Yesu bapwile kwikala muwukiibwe kalolo kubangila nka mu bipwa bibadi mupete lubatshisho. Binunu bya beena Yuuda abapu kumona bilengyeleshi byaye na abatwala mikandu ya mifubo yaaye mbalo yooso. Binobino, bantu bebungi abadi abamukimbi ku Yelusaleme ku musangeelo wa Tushibo twa mapema.

Bantu bee na mmweneno ilekeene pabitale Yesu. Kwi abadi abakula shi: “Mmuntu ebuuwa.” Bangi namu shi: “Nya. Anka kwete kulubisha kibumbu.” (Yowano 7:12, Kilombeeno kipya 2014) Abadi abesamba ibungi ya ku ino miisambo mu muladilo wa musangeelo. Anka takubadi su ngumune a kwabadi badya kwiyakula patooka pabitale Yesu, mwanda abatshinanga bibadya kukita bakata ba beena Yuuda.

Munkatshi mwa musangeelo, Yesu batwelele mu ntempelo. Bantu bebungi abakaanya ngobesha yaaye ya kulambukisha kalolo. Tabadi mutwele mu bilongyelo bikata nya, nyi bwakinyi beena Yuuda abeyipushanga shi: “Mbii-kunyi byaadi na kuuka kukata [kwa Bifundwe], aye shii mulongye?”—Yowano 7:15.

Yesu nkwibapatulwila shi: “Kulambukisha kwande taakufiki kwandi, anka kwi yaawa muntume. Su muntu akitshi akikyebe Efile Mukulu, ashinguula su kuno kulambukisha kwande akufiki kwi Efile Mukulu sunga’shi neakwila ami nabeene.” (Yowano 7:16, 17) Bulambukishi bwa Yesu bubadi mu kwipushena na Miiya y’Efile Mukulu, nyi bwakinyi abilesha shi badi akimbi ntumbo y’Efile pamutwe pa yaaye.

Akupu Yesu bambile shi: “Moyiise badi mwinupe Mukanda wa bishila? Kutala munkatshi mwenu, tamwi muntu afubila bii mu Mukanda wa bishila. Anukimbi kungipaisha bwa kinyi?” Bangi mu kibumbu, pangi abadi beenyi mu kibundji abalubile kwitatshisha kwaye. Abimweka mwanda wa kukaanya kwabadi bwa shi kwi kwikala muntu e kukimba kwipaa mulongeshi bu Yesu. Nyi bwakinyi, abatshibile shi Yesu e kwikala na mwanda wibubi p’aye kwakula byabya. Abambile shi: “Mbakukwate kwi kafilefile! Akimbi kukwipayisha nnanyi?”—Yowano 7:19, 20.

Takudi kipwa na kipindji kunyima, bakata ba beena Yuuda abakimbile kwipaa Yesu pabapashile muntu mwifuku dya Sabato. Binobino Yesu batuusha kinangu kya kwiboolomona na kuleesha kukutwa kwabo kwa binangu. Bakaka binangu pa kwamba shi muyiile Mwiya, be kusala mwana tooka mwifuku dya mwanda sunga mwifuku dya Sabato. Aye nkwibepusha shi: “Byabya, su muntu mmulombene kusadiibwa mwifuku dya kwikisha, kushii kwipaa bishila bya Moyiise, mbwa kinyi anunfiitshila munda pampaasha muntu, ooso mushima, mwifuku dya kwikisha? Lekaayi kutshiba kiimu muyiile byaanumono na meeso iyaayi kutshiba kiimu muyiile bululame.”—Yowano 7:23, 24.

Beena Yelusaleme abaukanga wawa mwanda nkwakula shi: “Ta nnaaye aabakimbi bwa kumwipayisha’nyi? Ngiwu aakula patooka, taabamulungula kintu nya! Byabya bakata beetu babatundula binyibinyi shi nnaye winyi Kidishitu su?” Bwakinyi bantu tabakumiina shi Yesu nyi mwikale Kidishitu? Abakula shi: “Au muntu atuuku’shi ngaa kunyi, kutala, apafiki Kidishitu takwi muntu auku shi ngaa kunyi.”—Yowano 7:25-27.

Nka mwamwa mu ntempelo, Yesu bebalwile shi: “Anunguuku! Byaabya anuwuku shi nee a kunyi! Kutala naamu ntshi mwifwile’mi nabeene: muntume nyi nga biinyibiinyi, aye anushyanuuku. Anka’mi namuuku, mwanda ami nanfiki kwadi, aye ngi muntume.” (Yowano 7:28, 29) P’aye kutuusha lwaluulo patooka bwa wawa mwanda, abakimbile bya kukwata Yesu, kumwela mu lukano sunga kumwipaa. Anka tabibadi bikumbane mwanda nsaa ya lufu lwa Yesu tayibadi ibande kukumbana nya.

Bebungi abatudile lukumiino mwi Yesu muyile byabamono. Batambukile pa meema, eemika bipapi,  adiisha binunu bya bantu na mikate ipeela na mishipa, apaasha ba-sha maladi, atambusha bisheetshi, abuula ba mpofu meeso, apaasha ba-sha nsudi na kubuusha mpa na bafwe. Nyi bwakinyi abadi na kya kwipusha shi: “Apafiki Kidishitu, akakitshi bilengyeleshi bikile bibakitshi uno muntu su?”—Yowano 7:31.

Pabadi Bafadisee bapushe kibumbu akyakula byabya, abo na batshiite mwakwidi bakata abatumine basalayi bwa kukwata Yesu.