Yesu badi mulongieshe’shi abitungu muina Kidishitu oso abatshishibue. (Badika Mateo 28:19, 20.) Biabia kubatshishibua akulesha kinyi? Na abitungu’shi muntu akite kinyi bua kubatshishibua?

1. Kubatshishibua nkinyi?

“Kubatshishibua” nyi nkishima kia mu kina Greke akipushisha “kuina” muntu mu mema. Pabaadi Yesu mubatshishibue, babamwinyine mu muela wa Yordano, na aye ‘nkutuka mu mema.’ (Maako 1:9, 10) Mu mushindo umune, bena Kidishitu ba binyibinyi ababatshishibua pa kuibaina sunga kutuesha muntu oso mushima mu mema.

2. Kubatshishibua akulesha kinyi?

Kubatshishibua akulesha’shi, muntu ekele muilambule aye nabene kui Yehowa Efile Mukulu. Muntu elambulaa naminyi kui Yehowa? Kumpala kua kubatshishibua, muntu alungula Yehowa pa bupenka mu luteko’shi bakumina kumufubila bua loso. Alaa bua kulanguila nka penda Yehowa, na kutula kikiebe ki’eshimba diaye pa mbalo ya kumpala mu nshalelo aye. Aata kitshibilo kia ‘kwipela aye nabene na . . . kutungunuka na kulonda’ malongiesha a Yesu na kileshesho kiaye. (Mateo 16:24) Kuilambula na kubatshishibua kuaye akumupa mushindo wa kuikala mu kipuano ki buwa na Yehowa na balanguidi baye.

3. Abitungu’shi muntu akite kinyi kumpala kua kubatshishibua?

Bua kubatshishibua abitungu’shi muntu alongie pabitale Yehowa na kunyingisha lukumino luaye muadi. (Badika Bena-Ebelu 11:6.) Nsaa aitama kiukilo na lukumino lobe onyisha kufula Yehowa. Kushi mpaka, okumina kulungula mukandu wi buwa pa bimutale, na kuikala na nshalelo muipushene na miya yaye. (2 Timote 4:2; 1 Yowano 5:3) Nsaa i muntu e na nshalelo “mwipushene na abikumina Yehowa na kumusangasha ngofu,” e kukumina kulambula Efile muwa waye na kukumina kubatshishibua.​—Bena-Kolose 1:9, 10. a

 TUKIMBUULE BOSO

4. Kiatudia kulongiela ku lubatshisho lua Yesu

Badika Mateo 3:13-17 bua kulonga bi bungi pabitale lubatshisho lua Yesu. Akupu nuisambile ino nkonko ailondo:

• Yesu baadi muana tooka pabadi mutambule su?

• Badi mutambule naminyi? Babaadi bamumiamine penda mema su?

Yesu babangile kukita mudimo waye ubabamupele kui Efile Mukulu pa nsenga, kunyima kuaye kubatshishibua. Badika Luka 3:21-23 na Yowano 6:38, akupu nuisambile luno lukonko alulondo:

• Mudimo kinyi ubadi Yesu mutule pa mbalo ya kumpala mu muwa waye kunyima kua kubatshishibua?

5. Kubatshishibua nkitshibilo ki buwa kiodia kuata

Muntu panangushena pabitale kuilambula na kubatshishibua, bua musango wa kumpala e kupusha moo. Anka, we mulombene kuela matabula e nkukuasha bua kukasha moo na kuata kino kitshibilo ki na muulo ukata. Tubande kutala bangi bantu babadi bakite biabia, tala VIDEO.

Badika Yowano 17:3 na Shake 1:5, akupu nuisambile luno lukonko alulondo:

• Nkinyi kilombene kukuasha muntu buashi ekale mulombane bua kubatshishibua?

1. Atuilambulaa kui Yehowa pakumulungula’shi, atukiebe kumufubila bua loso

2. Pa lubatshisho luetu, atulesha bantu boso’shi tui bapue kuilambula kui Efile Mukulu

 6. Nsaa yobatshishibua ofiki muina kifuko kia Yehowa

Nsaa yatubatshishibua, atutuele mu kifuko kia Yehowa ki mu buwumune ki mu nsenga ishima. Sunga tuekala ba mbalo kinyi sunga ba kabila kinyi, boso buetu atukumina malongiesha amune na atulonda miya i mumune. Badika Misambo 25:14 na 1 Mpyeele 2:17, akupu nuisambile luno lukonko alulondo:

• Lubatshisho lui na bukitshishi kinyi ku kipuano kia muntu na Yehowa na bena Kidishitu naye?

 MU KIKOSO

Yesu baadi mulongieshe’shi abitungu bena Kidishitu babatshishibue. Bua kulombasha kano kepatshila, abitungu muntu anyingishe lukumino luaye mui Yehowa, kuikala na nshalelo muipushene na miya yaye, na kuilambula aye nabene kui Yehowa.

Kuambuula

• Kubatshishibua kinyi, na buakinyi kui na muulo?

• Kuilambula na kubatshishibua abilesha kinyi?

• Abitungu’shi muntu akite kinyi kumpala kua kuilambula na kubatshishibua?