Twi mu kipwa 32 B.B. kunyima, takudi bipwa bisatu na Yesu kubatshishibwa. Aye na balongi baye abakatuka ku Musangeelo wa Tushibo twa mapema mu Yelusaleme. Abimweneka shi bakii kipeepi na kwakwa kubabakatuka. (Luka 10:38; Yowano 11:1) Anka Yesu bakisha nsaa ibungi ya ku myeshi yaye isamombo ibashala bwa mudimo waye mu Yudeya sunga kusabuka Mwela wa Yoordano mu dipindji kya Peree. Bibadi abitungu kulambukisha namu mu ino mbalo.

Kumpala, kunyima kwa Kidibwa kya lukilo kya 30 B.B., Yesu badi mukishe myeshi ibungi na kulungula mukandu wibuwa mu Yudeya na kukiila mu Samariya. Akupu pabitale nsaa ya Kidibwa kya lukilo mu kipwa kya 31 B.B., Beena Yuuda ba mu Yelusaleme abatompele kukimba bya kumwipaa. Munda mwa kipwa kimune na kipindji, Yesu balongyeshe ngofu dya kunundu, mu Ngalileya. Munda mwa aa mafuku, bantu bebungi abafikile balongi baye. Mu Ngalileya, Yesu balongyeshe batumibwa na kwibatuma na mukandu shi: “Ukishayi’shi ‘Bufumu bwa mwiyilu tabudi peepi.’” (Mateo 10:5-7) Binobino balumbuula kampanye ka kutusha bukamonyi mu Yudeya.

Bwa kubanga kano kampanye, Yesu basangwile balongi 70 na kwibatuma babidi babidi. Byabya, kubadi bisaka 35 bya balungudi ba Bufumu mu teritware, mubadi “bya kunwaa biibungi, anka bafubi mbapeela.” (Luka 10:2) Abadi bya kubanda kwenda yaaya mbalo, akupu Yesu badi na kya kwibalonda. Balongi 70 abadi na kya kupaasha basha mikumbo na kupalakasha wawa mukandu umune ubadi aulungula Yesu.

Balongi tababadya kwimena kulungula nka penda mu bitumbwilo nya. Yesu badi mwibatume bwa kwenda ku mashibo a bantu. Yesu badi mwibaludikye shi: “Mu nshibo kampanda mwanutwele, bangayi kwamba shi: ‘Kufukama kwikale mu ino nshibo.’ Su mwekala muntu sha kufukama, byaabya mwabi wenu wa kufukama awikala mwadi.” Abadya kutwala mukandu kinyi? Yesu bebalungwile shi: “Nwibalungule’shi Bufumu bw’Efile Mukulu bubafiki nyaa naa kwanudi.’”—Luka 10:5-9.

Buludiki bubadi Yesu mupe balongi 70 bubadi kya mumune na bubadi mutume nabo batumibwa 12 pangi kipwa kimune kunyima. Bebadimwishe shi ta mbooso abakenukukila kalolo nya. Kwitatshisha kwabo namu kubadya kwibalumbuula bwabadya kwibatambula bwashi apafiki Yesu kapindji kapeela kunyima, bantu bebungi abekala na lukalo lwa kufumankana na Mulambukishi na kulonga bibungi kwadi.

Mu mafuku apeela, bisaka bya balungudi ba Bufumu 35 abadi balukiile kwi Yesu. Abo nkumulungula na muloo ooso shi: “Mwanaana, mpa na bikudi bibi mbitukookyele mwishina dyoobe.” Uno mukandu wibuwa ubadi na kya kusankisha eshimba dya Yesu bikata, mwanda bambile shi: “Namonanga Satana kwete kupona kwiulu bu kabadibadi  ka mpeshi. Talanga, nenupa matalwa a kutambukila pa manyoka na pa tuminu.”—Luka 10:17-19, Kilombeeno kipya 2014.

Akupu, Yesu badi mushinkamishe balondji baye shi abekala na ngobesha ku bintu bi bukyelo bu kileshesho, kutambukila pa manyoka na pa tuminu. Na dingi, abadi na kya kwikala bashinkamishe shi mu mafuku aafiki Satana akapono mwiyilu. Yesu badi dingi mukwashe balongi 70 bwa kuuka mwanda wi na muulo ukata mu mudimo wabo. Bakwile shi: “Tanusepeelanga pa mwanda wa’shi bikudi mbinukokyele, anka sepeelayi bwa pee mashina eenu ngafundwe mwiyilu.”—Luka 10:20.

Yesu badi na muloo ukata na kutumbisha Nshaye patoka bwa kutumika na bano bafubi beyishe mu kipaso kikata. Badi mwialuule kwi balongi baye ebalungula shi: “Mwaabi ngwa meeso aamono byaanumono. Mwanda neenushinkamisha shi, batemuki bebungi na milopwe iibungi, babadi abakyebe kumona bino byanumono, anka tababadi bebimone; babakyebanga kupusha bino byanupusha anka tababadi bebipushe.”—Luka 10:23, 24.