Yesu badi mushaale mu nshibo ya Mufadisee kunyima kwa kupaasha muntu badi na maladi a nsudi. Yesu bamwene beenyi abesangwila mbalo ineeme ku kidiibwa, aye nkumona bu kipindji kibuwa kya kutusha dilongyesha pabitale kwiyisha.

Yesu bakwile shi: “Paabakwitaanyina ku madyo eebambo, tosangulanga mbalo ya kumpala, tala beekala bayitaanyine ungi muntu mukukile kineemo; yaawa mwinwitanyine, obe n’aye, mulombeene kufika akulungula shi: ‘Mulekyele mbalo.’ Paapa, wekwenda na buufu bukata mu kushaala pa mbalo ya nfudiilo.”—Luka 14:8, 9.

Yesu bambile kunyima shi: “Anka, pabakwitamina, enda okashaale pa mbalo ya nfudiilo, bwa’shi apafiki mu kwitanyine, akulungule’shi: ‘Kuukw’ande kaamina kumpala.’ Paapa wekala na kineemo ku meeso a booso abeekala noobe ku meesa.” Kukita byabya takubadi penda bwa kulesha kalolo nya. Yesu apatuula shi: “Mwanda muntu eese eekaamisha, abamwisha, na yawa eeyisha abamukaamisha.” (Luka 14:10, 11) Badi anyingisha abamutemesha bwa kwikala na kwiyisha.

Akupu Yesu batushishe dingi dilongyesha bwa Mufadisee badi mumwitanyine—pabitale kipaso kibuwa ku meeso kw’Efile bwa kwitanyina bantu ku kidiibwa. Bamulungwile shi: “P’oteekyesha bya kudya biibungi sunga bipeela, toyitaanyinga ba kuuku boobe, sunga bakwenu, sunga beena kifuko sunga boodi mwikungyesheene nabo, na bampeta, bisumanga abo naamu abakwitanyina bwa nkwalwisha byanka. Anka, p’ootekyesha bya kudya itaanyina balanda, ba-sha bikopo, abasumpikita, ba mpofu, byabya opete mwabi, mwanda tabee na kya nkwalwisha.”—Luka 14:12-14.

Muyile abikalaa myanda, abayitanyinaa bakuuku, beena kifuko, bankungishanyi ku kidiibwa, Yesu tamwakule shi bibubi nya. Anka, badi mushinkamishe shi kupa bantu bafudiile bu balanda, balemane sunga ba mpofu kidiibwa kwi kutwala myabi ikile bungi. Yesu badi mupatuule shi: “Abakakup’efuto dyaabyo pa kusanguka kwa balulame.” Umune a ku bayitanyinwe bambile shi: “Sha-mwabi nguno adi kya kudya kya mu Bufumu bw’Efile Mukulu.” (Luka 14:15) Bamwene shi nkineemo kikata kya kwikala mu Bufumu. Anka, ta mbantu booso abeekalaa na yawa mweneno nya, nyi bwakinyi Yesu balesheshe shi:

“Muntu kampanda badi mutekyeeshe kya-kudya kikata, aye nkwitanyina bantu beebungi. Nguba a kudya, aye nkutuma mufubi aaye mu kulungula bayitanyinwe shi: ‘Fikaakyi, byooso bibalombana.’ Paapa abo booso nkubanga kuteka lusa mu kipaso kimune. A kumpala nkumulungula’shi, ‘Naakatuka mu kuula efuba abitungu nkeedimone; nakusendeela, nfwile lusa.’ Ungi nkwamba’shi, ‘Naakatuka mu kuula ngombe ekumi, abitungu nyende mu kwiyitompa; naakutekye onfwile lusa.’ Ungi’shi: ‘Nayibakila mukashi binobino ngi nkyashii mulombeene kufi.’”—Luka 14:16-20.

Tubingilo tubabatuusha ta ntwa biinyi nya! Mwanda muntu taulaa efuba sunga ngombe kumpala kwa kwibimona, ababandaa kumona kintu kumpala kwa kuula. Muntu a kasatu tabadi eelumbuula nya bwa kwibakila. Ekeele mupwe kwibakila, byabya tabibadya kumukutshishwa kufika ku lwitamino lwi na muulo ukata nya. P’aye kupusha tubingilo twabo, sha nshibo balungwile mufubi na nsungu shi:

“Nda lubilo mu bifumankeeno na mu miseese ya bibalo, ofikye na balanda, ba-sha bikopo, ba mpofu na abasumpikita.” Mufubi bakitshine byabya, kadi kubashadile ingi mbalo. Sha nshibo nkulungula mufubi aaye shi: “Nda mu mashinda na mu mpango, otweshe bantu bwa’shi nshibo yande iwule. Mwanda neenulungula’shi: su ngumune a ku baba babadi bayitanyinwe, teeleesha ku kya kudya kyande.”—Luka 14:21-24.

 Kino kileshesho kya Yesu akilesha kipaso kiikale Yehowa na Yesu Kidishitu abeetamina bantu bwa kwikala mu mulongo wa kutwela mu Bufumu bwa mwiyilu. Beena Yuuda, bikishekishe bakata ba bipwilo abadi ba kumpala kupeta lwitamino. Bebungi ba kwabadi abadi basumbushene lwitamino lwa mudimo wa Yesu. Anka lwitamino talubadi lwimane paapa nya. Yesu alesha patoka shi mu mafuku abadi na kya kufika, lwitamino lwa kabidi lubadi na kya kufika kwi bantu bashadile beena Yuuda na bantu ba bingi bisamba. Akupu, kubadi na kya kwikala lwitamino lwa kasatu na lwa nfudiilo kwi bantu babadi abamono kwi beena Yuuda bu bashii balombeene kwikala mu kipwano n’Efile Mukulu.—Bikitshino 10:28-48.

Eyendo, abyakula Yesu abishinkamisha patooka mayi a umune a ku bantu abadi beetaminwe shi: “Sha-mwabi nguno adi kya kudya kya mu Bufumu bw’Efile Mukulu.”