Mulume na mukashi abakatuka mu kuiyibakishena abakumina’shi muloo wabapushaa efuku diabo dia bulunda ushaale bua loso. Na bi kukitshika. Bena Kidishitu beyibakishene takudi bipua bibungi na bakuete kuitatshisha bua kutumikila malango a mu Bible, abauku’shi bino bi kukitshika.

1. Bible apa balume malango kinyi?

Yehowa mmutule mulume bu mfumu a kifuko. (Badika Bena-Efeso 5:23.) Yehowa amutekie bua kuata bitshibilo abikuasha kifuko kiaye. Bible alungula balume’shi: “Fulayi bakashi benu.” (Bena-Efeso 5:25) Bino abikiebe kulesha kinyi? Mulume sha kifulo akitshinaa mukashi aye mianda na kalolo, pabadi ku nshibo kuabo sunga pabadi munkatshi mua bantu. Akitshi muaye moso bua kumukaluila ku masaku, na bua kumupuila nkalo yaye ya ku mbidi na ya mu binangu. (1 Timote 5:8) Ki na muulo ukata, amukuashaa bua kuikala na kipuano kibuwa na Yehowa. (Mateo 4:4) Bu kileshesho, mmulombene kuteka na kubadika Bible pamune na mukashi aye. Nsaa i mulume apasukila mukashi aye na kifulo, alama kipuano kiaye kibuwa na Yehowa.​—Badika 1 Mpyeele 3:7.

2. Bible apa bakashi malango kinyi?

Eyi di’Efile Mukulu adilungula mukashi’shi “aneemekie mulund’aye.” (Bena-Efeso 5:33) Mukashi e kuibikita naminyi? E kunangushena pabitale ngikashi ibuwa ya mulume aye, biakuete kumupasukila na kupasukila bana baye. Alesha dingi kanemo pa kukuatshishena bitshibilo biata na pa kuisamba naye na kalolo sunga biekla’shi mulume aye ta muina Kidishitu.

3. Mulume na mukashi mbalombene kunyingisha dibaka diabo naminyi?

Bible akula pabitale mulume na mukashi beyibakishene’shi: “Bubidi buabo abafiki mbidi imunenka.” (Mateo 19:5) Bino abilesha’shi, abitungu balue na mianda yoso ilombene kubofusha kifulo kiabo. Mbalombene kukita bino pa kuikala na kiubishi kia kukishanga nsaa pamune na pa kuisamba na kifulo kioso, na kuilungushena bi mu binangu na mu mashimba abo. T’abalekiela kintu kampanda sunga muntu kukaasha nka Yehowa buashi ekale na muulo kuabadi kukila muina dibaka naabo. Abapasukaa bikata bua kupela kuikala mu kipuano kikishekishe na ungi muntu shii muina dibaka naabo.

 TUKIMBUULE BOSO

4. Mulume​—fula mukashi oobe na kumupasukila

5. Mukashi​—fula mulume oobe na kumunemeka

Bible anyingisha mukashi bua kunemeka mulume aye, biabikala’shi alanguila Yehowa sunga kukutua kumulanguila. Badika 1 Mpyeele 3:1, 2, akupu nuisambile ino nkonko ailondo:

• Su we na mulume shalanguilaa Yehowa, kushii mpaka okumina’shi abangie kumulanguila. Omono’shi nkinyi kikumbene kukuasha ngofu nkumulambukisha misango yoso su nkuikala na muikelo wibuwa na kumulesha kanemo? Buakinyi wamba biabia?

Balume na bakashi mbalombene kuata bitshibilo bibuwa pamune. Anka, ingi nsaa mukashi e  kuikala na mueneno muilekene na a mulume aye. Yaya nsaa, e kulesha bi binangu biaye na luishinko na kanemo, kadi abitungu atentekieshe’shi, Yehowa mmupe mulume bushito bua kuata bitshibilo bibuwa bua kifuko. Abitungu akite muaye moso bua kukuatshishena bitshibilo bia mulume aye. Nsaa y’akitshi biabia, akuasha kifuko kioso kishima buashi kikale na muloo. Badika 1 Mpyeele 3:3-5, akupu nuisambile luno lukonko alulondo:

• Yehowa apushaa naminyi nsaa i mukashi alesha mulume aye kanemo?

6. We kukambila nkalakashi ya mu dibaka diobe

 MU KIKOSO

Mulume na mukashi be kuikala na muloo anka su mbefulene, abenemekieshena, na kukookiela mayi a kulonda a mu Bible.

Kuambuula

• Mulume e kukita kinyi bua’shi bekale na muloo mu dibaka diabo?

• Mukashi e kukita kinyi bua’shi bekale na muloo mu dibaka diabo?

• Su we mu dibaka, eyi kinyi dia kulonda dia mu Bible dilombene kunyingisha dibaka diobe?