DILONGIESHA 04
Efile Mukulu nanyi?
Kubanga kala, bantu babadi abalanguila b’efile bebungi ba madimi na b’efile bakashi. Anka Bible akula bw’Efile Mukulu umune “mukata mukile b’efile booso.” (2 Myanda 2:5) Yawa Efile Mukulu nanyi? Na nkinyi kimuikashe bukata kukila b’efile boso babalanguila kui bantu? Mu dino dilongiesha, olongo abikumina Efile Mukulu shi omuiukye.
1. Eshina di’Efile Mukulu nanyi, na nkinyi akilesha’shi akumina tuukie eshina diaye?
Efile Mukulu, elubula aye nabene kuatudi mu Bible. Akula’shi: “Nami Yehowa diadia ngi eshina diande.” (Badika Yeeshaya 42:5, 8.) “Yehowa,” nyi eshina diabadi baluule mu kina Ebelu adilesha’shi “Yawa afwishaa.” Yehowa akumina’shi tuukie eshina diaye. (Efilu 3:15) Nkinyi akitulesha bianka? Mu Bible mui eshina dia Yehowa misusa ikile pa 7 000! a Yehowa nyi eshina “di’Efile Mukulu a binyibinyi muiyilu na pa nsenga.”—Miiya Ikituulwe 4:39.
2. Bible etulungula kinyi pabitale Yehowa?
Bible akula’shi ku b’efile boso babalanguilaa kui bantu, nka penda Yehowa nyi Efile Mukulu a binyibinyi. Buakinyi? Muanda kui tubingilo tuibungi atuibilesha. Bu kileshesho Yehowa e na matalua e kunundu kua boso na nka penda aye ngi “Sha Kwiyilu kula pa nsenga ishima.” (Badika Misambo 83:18.) Nyi “Sha bukome booso,” nyi nkuamba’shi e na bukome bua kukita kioso kiakumina. Dingi naaye “bapangile bintu byoso” bi muiyilu na bi pa nsenga. (Kibafumbwilwe 4:8, 11) Mu kuilekena na bangi b’efile boso, nka penda Yehowa ngi tabekele kuanka kumpala kua bintu bioso, na ekala nka kuanka bua loso.—Misambo 90:2.
TUKIMBUULE BOSO
Tutaluule kuilekena kui pankashi pa miasu y’Efile Mukulu n’eshina diaye. Atutaluula dingi mushindo wadi muitulungule eshina diaye na buakinyi.
3. Efile Mukulu e na miasu ibungi anka ena eshina dimune
Bua kumona kuilekena kui pankatshi pa muasu wa muntu n’eshina diaye, tala VIDEO, akupu nuisambile luno lukonko alulondo.
-
Nkuilekena kinyi kui pankatshi pa muasu, bu “Mwanana,” n’eshina di’Efile Mukulu?
Bible alesha’shi bantu bakuete kulanguila b’efile na ba mwanana bebungi. Badika Misambo 136:1-3, akupu nuisambile luno lukonko alulondo:
-
“Efile Mukulu a b’efile” na “Mwanana a ba mwanana” nanyi?
4. Yehowa akumina’shi oukie eshina diaye na kuidifubisha
Nkinyi akilesha’shi Yehowa akumina oukie eshina diaye? Tala VIDEO, akupu nuisambile ino nkonko ailondo.
-
Onangushena’shi Yehowa akumina baukye eshina diaye su? Buakinyi wamba biabia?
Yehowa akumina’shi bantu bafubishe eshina diaye. Badika Bena-Looma 10:13, akupu nuisambile ino nkonko ailondo:
-
Buakinyi bi na muulo kufubisha eshina di’Efile Mukulu, Yehowa?
-
Opushaa naminyi su bantu mbalamine eshina diobe na abakuitamina mu dianka?
-
Omono’shi Yehowa apushaa naminyi nsaa y’ofubisha eshina diaye?
5. Yehowa akumina’shi wefubuile pepi naaye
Ungi muana mukashi a mu Cambodge abetamina bu Soten bambile’shi kulonga pabitale eshina di’Efile Mukulu kubamukuashile na kubamuikeshe na muloo ukata “kukila ubadi nao kumpala.” Tala VIDEO, akupu nuisambile luno lukonko alulondo.
-
Muyile biatubatala mu video, Soten badi mupushe naminyi pabalongiele eshina di’Efile Mukulu?
Kumpala kua kuikala mu bu kuuku na muntu, kebungi atubandaa kuipusha eshina diaye. Badika Shake 4:8a, akupu nuisambile ino nkonko ayilondo:
-
Yehowa akutekie bua kukita kinyi?
-
Kuuka na kufubisha eshina di’Efile Mukulu nkulombene nkukuasha bua kuifubuila pepi naye naminyi?
BANGI ABAMBA’SHI: “Kui nka penda Efile Mukulu umune, takui muanda sunga tuamuitamina muishina kinyi.”
-
Oshinkamisha’shi Yehowa nyi eshina di’Efile Mukulu a binyibinyi?
-
We kupatuula buakinyi Efile Mukulu akumina’shi tufubishe eshina diaye?
MU KIKOSO
Yehowa nyi eshina di’Efile Mukulu umune a binyibinyi. Akumina’shi tumuukie na tufubishe diadia eshina buatudia kuifubuila pepi naye.
Kwambuula
-
Yehowa muilekene na b’efile boso abalanguilaa bantu mu mushindo kinyi?
-
Buakinyi abitungu tufubishe eshina di’Efile Mukulu?
-
Nkinyi akilesha’shi Yehowa akumina wefubuile pepi naye?
TALUULA DINGI
Tala tubingilo tutano atuitushinkamiisha’shi Efile Mukulu e kuanka.
Tala buakinyi bi na muulo bua kukumina’shi Efile Mukulu ekalaa nka nkuanka.
“Nanyi bapangile Efile Mukulu?” (Kitenta kia Mulami, 1/8/2014)
Longa buakinyi abitungu kufubisha eshina di’Efile Mukulu, sunga biekala’shi t’atuuku kalolo bibabadi abeditamina ku mbangilo.
Kuitamina Efile Mukulu muishina dioso diatukumina takuina muanda su? Tala buakinyi tui kuamba’shi e na penda eshina diaye dimune.
“Efile Mukulu e na mashina bungi kinyi?” (Muisambo wi mu Internete)
a Bua kuuka mianda ibungi pabitale akipatuula eshina di’Efile Mukulu na buakinyi tadi mu angi ma Bible, tala Kipindi 1 kia Mukanda aukuasha bua kulonga Eyi di’Efile Mukulu.
Tala dingi
NKONKO YABAKAMBAA KWELA
Kulonga kwa Bible akukitshikaa naminyi?
Tala myaluulo ya nkonko itale programe etu a kulonga kwa Bible.
