Boso buetu atuikalaa bafule nfuadilo kampanda na mushindo kampanda wa kulumbula mbidi yetu. Su tuatumikila penda mayi apeela a kulonda a mu Bible, tui kusangula nfuadilo oso atukumina, kadi tuatungunuka na kusankisha Yehowa. Tubandeyi kutala angi a ku aa mayi a kulonda.

1. Mmayi a kulonda kinyi e kuitukuasha bua kusangula nfuadilo na mushindo wa kulumbula mbidi yetu?

Abitungu tusangule “nfuadilo a kineemo, tuilengieshe na kuidinga, na kuiyisha,” na kulama mmuenekielo ebuwa alesha’shi “tui balamate kui Efile Mukulu.” (1 Timote 2:9, 10) Tutaluule ano mayi a kulonda ananka: (1) Abitungu nfuadilo etu ekale “a kinemo.” Pangi tobomuene mu bisangilo bia ba Temwe ba Yehowa’shi, muilo wa Yehowa aufualaa mu mushindo wilekenelekene, kadi bilamba bietu na mushindo watutshibisha nyene sunga kuiyilukisha abileshaa kanemo bua Efile Mukulu atulanguila. (2) Kufuala na “kuidinga” akulesha’shi t’abitungu mmuenekielo etu ekale abusha lukalo lua masandi kui bangi, sunga kukaka binangu biabo kuatudi. (3) Atulesha “kuiyisha” patush’atulondo nfuadilo oso atuuku sunga mushindo wa kulumbula mbidi wi nao bantu bebungi. (4) Abitungu mmuenekielo etu ekale alesha’shi “tui balamate kui Efile Mukulu,” na’shi tukuete kulanguila Efile Mukulu a binyibinyi.​—1 Bena-Kodinda 10:31.

2. Mmuenekielo etu e kuikala na bukitshishi kinyi kui bena Kidishitu netu?

Sunga mbiatudi na bulungantu bua kusangula kiatufuala, abitungu tunangushene bukitshishi abuikala nabo mmuenekielo etu kui bangi. Atukitshi muetu moso bua kupela kukokosha muntu, anka atukimbaa bia ‘kusangasha [bakuetu] mu kukita kua bibuwa bua kuibanyingisha.’​—Badika Bena-Loma 15:1, 2, Kilombeno kipya 2014.

3. Mmuenekielo etu e kukaka bangi mu lulanguilo lua binyibinyi naminyi?

Sunga mbiatukitaa muetu moso bua kufuala kalolo nsaa yoso, abitungu tupasukile ngofu nfuadilo etu, bikishekishe nsaa y’atuende mu bisangilo na mu bulungudi. T’abitungu’shi mushindo w’atumueneka, ukumbe binangu bia bantu ku mukandu wibuwa w’atuibalungula. Anka, mmuenekielo etu, e kukaka bantu ku bia binyibinyi na “kupa bulambukishi bu’Efile Mukulu etu kinemo.”​—Tite 2:10.

 TUKIMBUULE BOSO

4. Mmuenekielo ebuwa alesha kanemo bua Yehowa

Nkabingilo kinyi kakata aketutakula bua kupasukila mmuenekielo etu? Badika Misambo 47:2, akupu nuisambile ino nkonko ailondo:

• Kuwuka’shi atulesha mpala ya Yehowa abitungu kuikale na bukitshishi kinyi ku nfuadilo etu?

• Opuandikisha’si bi na muulo kutalula mmuenekielo etu p’atuende mu bisangilo na mu bulungudi su? Buakinyi wamba biabia?

 5. Nkinyi ki kuitukuasha bua kuata bitshibilo bibuwa pabitale nfuadilo etu na biatumueneka?

Tala VIDEO.

Sunga bilamba bietu biekala bia muulo wi bukopo sunga bia muulo upeela, abitungu bikale na mankenda na bilombane bua mbalo yatudi na muyile mianda y’atukitshi. Badika 1 Bena-Kodinda 10:24 na 1 Timote 2:9, 10. Akupu, nuisambile buakinyi t’atukuminaa kufuala bilamba . . .

• bishii bilombane na bishi na mankenda.

• binane pa mbidi, abilesha bipindi bia mbidi, sunga kubusha binangu bia masandi kui bangi.

Sunga biekala’shi bena Kidishitu tabe ku Muiya wa Moyise, be kulongiela bi bungi ku wanka pabitale abinangushenaa Yehowa. Badika Miiya Ikituulwe 22:5, akupu nuisambile luno lukonko alulondo:

• Buakinyi abitungu tupele kufuala bilamba abimuesha bana balume bu bana bakashi, na bana bakashi bu bana balume?

Badika 1 Bena-Kodinda 10:32, 33, na 1 Yowano 2:15, 16, akupu nuisambile ino nkonko ailondo:

• Buakinyi abitungu tutaluule ngofu su mmuenekielo etu akokosha muntu mbalo yatudi sunga mu kakongye?

• Nfuadilo kinyi na mushindo wa kulumbula mbidi aukambaa kuikala mbalo yodi mushale?

• Omono’shi ingi ya ku yaya nfuadilo i kuikala ishii ilombene bena Kidishitu su? Buakinyi wamba biabia?

 MU KIKOSO

Nsaa y’atuata bitshibilo bibuwa pabitale nfuadilo etu na bi’atumueneka, atulesha’shi atunemeka Yehowa, mpa na bangi.

Kuambuula

• Buakinyi nfuadilo etu na bi’atumueneka bi na muulo ku meso kua Yehowa?

• Mmayi kinyi a kulonda e kuitukuasha bua kuata bitshibilo bibuwa pabitale biatumueneka?

• Nfuadilo etu na bi’atumueneka bi na bukitshishi kinyi kui bangi pabitale lulanguilo lua binyibinyi?