Bafadisee tababadi abakumina shi Yesu nyi babuula uno muntu mutandikwe mpofu meeso, nyi bwakinyi abadi betamine bamutande. Bamutande abapushanga moo shi mbalombeene ‘kwibabinga mu nshibo ya nteko.’ (Yowano 9:22) Kwakwa kubingibwa munkatshi mwa beena Yuuda kubadya kwibafwishila masaku eebungi na kifuko kyabo.

Bafadisee nkwibepusha nkonko ibidi shi: “Uno muntu mmwana eenu biinyibiinyi, naa anwamba anwe’shi mmutandwe mpofu su? Paapa mbii-kunyi byaamono binobino?” Bamutande abamwalulwile shi: “Atushinkamisha eyendo shi uno mmwana eetu, dingi mutandwe mpofu. Taatuuku shi mbikunyi bitaamono binobino, sunga’shi nnanyi mumubuule meeso nya, taatumuuku’twe.” Sunga byekala shi mwan’abo badi mwibalungule bibadi bikitshikye, bamutande abadi na budimu p’abo kwibaluula’shi: “Mwipusheeyi, taadi mukulu. Mmulombeene kwinupatulwila aye nabeene mwanda waye.”—Yowano 9:19-21.

Byabya, Bafadisee abadi beetamine yawa muntu kunyima na kumukamika p’abo kwamba shi be na bishinkamisho shi ta Yesu ba mubuula meeso pa kwakula shi: “Pa Efile Mukulu ntumbo, atwe atuuku shi uno muntu nkitshishi a milwisho.” Bu bibadi apele kutwelakana mu myanda yabo, yawa muntu badi mpofu bakwile shi: “Ntanguuku su nsha milwisho; naawuku penda kintu kimune: naadi mpofu, binobino nkwete kumona.”—Yowano 9:24, 25.

Bafadisee tababadi bakumine kuleka uno mwanda nya, abatungunukile shi: “Bakukitshina kinyi? Bakubuula meeso bii kunyi?” Yawa mpofu banyingile eshimba ebalungula shi: “Nee mupwe kwinulondela byanka, anka tanwibanteemeshe. Anukyebe kwibipusha ungi musuusa bwa kinyi? Anwe naamu nwi na lukalo lwa kwikala balongi baye su.” Na sungu yooso, Bafadisee abambile shi: “Obe we mulongi aaye! Atwe, twi balongi ba Moyiise. Atuuku shi Efile Mukulu bakwile naa Moyiise; ank’aye taatuuku kwadi mutuukye!”—Yowano 9:26-29.

Uno muntu badi atekye ka palusa bakanyine, aye nkwakula shi: “Eyendo wawa ngi mwanda wa kuukanya biinyibiinyi, panushyanuuku kwadi mutukye, aye mbambuula meeso.” Akupu badi mutushe mweneno ebuwa pabitale bantu babapushishaa kwi Efile Mukulu na badi mukumine shi: “Atuuku’shi Efile Mukulu taatemeesha basha-milwisho; anka, su muntu mmuule na kikudi, su akitshi kyakyebe, Efile Mukulu amuteemeshaa. Kashaa tatwapushiishe abamba’shi muntu mmubuule meeso a mpofu a ku butandwa.” Bino bibebatakwile mu kufudiisha shi: “Su uno muntu taamufikye kw’Efile Mukulu tabady’a kwikala mulombeene kukita kintu su nkimune.”—Yowano 9:30-33.

Bafadisee abakutshilwe bya kupela kinangu kya yawa muntu badi atekye ka pa lusa p’abo kumushikwila shi: “We’nka penda mu milwisho, kubangila ku butandwa bwobe, byaabya bofiki mu kwitulambukisha?” Ngi’bo nkumusumbula paasha.—Yowano 9:34.

Pabadi Yesu mupushe bibadi bikidikye, bakakimbile yawa muntu badi mpofu amwipusha shi: “Okumina mwi Mwan’a muntu’nyi?” Yawa muntu abadi mupaashe balulwile shi: “Nnanyi, mwanaana, bwa’shi mmukumiine?” Bwa kupwa mpaka yooso Yesu bamwalulwile shi: “Tala, boomumono, nguno a kwisambisha.”—Yowano 9:35-37.

Yawa muntu nkumwaluula shi: “Naakumiina, Mwanaana.” P’aye kulesha lukumino na kaneemo, yawa muntu badi mukuname kumpala kwa Yesu badi mumulungule bino bishima shi: “Neemufikye pano bwa kiimu, bwa’shi bashibadi abamono bamone, na bwashi abadi abamono bafikye ba mpofu.”—Yowano 9:38, 39.

Bafadisee abadi paapa, abaukanga’shi tababadi ba mpofu nya. Kadi twi kwamba naminyi byabadi abeamba shi mbakunkushi ba myanda ya mu kikudi? Abepwishe na kwikalwila shi: “Byaabya atwe naamu twi ba mpofu su?” Yesu bebalulwile’shi: “Su nubady’a kwikala ba mpofu, tanubady’a kwikala na milwisho. Anka binobino anwamba’shi: ‘Atumono’ byaabya nukii mu milwisho.” (Yowano 9:40, 41) Bu byabadi balambukishi mu Isaleele, tabee na kabingilo su nkamune ka kupela kukumiina’shi Yesu bu Mesiya nya. Kadi muyile kiukilo kyabo kya Miiya, kupela kumukumina kubadi mulwisho ukata.