DILONGIESHA 01

Bible e nkukuasha naminyi?

TEEMESHA MU

Atue boso atuiyipushaa nkonko pabitale nshalelo, makienga, lufu, na bua mafuku e kumpala. Atuikalakashaa dingi pabitale nshalelo etu a kuifuku n’efuku bu kulombasha nkalo ya kifuko kietu na kuikikasha na muloo. Bantu bebungi mbasangane’shi Bible t’ebakuasha penda bua kupeta ngaluulo ku nkonko ikata ya mu nshalelo nya, anka ebapa dingi malango ebuwa a kuibakuasha mu nshalelo a kuifuku n’efuku. Obe namu, ompuandikisha’shi Bible e kuitukuasha su?

1. Bible aluula ku nkonko kinyi?

Bible aluula ino nkonko i na muulo ukata: Muwa ubabangile naminyi? Buakinyi tui pa nsenga? Buakinyi bantu bakuete kukienga? Nkinyi akikitshikaa su muntu bafu? Su bantu boso abakuminaa butaale, buakinyi kui ngoshi? Nkinyi akikafuila nsenga mu mafuku e kumpala? Bible etunyingisha bua kukimba ngaluulo ku ino nkonko, na midiyo ya bantu ngipete ngaluulo aibasangasha mu Bible ku ino nkonko.

2. Bible e kuitukuasha naminyi buatudia kuikala na muloo mu nshalelo a kuifuku n’efuku?

Bible etupa malango ebuwa. Bu kileshesho, alongiesha bifuko buabidia kuikala na muloo wa binyibinyi. Atusha dingi malango pabitale biatudia kukambila tuinyongoshi na biatudia kupeta muloo mu mudimo wetu. Okauku akilongiesha Bible pabitale ino mianda na ingi i bungi y’atukesambila mu uno mukanda. Okafiki mu kutundula’shi: “Bifundwe byooso [mianda yoso i mu Bible] . . . mufubo wabyo ngwa kukwasha.”—2 Timote 3:16.

Uno mukanda tawata mbalo ya Bible nya. Anka aukunyingisha bodia kutaluula Bible obe nabene. Nyi buakinyi atukunyingisha bodia kubadika Bifundue biabadi batemune mu malongiesha na kuibipuandikisha na mianda yokuete kulonga.

TUKIMBUULE BOSO

Tutale Bible biadi mukuashe bantu bebungi, biodi mulombene kupeta muloo wa kumubadika, na buakinyi bibuwa kukimba bukuashi bua kumupusha.

3. Bible mulombene kuitukunkusha

Bible e nka bu etaata dibukopo. Mulombene kuitukuasha buatudia kuata bitshibilo bibuwa na etulungula mianda ayikakitshika mu mafuku e kumpala.

Badika Misambo 119:105, akupu nuisambile ino nkonko ailondo:

Mufundi a uno musambo badi amono Bible bu kinyi?
Obe namu omonaa Bible bu kinyi?

4. Bible mulombene kualula ku nkonko yetu

Ungi muana mukashi, badi mupete ngaluulo mu Bible ku nkonko yaye ibadi eyipusha takudi bipua bibungi. Tala VIDEO, akupu nuisambile ino nkonko ailondo.

VIDEO: Toshimishanga lukulupilo! (1:48)

Mu uno video, uno muana mukashi badi eipusha nkonko kinyi?
Kulonga kua Bible kubadi kumukuashe naminyi?

Bible etunyingisha bua kuela nkonko. Badika Mateo 7:7, akupu nuisambile luno lukonko alulondo:

Nkonko kinyi yokumina’shi opete ngalulo mu Bible?

5. Kubadika kua Bible nkulombene nkupetesha muloo

Bantu bebungi abasankilaa kubadika Bible, mbekupetele bukuashi bui bungi. Tala VIDEO, akupu nuisambile ino nkonko ailondo.

VIDEO: Kubadika Bible (2:05)

Mu uno video, ba nsongua abapushaa naminyi pabitale kubadika?
Sunga biekala’shi ba nsongua bebungi t’abakuminaa kubadika, kadi buakinyi mbakumine kubadika Bible?

Bible akula’shi mulombene kuitupa malango aetunyingisha na aetupa lukulupilo. Badika Bena-Looma 15:4, akupu nuisambile luno lukonko alulondo:

Mulailo wa mu Bible pabitale kuitunyingisha na kuitupa lukulupilo aukusankisha su?

6. Bangi mbalombene kuitukuasha bua kupusha Bible kalolo

Kukatusha kubadika kua Bible obe nabene, bebungi mbasangane’shi kumuisambila na bangi bantu akuibakuasha. Badika Bikitshino 8:26-31, akupu nuisambile luno lukonko alulondo:

Mbikunyi biatudi balombene kupusha Bible kalolo?—Tala verse 30 na 31.

Ungi muntu a mu Etshiopii badi na lukalo lua bukuashi, bua kupusha kalolo bibadi abadika. Lelo uno’nyi bebungi mbasangane’shi bua kupusha Bible kalolo abitungu kumuisambila na bangi

BANGI ABAMBA’SHI: “Kulonga kua Bible nkukisha kua nsaa.”

Obe namu opuandikisha naminyi? Na buakinyi wamba biabia?

MU KIKOSO

Mu Bible mui malango alombene kuitukuasha mu nshalelo etu a kuifuku n’efuku, atusha ngalulo ku nkonko i na muulo, anyingisha bantu na kuibapa lukulupilo.