Pabadi Yesu kii pabwipi na Yelusaleme, beena Yuuda bebungi abadi bamutundayishe. Bangi abakimbanga kulonga myanda kwadi, bangi abakimbanga kumutompa. Ungi mulambukishi a bishila bafikile bwa kutompa Yesu amulungula shi: “Mulambukishi, nkinyi kipwandjikiile naakita bwa kupeta namu muwa wa looso?”—Luka 10:25.

Yesu baukile shi yawa muntu teepusha penda bwa kuuka nya. Pangi badi ayipusha penda bwa kutompa su Yesu asabuula beena Yuuda. Yesu bapwile kumona bibadi binangu bya yawa muntu. Binobino balulwile na kinangu bwa shi yawa muntu atuushe bi mu mwishimba dyaye.

Yesu bamwipwishe shi: “Mu mukanda wa bishila mbafunde naminyi? Nkinyi kyodi mubale?” Yawa muntu badi mulongye Miiya y’Efile Mukulu, aye nkutuusha lwaluulo lwaye mu yanka. Yawa muntu nkutemuna Miiya Ikituulwe 6:5 na Beena-Levi 19:18, pa kwakula shi: “‘Ofule Efile Mukulu oobe n’eshimba dyoobe dyooso na kikudi kyoobe kyooso na bukome boobe booso na binangu byobe byooso, ofule na muntu noobe bu byoodi mwifule obe nabeene.’” (Luka 10:26, 27) Nyi bibadi lwaluulo lwaye su?

Yesu balungwile yawa muntu shi: “Bwaluula kalolo, kita byaabya ngii opete muwa wa looso.” Mwisambo ubadi wimeene paapa su? Yawa muntu tabadi akimbi penda lwaluulo bisumanga nya; badi akimbi “kwileesha bu mululame,” bwa kushinkamisha shi mweneno aaye badi ebuwa na kwibalanganya mu kipaso kibadi akitshiina bangi myanda. Ngi aye nkwipusha shi: “A muntu-naami naamu nnanyi?” (Luka 10:28, 29) Luno lukonko alupushika nka bu lubofule, aku namu lwi na myanda ibungi. Mu kipaso kinyi?

Beena Yuuda abadi abauku shi kishima “muntu noobe” nkitale nka penda baba abanemeka bipikwa bya beena Yuuda, na bibadi abimweneka shi mukanda wa Beena-Levi 19:18 ubadi aukwatshishena yawa mweneno. Nyi bwakinyi mwina Yuuda badi mpa na kya kumona shi “bi kishila” kwikala mu kipwano na mwina Yuuda. (Bikitshino 10:28) Byabya, yawa muntu pangi mpa na bangi ba ku balongi ba Yesu abamonanga bu bibuwa kukitshina bakwabo beena Yuuda myanda na kalolo. Anka abadya kukitshina muntu shii mwina Yuuda biibubi mwanda taamwikale ‘muntu naabo’ a binyibinyi nya.

Nkipaso kinyi kibadi Yesu muludikye uno mweneno kushi kutapa yawa muntu sunga bangi beena Yuuda ku mashimba? Bebikitshi pa kwibalondela uno mwanda: “Muntu kampanda badi atukila ku Yelusaleme mutadile ku Yeeriko, aye nkukwatshiibwa kwi bantomboshi; pababapwile kumunyenga bintu na kumukupila, babayiile abo nkumuleka peepi na kufwa.” Yesu atungunuka shi: “Anka peenyi paapa, tshiite-mwakwidi kampanda badi akiila mu dyady’eshinda pabamwene yawa muntu bakidiile ku bula. Mwina Levi bafikile naamu yaaya mbalo, aye nkumona yaawa muntu, nkumukila ku bukunkula. Mwina Samariya naamu badi mu lwendo, pabafikile peepi na yaawa muntu, bamumwene , aye nkumupusha lusa.”—Luka 10:30-33.

Yawa muntu abalondelanga uno mwanda kwi Yesu baukanga ba tshiite mwakwidi na beena-Levi bebungi abafubanga ku ntempelo bashalele mu Yeeriko. Bwa kwalukila ku ntempelo abadi na kya kwalaala mwishinda di bula bwa bilometre 23. Dyadya eshinda dibadi na kya kwikala masaku mwanda wa bangifi. Su tshiite mwakwadi sunga mwina Levi bapete mukwabo mwina Yuuda mu malwa, tabadi na kya kumukwasha su? Mu mwisambo waye, Yesu balondele shi tababakitshine byanka nya. Muntu bebikitshine badi mwina Samadiya, muntu ababadi ababepuula kwi beena Yuuda.—Yowano 8:48.

Mwina Samadiya bakwashile mwina Yuuda mutapikye naminyi? Yesu atungunuka shi: “Beefubwile peepi, aye nkwanya malonda aaye, kuunyima kwa kwimupungolwela mwimu na nfinyo. Aye nkumutenteka pa mpunda aaye’ye nabeene, nkwenda naaye ku nshibo ya beenyi, aye nkumutuula. Pababutookyele, batshile bitadi bibidi bya nfwalanga, aye nkwibipa nsha nshibo ya beenyi, nkumulungula shi: ‘Mulame kalolo, su otuusha kantu ka kukumbasha, naakwalwisha kaanka pankealusha dimo.’”—Luka 10:34, 35.

 Kunyima kwa kumulondela uno wisambo, Yesu Mulongyeshi Mukata bayipwishe uno muntu lukonko bwadya kutuusha binangu byaaye shi: “Byabya, ku bano bantu basatu, mu kwobe kumona, mwileeshe bu muntu naaye na yawa batapilwe kwi bantomboshi nnanyi?” Pangi yawa muntu bakookyele mbidi pa kumwalula shi “mwina Samadiya,” nyi’ye nkwaluula Yesu shi: “Nguno bamukitshine kalolo.” Binobino Yesu nkumupa dilongyesha dya uno mwanda ushi bya kwelesha mpaka shi: “Nda, oobe naamu, okite byaa-mumune.”—Luka 10:36, 37.

Ubadi mushindo ukile buwa wa kulongyesha! Su Yesu badya penda kulungula yawa muntu shi, bantu bashii beena Yuuda mbantu naaye, yawa muntu na bangi beena Yuuda abamuteemeshanga abadya kukumiina su? Nya, pangi tababadya kukumiina. Byabya, p’aye kulonda penda mwanda upelepele na kwiupatuula kalolo, abamuteemesha abadya kupeta kalolo lwaluulo ku lukonko lwa shi: “A muntu-naami naamu nnanyi?” Muntu badi mwileshe bu muntu naaye a binyibinyi nguno balesheshe kifulo na kalolo aketutekye Bifundwe bwa kulesha.