DILONGIESHA 11

We kupeta bukuashi bukata abutukila mu Bible naminyi?

TEEMESHA MU

Tobopuile kupusha bu bibukopo kumpala kua kubanga mudimo ukata su? Pangi bua kuiupelepesha, we kuiutshibuula mu bipindi bua kuiukita bipelabipela. Bi mumune na nsaa yobanga kubadika kua Bible. Pangi we kuiyipusha’shi: ‘A nabangila pe kunyi?’ Mu dino dilongiesha, atukiebe kutalula mishindo ipelepele ilombene nkukuasha bua kusankila kubadika na kulonga kua Bible.

1. Buakinyi abitungu kubadika Bible efuku dioso?

Muntu abadika Bible efuku dioso, sunga “Eyi [Mwiya wa] Yehowa,” ekala na muloo na kobesha mu bioso biakitshi. (Badika Misambo 1:1-3.) Ku mbangilo, tompa kuata penda minite ipela ku efuku dioso bua kubadika Bible. Nsaa yonyinsha kuiubidishena n’Eyi di’Efile Mukulu, onyinsha kupeta muloo wa kuidibadika.

2. Abitungu kukita kinyi bua’shi kubadika kua Bible kukukuashe?

Bua’shi kubadika kuetu kua Bible kuitukuashe, bibuwa kuimana kapindi na kuela binangu ku biatubadika. Abituntu tubadikie Bible na ‘kunangushena’ ku biatubadika. (Yooshwa 1:8) Nsaa yobadika, eipushe’shi: ‘Bino abindongiesha kinyi pabitale Yehowa Efile Mukulu? Ne kuibitumikila naminyi mu nshalelo ande? Mbikunyi biandia kufubisha ino verse bua kukuasha bangi?’

3. We kupeta nsaa ya kubadika Bible naminyi?

Abikuikelaa bukopo bua kupeta nsaa ya kubadika Bible su? Bebungi ba kuatudi abibafikilaa. Biabia tompa “kufubisha nsaa yobe kalolo.” (Bena-Efeso 5:16, NWT) We mulombene kuitshibila nsaa ya kubadika Bible efuku dioso. Bangi bantu ababadikaa Bible ku nakashika. Bangi abasangulaa nsaa ya kubadika munkatshi mua efuku pangi kunyima kua’bo kudia. Bangi namu ababadikaa Bible ku kiolua, kumpala kua’bo kulala. Obe namu, nsaa kinyi yokumina kumubadika?

TUKIMBUULE BOSO

Tulongie bia kuikasha kubadika kobe kua Bible bu nsaa ya muloo. Tala biodia kuilumbula kalolo bua kupeta bukuashi mu kulonga kobe kua Bible.

Nka bu biatudi balombene kulonga kudia bidibua biatushadile dingi, tui balombene kulonga bia kusankila kubadika kua Bible

4. Longa bia kusankila kubadika kua Bible

Kubanga kubadika Bible kui kuikala bukopo. Anka, we mulombene kulonga bia kusankila kubadika kua Bible nka bu biodia kulonga bia kusankila bia kudia bioshodile kashaa. Badika 1 Mpyeele 2:2, akupu nuisambile luno lukonko alulondo:

Su obadika Bible efuku dioso, opuandikisha’shi wekala na muloo wa kumubadika na kunyisha kumusankila?

Tala VIDEO bua kumona bipete bangi muloo pa kubanga kubadika Bible. Akupu nuisambile ino nkonko ailondo:

VIDEO: Ba nsongua abalongo bia kufula Eyi di’Efile Mukulu (5:33)

Mu uno video, ba nsongua babadi bakambile nkalakashi kinyi?
Nkinyi kibadi kibakuashe bua kuikala na kiubishi kia kubadika Bible efuku dioso?
Mbikunyi bibabadi bekashe kubadika kuabo kua Bible bu muanda wa mulo?

Mayele alombene nkukuasha bua kubanga kubadika Bible:

Sangula Bible abadi balule kalolo mu ngakuilo a kano kabidi. We kubadika Bible a Traduction du monde nouveau su e mu ludimi lobe, sunga mu lungi ludimi louku.
Banga kubadika kipindi kia Bible kiomono’shi akikusankisha. Bua kuuka bibungi, tala kashibo akamba’shi: “Banga kubadika kua Bible.”
Funda mianda yobadikile kumpala. Fubisha kashibo akamba’shi: “Londesha kubadika kobe kua Bible” ke mu uno mukanda.
Fubisha JW Library^®. Ku bukuashi buaye, we mulombene kubadika Bible na kumupusha kalolo, kukiila ku telefone sunga kangi kaamo kalombene kutuela JW Library.
Fubisha Apandise e mu Bible a Traduction du monde nouveau. Mui ma karte, ma tableau, ma lexique bilombene nkukuasha bua kusankila kubadika kobe kua Bible.

5. Elumbule kumpala kua kulonga Bible

Badika Misambo 119:34, akupu nuisambile luno lunkonko alulondo:

Buakinyi abitungu kusambila kumpala kua kubadika kua Bible sunga kumpala kua kuilumbuula bua kulonga kobe kua Bible?

Mbikunyi biodi mulombene kupeta bukuashi bukata mu kipindi kioso kia kulonga kua Bible? Nsaa yolumbula dilongiesha dioso dia mu uno mukanda, tompa kufubisha ano mayele aalondo:

Badika bikoso bioso bi kunundu kua kipindi kia tukimbuule boso.
Badika bifundue bi muanka na okimbe biabidi bipushene na mianda i mu kikoso.
Ela kashonyi pa miaku sunga bishima abialula ku lukonko loso, bino abikukuasha panulongo na mulongieshi obe.

Oukanga su?

Ba Temwe ba Yehowa abafubishaa ma Bible ebungi elekene, anka atukambaa kufubisha Bible a Traduction du monde nouveau muanda akula mianda nka biayidi, apushika kalolo, na afubisha eshina di’Efile Mukulu.—Tala muisambo wi ku Internete “Ba Temwe ba Yehowa be na aabo Bible su?”

BANGI ABAMBA’SHI: “Kulonga kua Bible nyi mudimo wi bukopo. Ntshi na nsaa sunga bukome bua kuibikita.”

Obe namu onangushena naminyi?

MU KIKOSO

Bua kupeta bukuashi bukata abutukila mu Bible, ikala na nsaa ya kumubadika, ela luteko bua kupusha mianda yobadika, na elumbule kumpala kuanudia kulonga Bible.