Musoko wa Betanii ubadi dya kutunduka kwa Mwengye wa Olive mu bilometre bifikye ku bisatu. (Yowano 11:18) Yesu pabayile kwakwa batwelele mu nshibo mubadi bana bakashi babidi, Maata na Maadiya. Abo na mukwabo mulume Lazaare abadi bakuuku ba Yesu, abo nkumukuukila kalolo.

Bibadi kineemo kikata kya kukukila Mesiya bu mwenyi. Maata badi eekalakasha bwa buwa bwa Yesu pa kwipaana mu kufuba na mu kuteeka bidiibwa bibuwa. Pabafubanga Maata, mukwabo mukashi Maadiya badi mushaale ku ngwa kwa Yesu bwa kumuteemesha. Yaaya nsaa, Maata balungwile Yesu shi: “Mwanaana, bino taabikukitshi kintu apandekye mukwetu mukashi bupenka ku mufubo? Byabya, mulungule bwa kunkwasha.”—Luka 10:40.

Pamutwe pa kutopeka Maadiya, Yesu bapa Maata elango bwa bibadi mwipaane bikile ku bintu bya ku mbidi pa kumulungula shi: Maata “Maata okalakala na wekupilakupila bwa bintu biibungi, kwi’nka kintu kimune kii na mwanda. Maadiya basangula kikile buwa, kyakya kishyaakikamwatshiibwa.” (Luka 10:41, 42) Eyendo, pano Yesu aleesha shi tabii na muulo kukisha nsaa ikile mu kuteeka bidiibwa bibungi. Penda kidiibwa kimune kibadya kulombana.

Binangu bya Maata bibadi buwa. Bakumiinanga kwikala na kalolo. Kadi kwikalakasha kwaye bwa bidiibwa kubaleshanga shi kwete kukutwa bulambukishi bwi na muulo bwa Mwan’Efile Mukulu! Yesu ashimika kasele shi Maadiya batshile kitshibilo kibuwa akimutwadila myabi ayiyisha, na mbikale dilongyesha dyatudya kutentekyesha atwe booso.

Mu ungi musango, Yesu batushishe dilongyesha dilekene kadi dii na muulo ukata. Umune a ku balongi bamwipwishe shi: “Mwanaana, etulambukishe bya kuteka, bu bibadi Yowano mulambukishe balongi baye.” (Luka 11:1) Yesu bapwile kwibikita takudi pangi kipwa kunyima mu Mwisambo waye wa ku Mwengye. (Mateo 6:9-13) Byabya, bi kwikala shi pangi yawa mulongi tabadi panka nya, nyi bwakinyi badi mwambuule penda myanda ikata. Akupu batushishe kileshesho bwa kushimika kasele pa lukalo lwa kunyingiila mu nteko.

Bambile shi: “Su umune a kwanudi aikala na kuuku, byabya enda mu kumumona munkatshy’a bufuku bwa kumulugula shi: ‘Kuukw’ande, ngiyapushe mikate isatu, mwanda ungi kuukw’ande bafiki ku lwendo, anka ntshii na kintu kya kumupa.’ Su yaawa amwaluula’shi: ‘Tonkalakashanga! Binobino kiibi nkishitwe, bana bande n’ami nabeene twi balaale, ntampusha bya kubuuka bwa nkupa mukate.’ Byaabya neenushikwila’shi, sunga taabuuku bwa kumupa wanka ku mwanda wa buukuuku bwabo, abuuku bwa kumupa byooso byaadi nabyo lukalo, mwanda wa kupela lukalakashi.”—Luka 11:5-8.

Yesu t’alesha shi Yehowa eetwalulaa nka penda twanyingiila bu yawa kukwa’ye nya. Anka kwete kulesha shi su kuuku shyakumina e kukumina pa mwanda wa kunyingiila kwa mukwabo, Nshetu sha kifulo a mwiyilu eekala na kya kwalula ku nteko ya bafubi baye ba-sha lulamato ayikatukila kwishimba! Nyi bwakinyi Yesu akula shi: “Tekaayi, anukapeebwa, kimbayi, anukapete, kookolaayi, abeenushitwila. Mwanda ooso atekye akapete, akimbi akamono na akookola abamushitwila.”—Luka 11:9, 10.

Binobino Yesu alesha kwipushena pa kutusha kileshesho kya nambutwile shi: “Nambututwile mulume kinyi, munkatshi mwenu, a kukit’ashi su mwan’aye amuteka mushipa, mmulombeene kumupa nyoka pa mutwe pa mushipa? Sunga dimo shi, su amuteka eyi, nga kumupa kaminu? Byabya, su anwe beebubi anuwuku kupa bana beenu bintu biibuwa, nkipaso kinyi kilombene Yaaya a mwiyilu kukutwa kupa kikudi kiselele kwi baba abamutekye kyanka?” (Luka 11:11-13) Kibadi kishinkamiisho kikile buwa ky’ashi Nshetu e mwiyilu akumiina kwituteemesha na kwaluula ku nkalo yeetu!