Tobopuile kufuisha muntu odi mufule su? Mu yaya nsaa ya kinyongua, pangi tobueyipuishe’shi: ‘Nkinyi akikitshikaa su muntu bafu? Tui kukulupila’shi atukemonena dingi na bakuetu bapue kufua su?’ Mu dino dilongiesha na adilondo, atukapete ngalulo ya mu Bible ayinyingisha.

1. Nkinyi akikitshikaa su muntu bafu?

Yesu badi mupuandikishe lufu na tulo. Muntu e mu tulo tui bukopo ntamulombene kuka kintu sunga nkimune akikidika mubuipi muaye. Lufu lui bu tulo mu mushindo kinyi? Su muntu bafu, ntamulombene kupusha kintu sunga nkimune. Ntamulombene kupusha bushiye, sunga biekala’shi badi mufule bakuuku baye na kifuko kiaye ngofu. Bible amba’shi: “Bafue tabauku kintu su nkimune.”​—Badika Mulungudi 9:5.

2. Kuka bia binyibinyi pabitale lufu akuitukuasha naminyi?

Bantu be bungi abatshinaa lufu mpa na kutshina bantu bafue! Anka abiakula Bible pabitale lufu mbilombene nkunyingisha. Yesu bakuile’shi: “Biinyibiinyi abinwikasha bantu balungantu.” (Yowano 8:32) Mu kuilekena na bingi bipuilo, Bible talongiesha’shi muntu e na anyima shafuiya atungunukaa na kuikala na muwa kunyima kua lufu nya. Biabia, takui muntu akiengaa kunyima kua lufu nya. Dingi, bu bikale’shi bafue tabauku kintu sunga nkimune, ntambalombene kuitukitshina bi bubi nya. Biabia, tatui balombene kuibalanguila sunga kuibatekiela nya.

Bangi bantu abamba’shi mbalombene kuisamba na bafue. Anka tabi bia kukitshika nya. Nka bu bibatulongo, “bafwe tabauku kintu su nkimune.” Baba abapuandikisha’shi bakuete kuisamba na bakuabo bapue kufua, bakuete kuisamba na ba demo, abakimba kuilesha bu baba bakuabo bapue kufua. Biabia, kuka bia binyibinyi pabitale bafue akuitukaluila kui ba demo. Yehowa takumina buashi tutompe kuisamba na bafue, muanda auku’shi kutuela mu kipuano na ba demo akuitufuishila masaku.​—Badika Miiya Ikituulwe 18:10-12.

3. Longa bia binyibinyi pabitale bafue

Mu nsenga ishima, bantu be na nkumiino ilekene pabitale akikitshikaa apafu muntu. Anka ino nkumiino yabo yoso ta ngia binyibinyi.

• Mu mbalo yodi mushale bantu abakambaa kukumina mianda kinyi pabitale bafue?

 4. Bia binyibinyi pabitale lufu abitukuasha

Kuka bia binyibinyi pabitale lufu akuitukuasha bua kupela kutshina bafue. Badika Mulungudi 9:10, akupu nuisambile luno lukonko alulondo:

• Bafue mbalombene kuitukitshina bi bubi su?

Bia binyibinyi bia mu Bible abitukaluilaa bua kupela kukumina’shi, abitungu kukitshina bafue mianda i buwa sunga kuibalanguila. Badika Yeeshaya 8:19 na Kibafumbwilwe 4:11, akupu nuisambile luno lukonko alulondo:

• Omono’shi Yehowa apushaa naminyi pabitale muntu alanguila sunga kukimba bukuashi kui muntu kampanda mupue kufua?

5. Kuka bia binyibinyi pabitale lufu akuitunyingisha

Bantu be bungi mbebalongieshe’shi, su babafu, abakebanyoko muanda wa bikitshino biabo biakala bi bubi. Anka abitunyingisha pakuka’shi takui muntu sunga ngumune akienga kunyima kua lufu sunga biekala’shi muntu badi mukite mianda i bubi bukile. Badika Bena-Looma 6:7, akupu nuisambile luno lukonko alulondo:

• Su muyile bibatubadika mu Bible, lufu aluikasha muntu mulungantu sunga kumupososha ku muluisho, onangushene’shi muntu mufue e kukienga muanda wa bikitshino biaye bi bubi bia kala su?

Patukuete kuenda na kuka Yehowa, atunyisha kushinkamisha’shi takiengiesha bantu bafue mu kaalo nya. Badika Miiya Ikituulwe 32:4 na 1 Yowano 4:8, akupu nuisambile ino nkonko ailondo:

• Bu bikale’shi Efile Mukulu e na ino ngikashi ibatubadika mu ino verse, mulombene kukumina kukiengesha bafue mu kaalo su?

• Omono’shi kuka bia binyibinyi pabitale lufu akukunyingisha su? Buakinyi wakula biabia?

 MU KIKOSO

Su muntu bafu, te na dingi muwa nya. Bafue tabakiengaa na ta be bia kukitshina abatala bi bubi nya.

Kuambuula

• Nkinyi akikitshikaa su muntu bafu?

• Bia binyibinyi pabitale lufu abitukuasha naminyi?

• Bia binyibinyi pabitale lufu abitunyingisha naminyi?