Kunyima kwa mafuku 40 mu kabaaka na kumpala kwa kwenda ku Ngalileya, Yesu babanda kwalukiila kwi Yowano badi mumubatshishe. Pabadi Yesu mwifubwile kwadi, Yowano bamufunkile na kwakula shi: ‘Talaayi Mwana a mukooko Efile Mukulu ashimisha milwisho ya ba pa nsenga! Mbwaye bunaadi mwambe shi: “kunyima kwande akufiki muntu muntabukile mwanda kumpala kwande aye badi kwanka.”’ (Yowano 1:29, 30) Sunga byekala shi Yowano badi mukulu aaye, badi mushinkamishe shi Yesu badi kumpala kwaye bu kipangwa kya mu kikudi mwiyilu.

Mbingo ipeela kumpala pabafikile Yesu bwashi bamubatshishe, Yowano tabadi mushinkamishe shi Yesu nyi badi Mesiya. Yowano atentekyesha shi: “Ntshinaadi namuuku nya, anka ne mufikye mu kumufumbula kwi beena Isaleele pa kubatshisha bantu mu meema.”—Yowano 1:31.

Binobino Yowano badi na kya kulondela bantu abadi abamuteemesha bibadi bikitshikye pabadi mubatshishe Yesu shi: “Namwene kikudi akiiki mwiyilu bu nkudimba, akyo nkushaala pa mbidi paaye. Ntshinaadi namuuku nya, anka Bantumine mu kubatshisha bantu mu meema Nnaye, badi mundungule shi: ‘Yawa omono kikudi akiikila na kushaala pa mbidi paaye, nnaye abatshisha mu kikudi kiselele.’ Ami namu nemwibimone, dingi nashinkamisha shi aye nyi mMwan’Efile Mukulu.”—Yowano 1:32-34.

Yowano badi na balondji baaye babidi butookye pabadi dingi Yesu mwifubwile kwadi. Yowano bakwile shi: ‘Talayi Mwana a mukooko eEfile Mukulu!’ (Yowano 1:36) Kubanga nka paapa, baaba balondji babidi ba Yowano Mubatshishi ababangile kulonda Yesu. Umune a kwabadi badi Andree. Bi kwikala shi ungi a kabidi nyi nguno bafundjile uno mwisambo abetamina dingi bu Yowano. Abimweneka shi uno Yowano mwana a Salomee badi mukwabo na Yesu. Pangi, Salomee mukashi a Zebedee badi mukwabo na Maadiya.

P’aye kwialuula na kumona Andree na Yowano abamulondo, Yesu bebayipwishe shi: “Nkinyi kyanukimbi?”

Abo nkumwipusha shi: “Rabi . . . we mushalele kunyi?”

Aye nkwibalungula shi: “Fikaayi, anukamono.”—Yowano 1:37-39.

Bibadi pangi bu mu nsaa ya kananka ya kunyima kwa midi, Andree na Yowano abashadile na Yesu mu dyadya efuku. Andree bapushishe muloo ukata pabapetele mukwabo Simone abetanyina dingi bu Mpyeele, amulungula shi: “Tubamono Mesiya.” (Yowano 1:41) Andree nkutwala Mpyeele kwi Yesu. Myanda ibadikile kunyima ayilesha shi Yowano namu bapetele mukwabo Shake aye nkumutwala kwi Yesu; anka Yowano tamupatuule myanda yooso mu myanda ibafundjile nya.

Efuku dibalondele, Yesu bapetele Fidipe badi akatukila ku Betsaida. Kubadi pabwipi na kyese kya kunundu kwa Kalunga ka Ngalileya mu kibundji  kya butandwa kya Andree na Mpyeele. Yesu badi mwitanyine Fidipe amulungula shi: “Ndonde.”—Yowano 1:43.

Akupu Fidipe nkupeta Natanaele ayitanyinwa dingi bu Bartelemi, aye nkwamba shi: “Yawa abadi besambe mu mukanda wa bishila wa Moyiise na mu Bifundwe bya Batemuki, tubaamumono: Nyi Yesu mwana a Yoosefe a mu Nazarete.” Natanaele beleeshe mpaka na kwakula shi: “Ku Nazarete nkulombeene kutuuka kintu kibuwa su?”

Fidipe nkumulungula shi: “Fika okamone.” Yesu batadile Natanaele badi afiki kwadi akula shi: “Talayi mwina Isaleele a binyibinyi sha munda mushii kilubilo.”

Natanaele nkumwipusha shi: “Onguukila kunyi?”

Yesu nkumwalula shi: “Kumpala kwa Fidipe takwitanyiine, paapa poboodi muushy’a mutshi wa figiyee, naadi mukumone.”

Natanaele nkumwaluula na kukaanya shi: “Rabi, we Mwan’Efile Mukulu; we Mulopwe a Isaleele.”

Yesu nkumwipusha shi: “Mwanda nakulungula shi naadi mukumone muushi a figiyee bokumiina. Okamono bintu bikile paapa bukata.” Akupu Yesu nkukumbasha shi: “Anumono eyilu dishitukye, na miikeyilu y’Efile Mukulu ayikamina yayikanga pee Mwana a muntu.”—Yowano 1:45-51.

Kapindi kapeela kunyima kwa ino myanda, Yesu pamune na balondji baaye bapya bakatukile Ebanda dya Yoordano eenda ku Ngalileya.