Patudi munkatshi mua bakuetu bena Kidishitu, atuipusha’nka bu Davide pabambile’shi: “Nyi muloo kinyi na mmwabi kinyi, wa kushaala pamune [mu buumune] buu beena-kifuko!” (Misambo 133:1) Buumune buetu ta mbufikie bu mpukapuka nya. Oso a kuatudi akuatshishena bua kuibulama.

1. Kinyi akikukanyisha munkatshi mua bafubi ba Yehowa?

Su wenda mu dingi eumbo, okatuela mu bisangilo bia kakongye, sunga topusha ludimi, kadi mu mishindo ibungi wepusha’nka bu’be ekuenu. Buakinyi? Muanda atufubisha mikanda imumune mbalo yoso bua kulonga Bible. Na atuitatshisha bua kuileshena kifulo ku muntu na muntu. Sunga tuekala bashale mbalo kinyi, atue boso ‘atutumbisha eshina dya Yehowa, na kumulangwila mu buumune.’​—Sefanya 3:9.

2. We kukita kinyi bua kulama buumune?

‘Efuleneyi ku muntu na muntu n’eshimba dimune.’ (1 Mpyeele 1:22) Mbikunyi biodi mulombene kutumikila dino elango? Pamutue pa kuimena’nka pa bilema bia bangi, kimba ngikashi yabo ibuwa. Pamutue pa kukishanga nsaa nka na bantu be na mianda i mumune na yobe, kimba bia kuka bakuetu balume na bakashi belekelekene. Abitungu tuitatshishe dingi bua kukasha binangu bioso bia ntondo biatudia kuikala nabio.​—Badika 1 Mpyeele 2:17. a

3. We kukita kinyi su we na kilumbu na mukuenu muina Kidishitu?

Tui mu buumune, anka atue boso tui bakutue kupuidika. Ingi nsaa atuluishisha bangi sunga kuibatapa ku mashimba. Biabia, Eyi di’Efile Mukulu aditulungula’shi: ‘Tungunukayi . . . na kwifwilena lusa muntu na mukwabo,’ adikumbasha dingi’shi: ‘Anka bu bibenufwidile Yehowa lusa, nanwe namu nukite’nka byabya.’ (Badika Bena-Kolose 3:13.) Atuluishisha Yehowa misango ibungi, anka, etufuila lusa. Etutekie namu natue buatudia kufuila bakuetu lusa. Su bomono’shi we mutape mukuenu kuishimba, ata mpango ya kupudisha wawa muanda.​—Badika Mateo 5:23, 24. b

 TUKIMBUULE BOSO

4. Kambila ntondo

Atukumina kufula bakuetu boso. Anka bi kuituikela bukopo bua kukumina muntu e na mianda ilekene na yetu. Nkinyi kilombene kuitukuasha? Badika Bikitshino 10:34, 35, akupu nuisambile ino nkonko ailondo:

• Yehowa akumina bantu boso buashi bekale ba Temwe baye. Bino bi kuikala na bukitshishi kinyi ku mmueneno etu a bantu abafiki mu ma mbalo elekenelekene?

• Mmianda kinyi ailesha ntondo ayikamba kuikala mu mbalo yodi mushale ayitungu’shi opele?

Badika 2 Bena-Kodinda 6:11-13, akupu nuisambile luno lukonko alulondo:

• Omono’shi we kukita kinyi bua kuifubuila pepi na bakuetu balume na bakashi ba tubila toso?

5. Fuila bangi lusa na kulama butale

Yehowa etufuila lusa n’eshimba dimune, sunga biashanekale na lukalo efuku su ndimune buashi tumufuile lusa. Badika Misambo 86:5, akupu nuisambile ino nkonko ailondo:

• Kalolo ka Yehowa ka kufuila bantu lusa ke naminyi?

• Opusha naminyi pabitale kalolo ka Yehowa ka kufuila bantu lusa?

• Mmu mianda kinyi muabidi bilombene kuituikela bukopo bua kulama butale na bangi?

Mbikunyi biatudia kuambula Yehowa na kushala mu buumune na bakuetu balume na bakashi? Badika Nkindji 19:11, akupu nuisambile luno alulondo:

• Su muntu akuluishisha sunga nkufitshisha munda, we kukita kinyi bua kulumbula mianda?

 Ingi nsaa atuluishisha bangi. Su biabia bietufula, abitungu’shi tukite kinyi? Tala VIDEO, akupu nuisambile luno lukonko alulondo.

• Mukuetu mukashi abatumono mu video bakitshi kinyi bua kualusha butale?

 MU KIKOSO

We kukuasha bua kulama buumune mu kakongye pa kufuila bangi lusa na kufula bakuetu boso.

Kuambuula

• We kukambila ntondo naminyi?

• We kukita kinyi su botupankana na mukuenu muina Kidishitu?

• Buakinyi okumina kuambula kileshesho kia Yehowa kia kufuila bangi lusa?