DILONGIESHA 22

We kulungula mukandu wi buwa naminyi?

TEEMESHA MU

Nsaa yokuete kulonga bia binyibinyi bia mu Bible, we kunangushena’shi, ‘abitungu muntu oso ebiukie!’ Mbinyibinyi bantu boso be na lukalo lua kuka bianka! Anka, we kupusha katshima munda bua kulungula bangi mianda yokuete kulonga. Tutale biodi mulombene kukambila kaka katshima munda na kuikala na muloo wa kulungula mukandu wi buwa wa mu Bible.

1. Mbikunyi biodia kulungula bantu bouku mianda yokuete kulonga?

Balongi ba Yesu babakuile’shi: “Tatwi balombene kukutwa kuakula bua bintu biatudi bamone na biatudi bapushe.” (Bikitshino 4:20) Babadi abata bia binyibinyi na muulo, nyi buakinyi babadi abakumina kuibilungula bantu be bungi. Okuete kuipusha namu biabia su? Su bi biabia, kimba mishindo yodia kulungula bena kifuko na ba kuku bobe mianda yokuete kulonga na kanemo koso.—Badika Bena-Kolose 4:6.

Ingi mishindo yodia kubanga kuibikita

Nsaa yuesamba na muina kifuko, banga muisambo wa mu Bible p’obe kuakula’shi: “Ne mulongie ungi muanda wi buwa biabia luno lubingo.”
Badikila kuku obe e na maladi sunga tuinyongoshi kifundue akimunyingisha.
Lungula muina mudimo nobe akuipusha bua kuka biodi, muanda odi mupete mu kuilongiela kobe kua Bible sunga mu bisangilo bia kakongye.
Lesha ba kuku bobe site a jw.org.
Itamina bangi buabadia kupetekielua nsaa yolongo Bible, sunga kuibalesha biabadia kuteka bua kulonga Bible mu jw.org.

2. Buakinyi bi na muulo kulungula pamune na kakongye?

Balongi ba Yesu tatabadi abalungula mukandu wi buwa penda kui bantu babeukena nabo nya. Yesu “bebatumine babidi babidi kumpala kwaye, mu bibundji byoso” bua kulungula mukandu wi buwa. (Luka 10:1) Kulumbula bulungudi mu uno mushindo, kubakuashile bantu bebungi bua kupusha mukandu wi buwa. Kulungula mukandu wi buwa pamune kubadi akupa dingi balongi mulo wi bungi. (Luka 10:17) N’obe namu we kuata kitshibilo kia kulungula pamune na kakongye su?

TUKIMBUULE BOSO

Tutale biodi mulombene kukambila katshima munda na kupeta mulo aufiki mu kulungula mukandu wi buwa.

3. Yehowa ekala nobe

Bangi abakumina kulungula mukandu wi buwa abapushaa katshima munda pabitale biabadi balombene kuibamona sunga kuibalula kui bangi.

Opusha katshima munda bua kulungula bangi mianda yodi mulongie su? Buakinyi wamba biabia?

Tala VIDEO, akupu nuisambile luno lukonko alulondo.

VIDEO: Nantekiele Yehowa buashi ampe eshimba dinyingie (4:05)

Bano ba nsongua ba Temwe ba Yehowa babakambila moo naminyi?

Badika Yeeshaya 41:10, akupu nuisambile luno lukonko alulondo:

Luteko ndulombene nkukuasha naminyi nsaa yopusha moo wa kulungula mukandu wi buwa?

Oukanga su?

Ba Temwe ba Yehowa bebungi babadi abapusha moo wa kulungula mukandu wi buwa pamune na bangi. Bu kileshesho, Sergey, badi eepusha bu shibadi na ngobesha ya kuisamba na bantu. Anka, kunyima balongiele Bible. Akula’shi: “Sunga biekala’shi nadi napusha moo, natekiele Yehowa bua kulungula bangi mianda inadi nalongo. Muanda wa kukaanya, kulungula bangi pabitale Bible nkukuashe buandia kupela kuikala na moo. Nkunyingishe dingi lukumino luande mu ino mianda ipia inadi nalongo.”

4. Ikala na kanemo

Nsaa yatulungula mukandu wi buwa, tatutalanga penda biatudia kuakula nya, kadi tutale dingi mushindo wa kuibiakula. Badika 2 Timote 2:24 na 1 Mpyeele 3:15, akupu nuisambile ino nkonko ailondo:

We kufubisha ino verse naminyi nsaa yuesamba na bangi mianda ya mu Bible?
Bangi bena kifuko na ba kuku bobe be kupela kukumina mianda yuakula. We kukita kinyi? Nkinyi kioshi bia kukita?
Buakinyi bibuwa kuela nkonko na mayele, pamutue pa kuibakuminyisha mianda pabukopo?

5. Kulungula mukandu wi buwa akutualaa milo

Yehowa bapeele Yesu mudimo wa kulungula mukandu wi buwa. Yesu badi mumone uno mudimo naminyi? Badika Yowano 4:34, akupu nuisambile ino nkonko ailondo:

Kudia bidibua bi buwa akuitupeya mbidi bukome na mulo. Buakinyi Yesu apuandikisha kukita kikiebe ki’eshimba di’Efile Mukulu pamune na kulungula mukandu wi buwa na kudia bidibua bi buwa?
Omono’shi kulungula mukandu wi buwa kui nkutuadila milo kinyi?

Malango

Mu bisangilo bia munkatshi mua lubingo, lamiina mishindo yodia kubanga miisambo.
Lungula muntu anulongaa naye pabitale bia kubanga kukita midimo mu bisangilo bia munkatshi mua lubingo. Kukita midimo mu bisangilo nkulombene nkukuasha bua kuikala muilumbule bua kulungula bangi mianda yokuete kulonga.
Fubisha kipindi kia “Bangi abamba’shi” sunga “Su muntu akuipusha’shi” bua kukimba bia kualula muntu atusha kabingilo ka kupela kupusha biomulungula.

SU MUNTU AKUIPUSHA’SHI: “We naminyi?”