Pababadi bakii mu Yelusaleme bwa Musangeelo wa Tushibo twa Mapema, Yesu bayile na kulungula bya binyibinyi bi na muulo ukata. Bangi beena Yuuda abadi ku Musangeelo, abadi abamulungula shi: “Twi beekulu ba Abrahame, dingi kashaa, muntu teetumunyine bupika.” Yesu bebalulwile shi: “Nawuku shi nwi beekuku ba Abrahame; anka, bu bishyaabitwele bishìma byande munda mwenu, anukimbi bya kungipayisha. Ami naamba kyandji mumone kwi Yaaya, anwe naamu anukitshi kyanudi bapushe kwi nshenu.”—Yowano 8:33, 37, 38.

Mweneno a Yesu mubofule kupusha: Nshaye mmwilekeene na babo ba mashabo. Bu byabashibadi bapushe abikyebe kwakula Yesu, beena Yuuda abakwile dingi mayi aabo shi: “Nsheetu Abrahame.” (Yowano 8:39; Yeeshaya 41:8) Abadi beekulu baye n’eyendo. Byabya abadi abapusha shi abadi na lukumiino lwi mumune na lwa kuuku Efile Mukulu Abrahame.

Sunga mbyabya, Yesu bebapeele lwaluulo lubadi lwibatape ku mashimba akula shi: “Su nwi bana ba Abrahame, byabya kitaayi myanda ibakitshine Abrahame.” Mwanda shi mwana ooso ambulaa nshaye. Yesu batungunukile shi: “Kutala, anukiimbi binobino bwa kungipayisha, ami mwinulungule eyendo byandji mupushiishe kw’Efile Mukulu; byaabya, Abrahame tamwibikite.” Akupu Yesu bebalungwile mwanda wabashii bya kupatuula shi: “Anukitshi mifubo ya nsheenu.”—Yowano 8:39-41.

Binobino beena Yuuda tambabande kushinguula akikyebe kwamba Yesu nya. Abeamba shi mbana ba binyibinyi pa’abo kwakula shi: “Tatwi batandwe mu lupata, twi’nka na Nsheetu umunenka, Efile Mukulu.” Efile Mukulu namu nshabo binyibinyi su? Anka Yesu bebalungwile shi: “Su Efile Mukulu bady’a kwikala nsheenu, nubady’a kunfula, mwanda kw’Efile Mukulu ngi kwanfiki; ntshi mwifikile ami nabeene; nnaye muntume.” Akupu Yesu bebayipwishe shi: “Tanupusha ngakwilo aande bwa kinyi? Mwanda tanwi balombeene kutemeesha bishima byande.”—Yowano 8:41-43.

Yesu bapimine kwibalesha kibadya kwikala bu masaku a kupela kwabo kwa kumukumiina. Kadi binobino bebalungula patooka shi: “Nsheenu, nkafilefile; dingi anukyebe kukumbasha akikyebe nsheenu.” Nshaabo badi nnanyi? Yesu bebalesheshe kushi kufya shi: “Byatshiile ku mbangilo, mufubo waye ngwa kwipayisha bantu; tamushimatshile mu biinyibiinyi mwanda biinyibiiyi ta bi munda mwaye.” Yesu badi mutentekye bingi bishima shi: “Muntw’Efile Mukulu ateemeshaa bishima by’Efile; anka panushii b’Efile Mukulu ngi panushyanuteemesha.”—Yowano 8:44, 47.

Byaabya bishima bibafitshiishe beena Yuuda munda abo nkumwaluula shi: “Tatwi bakule kya biinyibiinyi pa kwamba’shi, ‘we mwina Samariya, dingi mukwatshiibwe kwi kafilefile su’?” P’abo kwitanyina Yesu bu “mwina Samariya,” abadi abamubepuula. Kadi Yesu tamumone bu kwi mwanda pa kwibaluula shi: ‘Nya, ntshii mukwatshiibwe kwi kafilefile nya, anka natumbishaa Nshami, anwe namu anumpeesha.’ Bukata bwa uno mwanda abumwenekyela ku mulayilo wa kukaanya ubambile Yesu shi: “Su muntu alama bishima byande, taanamone lufu nya.” Tabadi aakula shi batumiibwa na bangi abamulondanga tabakafu lufu lwa binyibinyi nya. Anka, tababadi na kya kwipayibwa kwi “lufu lwa kabidi” bwa kupela kwikala na lukulupilo lwa lusangukilo nya.—Yowano 8:48-51; Kibafumbwilwe 21:8.

Kadi beena Yuuda abatshile mayi a Yesu bu a binyinyi pa kwakula shi: “Tubashinguula binobino’shi kafilefile nkakukwate. Abrahame bafwile na batemuki dimo; byabya obe wakula shi; ‘su muntu aalama bishima byande taan’amone lufu.’ We mukile nshetu Abrahame ku bukata, aye bafwile su? . . . Byabya, wemono buu’nyi?”—Yowano 8:52, 53.

Tababakuminanga Yesu eeleesha bu Mesiya nya. Kadi, pamutwe pa kwaluula musango umune lukonko lwabo pabitale bumuntu bwaye, Yesu bambile shi: “Su neetumbisha ami nabeene, ntumbo yande ngya bisumanga. Nshami nyi antumbisha, aye aanushimikila’shi nyi Efile Mukulu eenu. Taanumuuku’nwe; anka’mi namuuku. Su nadya kwamba shi ntamuuku, nadya kwikala sha madimi.”—Yowano 8:54, 55.

 Yesu binobino bebalungula kileshesho kya nkambwa aabo sha lulamato shi: “Nsheenu Abrahame badi na kusepeela pabakulupilanga kumona efuku dyande: bedimwene, aye nkupusha muloo.” Oolo, p’aye kukumiina ku mulayilo w’Efile Mukulu, Abrahame batalanga kumpala kufika kwa Mesiya. Beena Yuuda abamulungwile shi: “Twe na sunga mbipwa makumi ataano, toomwene Abrahame?” Yesu badi mwibaluule shi: ‘Biinyibiinyi, neenulungula’shi kumpala kwa kutandjikwa kwa Abrahame, naadi kwanka.’ Badi akwila bwa pabadi bu mwikeyilu sha bukome mwiyilu kumpala kwa kutandjibwa pa nsenga.—Yowano 8:56-58.

Beena Yuuda, abafitshile munda p’abo kupusha Yesu akula shi badi kwanka kumpala kwa Abrahame, abo nkumwibwela shi bamwase mabwe. Kadi Yesu bakatukile kushii’bo kumukita kintu.