Pabadi Yesu adi mu nshibo ya Mufadisee, binunu bya bantu bibadi abimutengyela paasha. Badi na mwanda wi mumune na ubadi nao kibumbu mu Ngalileya. (Maako 1:33; 2:2; 3:9) Muno mu Yudeya bantu bebungi abakimbi kumona Yesu na kumutemesha, abalesha mwikelo wilekene na ubalesheshe Bafadisee pa kudya.

Kibadi Yesu mwakule kumpala kibadi na kipatulwilo ki pa bwakyo kwi balongi baye. Bakwile shi: “Dimukaayi na kitatusho kya Bafadisee” kikale bunsesa. Yesu badi mutuushe dino elango kumpala, kadi bibamwene pa kidiibwa bibalesheshe muulo ubadi nao dino elango. (Luka 12:1; Maako 8:15) Mwanda Bafadisee abamwenekanga bu abafwila bantu lusa, nyi bwakinyi bibatunganga kulesha bubi bwabo. Yesu bakwile shi: “Takwi kifwame su nkimune kishyaakisokolwa, takwi kifiibwe su nkimune kishyaakyuukiibwa.”—Luka 12:2.

Pangi bebungi ba ku bantu abatemeeshanga Yesu abadi beena Yudeya bashibadi bamupushe kwalongyesha mu Ngalileya. Nyi bwakinyi badi mwalushene myanda ikata ibapwile kwakula. Balungwile booso abadi abamuteemesha shi: “Tanutshiinanga abayipaa mbidi, anka kunyima kwa byabya, tambalombene kukita kintu su nkimune kikile paapa.” (Luka 12:4) Nka bu bibakitshine kumpala, bashimikile kasele bwa shi balongi baye bakulupile Efile Mukulu, aye akebakalwila. Abadi lukalo na kiwukilo kya Mwana a muntu na kushinkamisha shi Efile Mukulu e kwibakwasha.—Mateo 10:19, 20, 26-33; 12:31, 32.

Akupu ungi muntu mu kibumbu batushishe kinangu musango umune shi: “Mulambukishi, lungula mukwetu mulume bwa’shi twiabeene bintu byetu bya bupyanyi.” (Luka 12:13) Mwiya ubaleshanga shi mwana mbedi apete kya pabidi kya bupyanyi, nyi bwakinyi takubadi mwanda wa kwikakeena nya. (Miiya Ikituulwe 21:17) Abimweneka shi uno muntu bakimbanga bikile bibadi nabyo matalwa a kupeta. Yesu bapelele na kinangu kya kwikala ku lupese lwaye. Bamwipwishe shi: “Naanyi muntuule bu nsushi eenu sunga bwa kwinwabila bintu?”—Luka 12:14.

Akupu Yesu batushishe elango bwa booso shi: “Elameeyi ku lwabi mwanda muuwa wa muntu tawi mu bupeta bwaye, sunga eekala na bintu bikile bungi.” (Luka 12:15) Sunga muntu eekala na bupeta bwi naminyi, dingi efuku lufu alumukwata na kwibileka byoso. Yesu ashimika kasele bwa wawa mwanda na kileshesho akileesha muulo wa kwikala n’eshina dibuwa kumpala kw’Efile Mukulu pa kwibalondela shi:

“Kubadi muntu mpeta, bapetele bintu biibungi mu mafuba aaye. Badi eeyipusha’shi; ‘Nkite kinyi? Mwanda ntshi na pa kutuula byandi muwumbule.’ Akupu aye nkwamba shi, ‘Abintungu mpomone bisasa byande, ngibakye bikile bukata, nneemutuule ntete yande yooso na bingi bintu byande, kunyima nneelungule, ami nabeene’shi: “Ngyaw’obe na bintu mutuuto bilamiibwe bwa bipwa biibungi, ikisha, odye, otome, otunkume.”’ Anka Efile Mukulu nkumulungula’shi; ‘Mutshikame’be! Anka bwinyi buno bufuku, abakutekye muwa wobe, byabya byoodi mulumbuule, nnaanyi ashala nabyo?’ Byabya ngi abikakitshikila yaawa alama bupeta bw’aye nabeene pamutwe wa kwibulamin’Efile Mukulu.”—Luka 12:16-21.

Balongi ba Yesu na bangi bantu abapushishe ano mayi, abadi na kya kwikala mu muteo p’abo kukimba sunga kuwungwisha bupeta. Sunga’shi kwikalakasha bwa nshalelo aabo kubadi na kya kwibakatusha binangu mu kufubila Yehowa. Nyi bwakinyi Yesu badi mwalushene aa malango ebuwa abadi mwisambile mu mwisambo wa kumwengye takudi kipwa na kipindji, bebalungwile shi:

“Tanwikalanga mashimba kwiyilu p’abitale muuwa wenu, bwa kuuka’shi anudi kinyi, naa bwa mbidi yeenu’shi anufwala kinyi . . . Beekyeelaayi  byoonyi bya manganga; taabikunaa sunga kuumbula, tabii na nshibo sunga kisasa kya kulamina; ank’Efile Mukulu eebidiishaa. Misuusa bungi kinyi yanudi bakile toonyi ku kineemo! . . . Beekyeelaayi bilongo taabiteelaa bilamba, sunga kuluka; anka neenulungula shi sunga winyi Salomone, mu nkumo yaaye yooso, tammufwale kalolo bu kimune kya kubyanka . . . Tanwiyipushanga kyanudi, sunga kyaanutomo, tanwikulupilanga. . . . Nsheenu auku’shi nwinabyo lukalo . . . Badilaayi kukimba Bufumu bwaye, na byabya bingi abakeenukumbeesha byanka.”—Luka 12:22-31; Mateo 6:25-33.

Mbannanyi bee na kya kukimba Bufumu bw’Efile Mukulu? Yesu alesha shi nyi kasaka kapela, ako kekale “lombe lupeela,” lwa bantu basha lulamato abakatungunuka na kukita byabya. Kunyima abafikile mu kufumbula shi be bungi bwa bantu 144 000. Nkinyi akibatengyela? Mbekale na kishinkamisho kya Yesu badi mwibalungule shi: “Nsheenu ee na muloo wa kwinupa Bufumu.” Abo tabetatshisha bwa kupeta bupeta pa nsenga, palombene bangifi kwiba. Pamutwe pa byaabya mashimba aabo aakekala na kya adya kukimba “bupeta bwa mwiyilu bushyaabulwilaa,” mwabakamunana na Kidishitu.—Luka 12:32-34.