Banda kupwandjikisha uno mwanda: Karen bafiki ku feete, tabandjile kukita sunga minite ifikye kwikumi, bapusha eyi dya muntu auku kalolo ku mongo kwaye.

Pabealuula Karen bwa kutala bamono loole aaye Jessica afiki mmutwale milangi ibidi ibabakatuka mu kufungula. Aku namu auku’shi aa maalwa aakolwanaa. Jessica bamutambika mulangi umune na kumulungula’shi: “Tokii nka mwana mukinga a kupela kusangala na penda ino ndambo nya, ta nnabyo su?”

Karen batompo kupela, aku namu Jessica mwikale loole aaye. Dingi, Karen takumiina’shi loole aaye amumone ku bisumanga. Kukatusha byabya, Jessica ekalaa mwana e buwa. Su batomo, t’abikala bubi nya. Karen banangushena mwishimba’shi: ‘Mpenda kya kutoma, ta mbintu abikolwanaa bu kabangi nya.’

Su boodya kwikala mu uno mwanda wa Karen, boodya kukita kinyi?

Bwa kwata kitshibilo kibuwa mu mwanda wi byabya abikutungu kuuka bumuntu boobe. Mwanda su ouku byodi mwikale, abikukwasha bwa kwata kitshibilo muyile byouku na byokuminaa. Su twe mulube bumuntu boobe, abikukwasha bwa kukunkusha nshalelo oobe pamutwe wa kutadiila bangi bwabadya kukwatshila bitshibilo.—1 Beena-Kodinda 9:26, 27.

We kupeta bukome bwa kwibikita naminyi? Kwaluula ku ino nkonko ayilondo nyi mbangilo ebuwa.

Kuuka ngobesha na ngikashi yoobe ibuwa kwi nkukwasha bwa kwikulupila.

KILESHESHO KYA MU BIBLE: Mpoolo mutumibwa bafundjile’shi: “Sunga nki na bukalabwino bwa kwakula, nyi na kiûkilo kya myanda y’Efile Mukulu.” (2 Beena-Kodinda 11:6, EEM) Bu bibaadi auku kalolo Bifundwe, Mpoolo baadi na ngobesha ya kushaala munyingye pabaadi apete nkalakashi. Tabaadi mutadiile mwikeelo wibubi wa bangi bwaudya kumubofusha nya.​—2 Beena-Kodinda 10:10; 11:5.

ETALUULE: Funda ngobesha sunga mbabi yoobe pano pa kuushi.

Binobino, leesha eyikashi dyobe dikata. (Bu kileshesho, opasukilaa bangi? we na kalolo? we muntu a kukulupilwa? Onemekaa nsaa?)

Anka abyendaa na kulwila kilonda kikwate nkongolo, bu muntu boobe mbulombeene kwenda na kulwila nsaa yotadiila kubofula koobe bwa kukunkusha nshaleelo oobe.

KILESHESHO KYA MU BIBLE: Mpoolo baadi alu ngoshi pabitale kubofula kwaye. Bafundjile bino: “Nee na muloo wa kukumbash’Eyi dy’Efile Mukulu mwishimba dyande, anka mu bipindji bya mbidi yande, nasangana dingi eyi, adilu ngoshi n’eyi dikumiine kinangu kyande; andjingikasha mwina-lukano a mwiya wa milwisho.”​—Beena-Looma 7:22, 23.

ETALUULE: Kubofula koobe kwi pa kinyi?

We kutwela mu motoka wa muntu, akupu omulungula bwadya kwifuunya nka mbalo imune na apapwila esanse su? Bi kwikala butesha na kulwisha kwa mfwalanga!

Dilongyesha: Kwikala na bitshibilo akukukwasha bwa kupela kwifuunya mbalo imune mu nshaleelo oobe. Mwanda weuku kwende na byodi mulombeene nkekufika.

KILESHESHO KYA MU BIBLE: Mpoolo bafundjile bino: ‘Ntshi bu muntu asuuku lubilo kushii kwiuka kwende’. (1 Beena-Kodinda 9:26, EEM)” Pamutwe pa kushaala bisumanga bwa kutengyela kyoso akimufikila mu nshalelo, Mpoolo baadi eatshila bitshibilo na kukimba bya kwibilombasha.​—Beena-Fidipe 3:12-14.

ETALUULE: Funda bitshilo bisatu byokumiina kulombasha kipwa akifiki pano pa kuushi.

Su twe na myanda yoodi mushinkamishe, abakukumbakasha. Nka bu lufwamina alushintuulaa malangi, wekala oshintuluka bwa kusangasha benoobe​—t’oleesha bumuntu boobe nya.

Mu kwilekeene na byabya, su bikitshiino byobe mbipushene na myanda yoshinkamisha, wekala a kulama bumuntu boobe—sunga bangi bakutakula mu kukita mwanda wi naminyi.

KILESHESHO KYA MU BIBLE: Pabaadi kii mu bipwa ekumi, mutemuki Ndanyeele “bâtshile kitshibilo mwishimba” bwa kukookyela miiya y’Efile Mukulu sunga mbibaadi kula na kifuko kyaye na beena kulangwila naaye. (Ndanyele 1:8, EEM) P’aye kukita byabya, baadi mulame bumuntu bwaye. Ndanyeele bakitshiine myanda muyile bibaadi mushinkamishe.

ETALUULE: Mmyanda kinyi yoodi mushinkamishe? Bu kileshesho: Okumina’shi Efile Mukulu e kwanka su? Su mbyabya bwakinyi? Mbishinkamiisho kinyi abikulesha’shi e kwanka?

Oshinkamisha’shi mayi a kulonda a Efile Mukulu e kwanka bwa bubuwa boobe? Su mbyabya, bwakinyi?

Binobino, okumiina kwikala bu​—esaki dya mutshi dipone adisaanasaana na lupapi su okumiina kwikala bu mutshi ushiname ushii ulombeene kusaanasaana sunga na kipapa kikata? Su weuku kalolo bumuntu boobe, wekala’nka bu wawa mutshi. Na kukita kwa byabya akukukwasha bwa kwaluula ku lukonko alwamba’shi: Ne muntu e naminyi?