DILONGIESHA 38
Lesha lutumbu bua kia buntu kia muwa
Tui balombene kukita na kusankila bintu bibungi patudi na muwa. Sunga tuekala na nkalakashi, tui kusankila ingi mianda ya mu nshalelo. Tui kulesha naminyi’shi tui na lutumbu bua kia buntu kia muwa? Nkabingilo kinyi kakata aketutakula bua kuibikita?
1. Buakinyi abitungu kusangela muwa?
Abitungu tusangele muwa muanda nyi nkia buntu kia Nshetu a kifulo, Yehowa. Aye nyi “nsulo ya muwa”—bapangile muwa. (Misambo 36:9) ‘Aye ngi apeyaa bintu byooso muwa na bukome.’ (Bikitshino 17:25, 28) Yehowa etupeyaa bioso biatudi nabio lukalo bua kuikala na muwa. Anka kukasha biabia, kuete kuitupa bintu abitukuasha bua kusangela muwa.—Badika Bikitshino 14:17.
2. Tui kulesha Yehowa naminyi’shi atusangela kia buntu kia muwa?
Kubanga pokii munda, Yehowa badi akupasukila. Ku bukuashi bua kikudi ki’Efile Mukulu, Davide ungi mulanguidi a Efile Mukulu bakuile bino: ‘Bommwene mwanka pa nádi nkí bu kantu kebumbe bisumanga.’ (Misambo 139:16, EMM) Muwa obe wi na muulo ukata ku meso a Yehowa. (Badika Mateo 10:29-31.) Mbilombene kumutapa kuishimba su muntu ayipaa muin’aye, sunga kuiyipaa aye nabene. a (Efilu 20:13) Yehowa mulombene dingi kupusha bibubi su tuatula muwa wetu mu masaku sunga kupela kukita bia’shi muwa wa bangi tawikalanga mu masaku. Nsaa y’atukaluila muwa wetu na kunemeka wa bangi, atulesha’shi atusangela kia buntu kia muwa.
TUKIMBUULE BOSO
Tutale ingi mishindo yodia kulesha’shi we na lutumbu bua kia buntu kia muwa.
3. Bamba mbidi yobe
Pa muanda tui balee Yehowa’shi atuikala atukitshi nka kiakiebe, tui balambule muwa wetu oso mu kumufubila. Bi nka bu’shi mbidi yetu yoso tui beyilambule kui Efile Mukulu. Badika Bena-Looma 12:1, 2, akupu nuisambile ino nkonko ayilondo:
-
Nkinyi kilombene nkutakula mu kubamba mbidi yobe?
-
Mmu ingi mishindo kinyi yodia kuibikita?
4. Kita bia’shi takutukanga masaku sunga lufu lua muntu
Bible etutekie bua kupela kukita mianda ikumbene kufuisha masaku. Tala VIDEO bua kumona ingi mianda yodia kukita bua kuikaluila.
Badika Nkindji 22:3, akupu otaluule biodi mukumbene kukita buashi obe na bangi nudimukile masaku . . .
-
ku nshibo yobe.
-
ku mbalo yobe ya mudimo.
-
p’osha maasha.
-
p’otambusha nkinga, motoka sunga ntukutuku.
5. Nemeka muwa wa muana kii munda
Davide badi mupatuule’shi, Yehowa atalaa kintu kioso akikitshika nsaa i muana kii muiyimi. Badika Misambo 139:13-17, akupu nutalule luno lukonko alulondo:
-
Ku meso kua Yehowa, muwa wa muntu aubanga aye batandikua, su nnaye kii munda?
Miiya ibadi Yehowa mupe bena Isalele ibadi ayikaluila ba nyina bana na bana be munda. Badika Efilu 21:22, 23, akupu nuisambile ino nkonko ayilondo:
-
Yehowa badi na mueneno kinyi pabitale muntu bafuisha masaku na kuipayisha muana e munda?
-
Badi apusha naminyi su muntu bebikitshi pabukopo? b
-
Opusha naminyi pabitale uno mueneno a Efile Mukulu?
Sunga muana mukashi e n’eyimi ataa muwa na muulo, e kumona’shi kukaasha eyimi nyi kioso kiadia kukita. Badika Yeeshaya 41:10, akupu nuisambile ino nkonko ailondo:
-
Su batakula muana mukashi pa bukopo bua kukatusha eyimi, nkunyi kuadia kuteka bukuashi? Buakinyi wamba biabia?
BANGI ABAMBA’SHI: “Muana mukashi e na matalua a kukumina kukatusha eyimi muanda mbindi ngiaye.”
-
Nkinyi akikushinkamisha’shi Yehowa ataa muwa wa nyina muana na muana e munda na muulo?
MU KIKOSO
Bible etulongiesha bua kuikala na kifulo, kanemo, na kukaluila kia buntu kia Yehowa kia muwa. Bino mbitale muwa wetu mpa na wa bangi.
Kuambuula
-
Buakinyi Yehowa ataa muwa wa muntu na muulo?
-
Yehowa apushaa naminyi nsaa i muntu aipa muntu naye?
-
Buakinyi we na lutumbu bua kia buntu kia muwa?
TALUULA DINGI
Tui kutumbula Yehowa naminyi bua kia buntu kia muwa?
Peta lualulo ku lukonko aluamba’shi, Efile Mukulu akafuila bana bakashi bakatushe mayimi lusa su?
“Bible akula kinyi pabitale kukasha eyimi?” (Muisambo wi mu Internete)
Longa bi mueneno a Efile Mukulu pabitale muwa biadi mulombene nkukuasha bua kusangula mushindo wa kukisha kapapi usha kutusha masaku.
“‘Kalashishi ka mbidi ke bukopo’—Kee kufuisha masaku su?” (Pasukayi!, 8/10/2000)
Bi kuikala naminyi su muntu e na binangu bia kuiyipa? Tala bukuashi abutusha Bible pa uno muanda.
a Yehowa apasukilaa ngofu baba batapikie ku mashimba. (Misambo 34:18) Apushaa bi dikienga dikuate muntu adimutakula mu kukimba kuiyipaa, na amukuasha. Bua kumona bukuashi buaye biabudi bukumbene kukita bia’shi muntu akatushe binangu bia kuiyipaa, tala muisambo awamba’shi: “Nakumina kufua Bible mulombene kunkuasha bua kukambila binangu bia kukimba kuiyipaa su?” wi mu kipindi akiamba’shi Taluula dingi mu dino dilongiesha.
b Baba babadi bakatushe mayimi ta mbalombene kutungunuka na kuitopeka bikishekishe, Yehowa mukumbene kuibafuila lusa. Bua kuuka mianda ibungi, tala muisambo awamba’shi: “Bible akula kinyi pabitale kukatusha eyimi?” wi mu kipindi akiamba’shi: Taluula dingi, mu dino dilongiesha.
Tala dingi
NKONKO YABAKAMBAA KWELA
Kulonga kwa Bible akukitshikaa naminyi?
Tala myaluulo ya nkonko itale programe etu a kulonga kwa Bible.
