ya “kushinguula” myanda? (b) Kukula mu kikudi nkwikale nka bu kukita kalashishi naminyi?

 ¹¹ Abitungu kwitatshisha bwa kukula. Mpoolo mutumibwa bafundjile shi: “Bakulu namu abadiya kidibwa kinyingye, abo bapwe kuubidisha binangu byabo bwa kushinguula myanda i buwa na i bubi.” (Beena-Ebelu 5:14, NWT) Kishima “kuubidisha” ki kwitutakula mu kunangushena abikitaa muntu alongo kalashishi.

¹² Nsaa yatumono muntu auku kukita kalashishi kalolo, atwambaa shi mmwate nsaa ya kulonga bwa kuubila na kutamisha ngobesha yaye. Tamutandjikwe bu muntu akitaa kalashishi nya. Apatandjikwaa mwana taukaa byakufubisha maboko na mikoolo yaye kalolo nya. Kadi mwenda mafuku alongaa bya kukwata bintu na bya kutambuka. Mwenda kulonga, e kufika bu muntu akitaa kalashishi. Mu kipaso kimune, bwa kwikala mwina Kidishitu bapu kukula, abitungu kwata nsaa ya kulonga.

13. Nkinyi kilombene kwitukwasha bwa kulonga na kunangushena bu abinangushenaa Yehowa?

¹³ Mu uno mukanda tubataluula byatudya kunangushena bu abinangushenaa Yehowa na kumona myanda bu by’eyimonaa. Tubalongo bya kusangela na kufula miiya ya Yehowa. Nsaa y’atwata bitshibilo, twi kwiyipusha shi: ‘Mmiiya sunga mmayi kinyi akulonda a mu Bible andja kufubisha bwa uno mwanda? Mbikunyi byandji mulombene kwibifubisha? Yehowa akumina shi nkite kinyi?’—Badika Nkindji 3:5, 6; Shake 1:5.

14. Nkinyi akitungu shi tukite su atukumina kunyingisha lukumiino lwetu?

¹⁴ Tatulekanga kunyingisha lukumiino lwetu mwi Yehowa. Anka bu bikale kudya bidibwa bi buwa akwitukwasha bwa kwikala na mbidi bukome, kulonga pabitale Yehowa akwitukwasha bwa kunyingisha lukumiino lwetu.  Patubabangile kulonga Bible, tubalongyele bya binyibinyi bya mbangilo pabitale Yehowa na mashinda aaye. Byabya, bu bikwete kwenda na kukila mafuku, abitungu tukimbe bya kupusha myanda i bukopo. Ndjo bibaadi Mpoolo akyebe kwakula pabambile shi: “Bakulu namu abadiya kidibwa kinyingye.” P’atutumikila myanda yatulongo atupete binangu. Bible etulungula shi: “Kinangu kii na muulo ukata.”—Nkindji 4:5-7; 1 Mpyeele 2:2, nwt.

15. Kwikala na kifulo kya binyibinyi kwi Yehowa na kwi bakwetu bena Kidishitu kwi na muulo kinyi?

¹⁵ Muntu e kwikala na mbidi bukome, kadi bwadya kwikala nka byabya, abitungu atungunukye na kwiyikalwila. Mu kipaso kimune, muntu mupwe kukula auku shi abitungu etatshishe ngofu bwa kulama kipwano kyaye na Yehowa kinyingye. Mpoolo etutentekyesha shi: “Etaluuleeyi anwe baanabeene, talaayi su nwi mu lukumiino, nwipime’nwe baanabeene.” (2 Beena-Kodinda 13:5) Anka abitungu tukite bibungi, kushi penda kwikala na lukumiino. Abitungu kifulo kyetu bwa Yehowa na bwa bakwetu bena Kidishitu kitungunukye na kutama. Mpolo bakwile shi: “Su ne na . . . kiwukilo kioso, na’shi ne na lukumiino looso mu kipaso kikumbeene kutentula miengye, anka su ntshii na kifulo, ntshii kintu’mi.”—1 Beena-Kodinda 13:1-3, Kilombeeno kipya 2014.

16. Satana akumina shi tupushe naminyi?

¹⁶ Satana akumina tupushe shi, tatwi balombene kukita kintu ki buwa su nkimune bwa kusangasha Yehowa. Akumina shi tubofule na twele kinangu shi tatupete lwalulo ku myanda yetu nya. T’akumina shi tukulupile bakwetu bena Kidishitu na t’akumina shi twikale na muloo nya. (Beena-Efeso 2:2) Satana auku shi binangu bi bubi mbilombene kwitukalakasha mpa na kulwisha kipwano  kyetu n’Efile Mukulu. Kadi Yehowa mmwitupe kintu kyakwitukwasha bwa kulwa na nangunagu i bubi. Mmwitupe lukulupilo.

17. Lukulupilo lwi na muulo kinyi?

¹⁷ Mu mukanda wa 1 Beena-Tesalonika 5:8, Bible apwandjikisha lukulupilo na lubàngo [kifulu] alukalwilaa mutwe wa musalayi mu ngoshi, na etamina lwalwa lubàngo bu “lukulupilo lwa kipandjilo.” Kukulupila mu milayilo ya Yehowa kwi kukalwila binangu byetu na kwitukwasha bwa kukambila binangu bi bubi.

18, 19. Lukulupilo lubaadi lunyingishe Yesu naminyi?

¹⁸ Lukulupilo lwa Yesu lubamupele bukome. Bufuku bwa muladilo w’efuku dya lufu lwaye, bapetele nkalakashi i bungi. Kuukw’aye a p’eshimba bamupanyine. Ungi nkumutuna shi tamwiuku nya. Bangi nkumusuuka bamuleka. Bantu ba mwiumbo dyabo nkumwibwela na nkuteka shi afwe lufu lwa makyenga. Nkinyi kibamukwashile  bwa kunyingiila ano makyenga oso? “Bakuminyîne kwipaibwa pa kufwa ku [mutshi], kushi kupusha bûfu, mwanda bádi amono bi mulô ubádi umutûdilwe kumpala. Binobino, mmushâle ku mboko i balume ya lupuna nsulu lw’Efile Mukulu.”—Beena-Ebelu 12:2. EEM

¹⁹ Yesu baukanga shi p’aye kushala na lulamato, atumbisha Nshaye na kulesha shi Satana sha madimi. Luno lukulupilo lubamutwadiile miloo ibungi. Baukanga dingi shi binobino ekala pamune na Nshaye mwiyilu. Luno lukulupilo lubamukwashishe bwadya kunyingiila. Anka bu Yesu, abitungu tutule binangu ku lukulupilo lwetu. Abitukwasha bwa kunyingiila mwanda oso ulombene kutuuka.

20. Nkyinyi kilombene nkukwasha bwa kwikala na binangu bi buwa?

²⁰ Yehowa kwete kumona lukumiino lobe na kunyingiila koobe.(Yeeshaya 30:18; badika Malakii 3:10.)  Mmulee shi “akakupa byabya by’odi n’abyo lukalo mwishimba dyobe.” (Misambo 37:4) Byabya tuula binagu byobe ku lukulupilo. Satana akyebe shi oshimishe lukulupilo na opushe shi milayilo ya Yehowa yoso tayikumbana nya. Anka tokumanga kwikala na binangu bi bubi! Su bomono shi lukulupilo lobe lukwete kwenda na kupeela, teka bukwashi kwi Yehowa. Tentekyesha mayi e mu mukanda wa Beena-Fidipe 4:6, 7 aamba shi: “Tanwikalanga mashimba kwiyilu pa kintu su nkimune, anka nguba ooso, mu nteko, mu kwiyaaya, na mu ntumbu, uukishaayi Efile Mukulu nkalo yeenu. Na butaale bw’Efile Mukulu, abo bukile binangu byooso, abulama mashimba enu na binangu byenu munda mwa Yesu Kidishitu.”

21, 22. (a) Yehowa e na mpàngo kinyi bwa nsenga? (b) We mwate kitshibilo kya kukita kinyi?

²¹ Ata nsaa ya kunangushena ku miloo i kumpala. Binobino’bi, byoso bi na muwa abikalangwila Yehowa. (Kibafumbwilwe 7:9, 14) Banda kunangushena abikekala nshalelo mu nsenga ipya. Akekala buwa bukile byoso byatudya kupwandjikisha! Satana, ba demo, na bantomboshi boso abashimina. Tokakumbu, sunga kufwa nya. Anka, wekala obuku na mbidi bukome efuku dyoso, na muloo wa kwikala na muwa. Bantu boso abakafubu pamune bwa kwikasha nsenga mpaladiiso. Boso bwabo abakekala na bidibwa bi buwa na mbalo ya kushala i buwa. Bantu t’abakekala dingi ba ntomboshi kadi abakekala na kalolo munkatshi mwabo. Aa mafuku, bantu boso abakekala mu “bulungantu na ntumbo bya bana b’Efile Mukulu.”—Beena-Looma. 8:21.

²² Yehowa akumina shi omwikashe bu kuuku oobe a p’eshimba. Byabya kita mobe moso bwa kumukookyela na kwifubwila pepi naye efuku dyoso. Eyendo, atwe boso, tushaleyi mu kifulo ky’Efile Mukulu bwa loso!—Yunda 21.