Bu bibadi muntu mupwidikye, Yesu tabakyengyele na twinyongoshi twi mumune na bangi bantu nya. Anka, badi etuulu pa mbalo ya bangi. Badi ekalakasha bwa bantu na kwibakitshina myanda kutabukila bibabidi abitungu. Lusa nyi lubadi alumutakula bwa kwibikita. Okasangana ino myanda mu shapitre 32, 37, 57, 99.

Bantu boso​—bakinga na bakulu—​abadi abefubwila pepi na Yesu mwanda tabadi etolola pa bupenka na kwilesha bu shi na nsaa sunga kwiata na kinemo kikile nya. Bu bibadi Yesu ekalakasha bikata bwabo, bantu abadi abapusha muloo kwikala naye. Pabitale uno mwanda tala shapitre 25, 27, 95.

Yesu badi na kyubishi kya kwela nteko ayikatukila mwishimba kwi Nshaye, pa bupenka sunga padi na balangwidi ba binyibinyi. Badi eele nteko misusa ibungi, kushi penda pa nsaa ya kudya nya. Badi eele nteko bwa kutumbula Nshaye, bwa kumutumbisha na kukimba buludiki kumpala kwa kwata bitshibilo bikata. Pabitale uno mwanda tala shapitre 24, 34, 91, 122, 123.

Yesu badi atulu nkalo yaye ku lupese bwa kukwasha bangi. Tabadi akimbi kubanda kwisankisha nya. Mmwitulekyele dingi kileshesho kyatudya kulonda mu uno mwanda. Longa byadi mwikale bu kileshesho mu shapitre 19, 41, 52.

Yesu tabadi penda mulongyeshe bya kufwidishena lusa nya—badi mwibileshe mu nshalelo aye na bolongi baye mpa na kwi bangi bantu. Nangushena pabitale bileshesho bi mu shapitre 26, 40, 64, 85, 131.

Abapwile kutemuka kumpala shi bena Yuda bebungi abakapele kukumina Yesu bu Mesiya n’ashi beshikwanyi abakakimbi kumwipaa. Byabya bibadya kutakula Yesu bwa kutshoboloka mu bibadi akitshi. Pamutwe pa byabya, badi mukalwile lulangwilo lwa binyibinyi na kishima kyoso. Mmulekye kileshesho kwi balongi baye boso bwa kwikala na kishima p’abafumankana na bantu bebashikwe sunga abebakyengyesha. Tala shapitre 16, 72, 103.

Yesu badi mutabukile bantu bashi bapwidikye mu myanda ibungi, bu mu kiukilo na mu tudingi. Kupwidika kwaye kubamupele ngobesha ya kwikala na bukome bwa ku mbidi na kinangu kukila bantu boso. Anka badi afubila bangi na kwiyisha. Okapete malongyesha pabitale uno mwanda mu shapitre 10, 62, 66, 94, 116.

Yesu badi na lwishinko kwi batumibwa baye na bangi pababadi abakutwa kulonda kileshesho kyaye na kufubila byakula. Badi alushena na lwishinko loso malongyesha ababadi nao lukalo bwabadya kwifubwila pepi na Yehowa. Tala bibadi Yesu muleshe lwishinko mu shapitre 74, 98, 118, 135.