DILONGIESHA 24
Ba mikeilu be naminyi na abakitaa kinyi?
Yehowa akumina’shi tulongie pabitale kifuko kiaye ki muiyilu. Mu kiakia kifuko kiaye mui ba mikeilu babetanyinaa bu ‘bana b’Efile Mukulu.’ (Yoobo 38:7) Bible akula kinyi pabitale ba mikeilu? Be na bukitshishi kinyi kui bantu? Na ba mikeilu boso be mu kifuko ki’Efile Mukulu su?
1. Ba mikeilu mbananyi?
Yehowa bapangile ba mikeilu kumpala kua kupanga nsenga. Nka bu Yehowa, abo namu be na mbidi ya mu kikudi na mbashalele muiyilu. (Bena-Ebelu 1:14) Kui midiyala ya ba mikeilu, na muikeilu oso muilekene na ingi. (Kibafumbwilwe 5:11) ‘Ayikokyela eyi [dya Yehowa] na kumupushishanga mu byoso by’akula.’ (Misambo 103:20, EEM) Mu mafuku a kala, ingi nsaa Yehowa baadi atumu ba mikeilu bua kutusha mukandu waye, kukuatshishena na kupasha muilo waye. Lelo uno, ba mikeilu abakunkusha bena Kidishitu bua kuenda kui bantu abakumina kulonga pabitale Efile Mukulu.
2. Satana na ba demo baye mbananyi?
Bangi ba mikeilu babadi batombokiele Yehowa. Muikeilu a kumpala batombokiele ‘abamuitanyina bu Diabulu na bu Satana, mulendwishi aa baa-pano booso.’ (Kibafumbwilwe 12:9) Satana bakimbile kumuna bantu, nyi aye nkulenduisha Adame na Eeva, na kunyima, nkulenduisha bangi ba mikeilu buashi batombokiele Yehowa. Baba ba mikeilu babatombokiele nyi babetanyinaa bu ba demo. Yehowa baadi muibabingie muiyilu na ebasumbula pa nsenga, na abakabutudibua.—Badika Kibafumbwilwe 12:9, 12.
3. Satana na ba demo baye abakimbaa kuitudimba naminyi?
Satana na ba demo baye, abadimbaa bantu ku bukuashi bua kupaka manga sunga malenganyi, kukita bino kui bubi muanda nkuisamba na bikudi bi bubi. Bu kileshesho, bangi bantu abakita lubuko, kuenda kui ba nganga, kui basha lumonyi sunga kui basha masende bua kukimba bukuashi. Bangi abenda kui bantu ababukaa mikumbo ku bukuashi bua bikudi bi bubi. Bangi bantu ebebadimba bua kukumina’shi mbalombene kuisamba na bafue. Anka Yehowa etudimusha’shi: “Tanwendanga nwakepusha myanda kwi baba abela mukishi [ba nganga] sunga baba abewukisha bantu abikebafikila.” (Bena-Levi 19:31) Yehowa muitupe dino elango bua kuitukaluila kui Satana na ba demo baye. Nyi mbeshikuanyi ba Yehowa na abakuminaa kuitukitshina bi bubi.
TUKIMBUULE BOSO
Tutale mianda i buwa ayikitaa ba mikeilu, masaku aatukila mu mianda ya bikudi bibi, na biatudi balombene kuikaluila kui Satana na ba demo baye.
4. Ba mikeilu abakuashaa bantu bua kulonga pabitale Yehowa
Ba mikeilu b’Efile Mukulu tabenda abo banabene mu kulungula bantu mukandu wi buwa. Anka, abakunkushaa balanguidi b’Efile Mukulu kui baba abakumina kulonga pa bimutale. Badika Kibafumbwilwe 14:6, 7, akupu nuisambile ino nkonko ailondo:
-
Buakinyi tui na lukalo lua bukuashi bua ba mikeilu bua kulungula mukandu wi buwa?
-
Abikunyingisha pobe kuuka’shi ba mikeilu be nkukunkusha kui bantu bena lukalo lua kupusha mukandu wi buwa wa mu Bible su? Buakinyi?
5. Suuka mianda ya bikudi bibi
Satana na ba demo baye mbeshikuanyi ba Yehowa. Mbekale dingi beshikuanyi betu. Badika Luka 9:38-42, akupu nuisambile luno lukonko alulondo:
-
Ba demo be na bukitshishi kinyi kui bantu?
Tatukumina’shi ba demo bekale na bukitshishi mu nshalelo etu nya. Badika Miiya Ikituulwe 18:10-12, akupu nuisambile ino nkonko ailondo:
-
Mu mishindo kinyi aikimba ba demo kuikala na bukitshishi kuatudi na kuisamba netu? Bantu abakambaa kukita mianda kinyi mu mbalo yodi mushale?
-
Omono’shi Yehowa biadi mushikue mianda ya bikudi bi bubi, bi buwa su? Buakinyi wamba biabia?
Tala VIDEO, akupu nuisambile ino nkonko ailondo.
-
Omono’shi kakano kabadi ku mboko ya muana a Palesa kabaadia kumufuishisha masaku su? Buakinyi wamba biabia?
-
Bibadi abitungu’shi Palesa akite kinyi bua kuikaluila kui ba demo?
Bena Kidishitu ba binyibinyi abasukaa mianda ya ba demo. Badika Bikitshino 19:19 na 1 Bena-Kodinda 10:21, akupu nuisambile luno lokonko alulondo:
-
Buakinyi bi na muulo kushiika kantu koso ke mu kuipushena na bikudi bi bubi kaalo?
6. Kambila Satana na ba demo baye
Ba demo abakunkushibua na Satana. Anka ba mikeilu basha lulamato abakunkushibua na Mikaele mukata a ba mikeilu, dikale dingi eshina dia Yesu. Mikaele e na bukome bui naminyi? Badika Kibafumbwilwe 12:7-9, akupu nuisambile ino nkonko ailondo:
-
Nnanyi e na bukome bui bungi? Mikaele na ba mikeilu baye su Satana na ba demo baye?
-
Omono’shi balongi ba Yesu be bia kutshina Satana na ba demo baye su?
We mulombene kutshimuna Satana na ba demo baye. Badika Shake 4:7, akupu nuisambile luno lukonko alulondo:
-
Mbikunyi biodi mulombene kuikaluila kui Satana na ba demo baye?
BANGI ABAMBA’SHI: “Tabi bubi kuasha maasha sunga kubandila ma video a mianda ya bikudi bi bubi. Mmaasha bisumanga.”
-
Buakinyi bino binangu ta bi buwa?
MU KIKOSO
Ba mikeilu basha lulamato abetukuashaa. Satana na ba demo baye mbeshikuanyi ba Yehowa, na abafubisha bikudi bi bubi bua kupambuisha bantu.
Kuambuula
-
Mikeilu ya Yehowa aikuashaa bantu bua kulonga pa bimutale naminyi?
-
Satana na ba demo baye mbananyi?
-
Buakinyi abitungu tusuukie mianda ya bikudi bi bubi?
TALUULA DINGI
Tala bishinkamisho abilesha’shi Yesu nyi Mikaele mukata a ba mikeilu.
“Mikayele mukata a ba miikeyilu nnanyi?” (Muisambo wi mu Internete)
Tala bishinkamisho abilesha’shi Satana muntu a binyibinyi.
“Diabulu mmuntu a binyibinyi su?” (Muisambo wi mu Internete)
Tala bibaadi ungi muana mukashi mutshibe kipuano na bikudi bi bubi.
“Bapetele kepatshila ka nshalelo aye” (Kitenta kia Mulami, 1/7/1993)
Tala Satana biafubisha bikudi bi bubi bua kudimba bantu.
“Bya binyibinyi pabitale malenganyi, na bu ndoshi” (Eshinda aditwala ku muwa wa looso, kipindi 5)
Tala dingi
NKONKO YABAKAMBAA KWELA
Kulonga kwa Bible akukitshikaa naminyi?
Tala myaluulo ya nkonko itale programe etu a kulonga kwa Bible.
