Yesu kii mu Yelusaleme bwa Musangeelo wa Tushibo twa mapema. E na muloo mwanda “bantu bebungi babaakuminyiine mwadi.” Anka tabibaadi bisangashe bakata ba bipwilo nya. Abatumine basalayi abaadi bu ba mpulushi ba bipwilo bwa kumukwata. (Yowano 7:31, 32) Yesu tabakimbile bya kufwama nya.

Kadi, batungunukile na kulungula mu Yelusaleme mooso, aakulanga shi: “Nee neenu bwa kipungo kiipi, akùpu ngalukiile kwi yaawa muntume. Anukankimbi, anka taanukammono nya; mwanda kwakwa kwankeekala, anwe tanwi balombene kwikufika.” (Yowano 7:33, 34) Beena Yuuda tababaadi bapushe, ababangile kwiakwila munkatshi mwabo shi: “Byaabya nkunyi kwady’a kwenda, kwatushii balombene kumusangana? Akyebe nkafika kwi beena Yuuda bapalakane mwi beena Greke su? Akalambukisha Beena-Greke su? Nkinyi kilombene kupatuula bino bishima bibaabwela shi, ‘anukankimbi, naa’shi kwakwa kwa nkeekala, anwe tanwi balombene kwikufika’?” (Yowano 7:35, 36) Pano Yesu badi esambila pabitale lufu na lusangukilo lwaye mwiyilu, na beshikwanyi naaye tababadya kumulonda mwiyilu nya.

Efuku dya musambo dya musangeelo dibaadi dilombane. Namashika eese a musangeelo, tshiite mwakwidi badi apongoola meema a mu Kishiba kya Silowe bwaadya kwalaala ku kilambwilo kya mu ntempelo. Pangi bwa kwamba shi bantu batentekyeshe wawa mwanda, Yesu bambile shi: “Su muntu ee na nyoota, afikye kwandji atome. Yawa ooso akumiina muyile abyamba bifundwe shi: ‘Munda mwaye amwalaala myeela ya meema a muuwa.’”—Yowano 7:37, 38.

Yesu aleeshe abikyebe kukitshika apeekala balongi baye bediibwe mwimu wa kikudi kiselele na kwitaminyibwa bwa kwikala mu mulongo wa abekala na muwa mwiyilu. Kuno kwediibwa kwa mwimu kubabangile kunyima kwa lufu lwa Yesu.  Bibaadi mwifuku dya Pantekote dya kipwa kibalondele dibaadi myela ya meema a muwa abangye kwalaala pabaadi balongi bediibwe mwimu bapalakashe bya binyibinyi kwi bantu.

Bu lulwaluulo ku malongyesha a Yesu, bangi abambile’shi: “Eyendo, uno ngi mutemuki,” abeelanga kinangu ku mutemuki mukata kukila Moyiise abaabadi balee. Bangi abambile shi: “Kidishitu, nnaye.” Bangi abaadi abekakeena shi: “Kidishitu mulombene kufumbukila mu Ngalileya su? Toomono bifundwe abyakula shi ayikala a mu kifuko kya Daviide, dingi afumbukila mu Beteleme, kibalo kibaadi Daviide?”—Yowano 7:40-42.

Binobino kibumbu kibaadi kiabuule. Bangi abakimbile shi bakwate Yesu, kadi tababadi abolola mboko bwa kumukwata nya. Pabalukiile basalayi kwi bakataka ba bipwilo kushii Yesu, bakata ba tshiite mwakwidi na Bafadisee abepwishe shi: “Tanwi bafikye naye bwakinyi?” Basalayi nkwaluula shi: “Kashaa takwi muntu tabaakwile bu uno muntu.” Bakata ba bipwilo nkufiita munda pa kwibayisha milongo shi: “Byabya babenudimbi na’nwe naamu su? Munkatshi mwa biloolo byetu, sunga mwa Bafadisee kwi muntu su ngumune mumukumiine su? Kwinka penda beena kino kibumbu bashyaabawuku Mukanda wa bishila wa Moyiise.”—Yowano 7:45-49.

Yaaya nsaa, Nikodeme ungi Mufadisee na mwina Sanedrine badi mwimane bwa kwakwila Yesu. Takubaadi bipwa bibidi na kipindji, Nikodeme bafikile kwi Yesu bwa kuleesha lukumino lwaye. Binobino Nikodeme nkwakula’shi: “Mukanda wetu wa bishila ngulombene kupiisha muntu kushii kumuteemesha, sunga kushii kupatuula kyadi mukite su?” Abakwile kinyi bwa kwikalwila? Abambile shi: “Obe naamu we mwina Ngalileya su? Taluula kalolo, omono’shi taakutuuka mutemuki mu Ngalileya nya?”—Yowano 7:51, 52.

Bifundwe taabyakulaa musango umune shi kwi mutemuki e na kya kutuuka mu Ngalileya nya. Binobino Eyi dy’Efile Mukulu adileesha shi Kidishitu afiki kwakwa; pa kutemuka shi “etaata dikata” dibaadi na kya kumweneka ku “beena Ngalileya ba kuba-maumbo.” (Yeeshaya 9:1, 2; Mateo 4:13-17) Kukatusha byabya nka bu byabibaadi bilayibwe, badi mutandjikwe mu Beteleme na mwikale a ku lutandwa lwa Daviide. Sunga byekala shi Bafadisee abaukanga byabya, abimweneka shi abo nyi abaadi abapalakasha myanda ibungi ya madimi kwi bantu pabitale Yesu.