Takudi binobino mafuku asatu kasha Natanaele afika umune a ku balongi ba Yesu ba kumpala. Yesu na bapeela ba ku balongi ba kumpala abayile kunundu kwa nsenga ya Ngalileya, ku kibundji kyabo kya butandwa. Abadi abende ku Kana, ku ba Natanaele. Kana nkibundji ki mu myengye i kunundu kwa Nazarete kubadi Yesu nabeene mukudile. Abadi bebayitanyine ku musangeelo wa bulunda mu Kana.

Maadiya nyina’ye na Yesu bafikile naye ku musangeelo. Bu bibadi Maadiya loole a beena dibaka, abimweka shi naye namu badi mu bantu abakwashanga mu kupasukila beenyi bebungi. Byabya, bamwene bukidi shi maalwa abapu, aye nkulungula Yesu shi: “Ta be na malofu a nfinyo nya.”—Yowano 2:3.

Maadiya badi apwandjikisha shi Yesu e kukita kintu kampanda bwa maalwa abaapu. Yesu badi mumwaluule na mayi aalesha bibadi mupele shi: “Wandji noobe ngunyi mukashi’be?” (Yowano 2:4) Bu bibadi Nfumu musangulwe n’Efile Mukulu, midimo ya Yesu ibadya kukunkushibwa na Nshaye e mwiyilu kushii beena kifuko sunga ba kuuku baaye. Maadiya badi mulekye wawa mwanda na kinangu mu maasa a mwan’aye pa kulungula penda bafubi shi: “Kyoso kyenulungula ekikiteyi.”—Yowano 2:5.

Pabadi malondo asamombo abadi aatwele milangi 40. Yesu nkulungula bafubi shi: “Uushayi malondo ano na meema.” Akupu Yesu nkwamba shi: “Binobino tapulayi nutwadile mukata a kidibwa ky’ebambo ndambo.”—Yowano 2:7, 8.

Mukata a musangeelo badi mukaanyishe buwa bwa nfinyo kushii kuuka shi abeyituusha ku kilengyeleshi. Badi mwitanyine mulume amulungula shi: “Bantu booso abadilaa kutuusha malofu e buwa, byabya apabanga kukwatshika bantu, batushe ebuwa bushadile. Ank’obe bolama malofu ebuwa mpaa na ku binobino!”—Yowano 2:10.

Kino kibadi kilengyeleshi kya kumpala kya Yesu. Pabamwene balongi baaye kino kilengyeshi, lukumiino lwabo mwadi lubanyingile. Kunyima, Yesu, nyina’ye na beena baaye abayile ku Kapernaume dya kunundu kwa kutunduka kwa kyese kya Kalunga ka Ngalileya.