Yesu bakatukile mu kulungula bantu abadi abamutemeesha mu Peree shi, “ba kumpala beebungi abekeekala ba kuunyima, bakunyima abakeekala ba kumpala.” (Mateo 19:30) Badi mupatuule mayi aaye na kileshesho kya bafubi mwifuba dya nfinyo:

Bakwile shi: “Bufumu bwa mwiyilu mbwifwaneene na nfumu a nshibo batuukile kunamashika bwee, bwa kwata bafubi ba kutumika mwifuba dyaaye dya nfinyo. Aye nkwipusheena na bafubi bwa kwibafuta lufwalanga lumune kwifuku, ngi aye nkwibatuma kwifuba dyaaye dya nfinyo. Pabatuukile buu nguba aa kasatu, bamwene bangi beemane mu lupata, bashii na mufubo. Aye nkwibamba shi; ‘Endaayi, anwe naamu, kwifuba dyande dya nfinyo, neenuupa efuto dikumbane.’ Abo nkwikwenda. Atuuku dimo bu ku nguba a kasamombo, akupu buu ku a kitema, aye nkukita byaamumune. Buu ku nguba ekumi naa-umune, aye nkutuuka dimo, nkusangana bangi beemane paapa, aye nkwipayipusha shi: ‘Mbwa-kinyi nwibashaale paapa efuku dishima kushii mufubo?’ Abo nkumwaluula shi: ‘Ngi kwamba shi takwi muntu mwitwate ku mufubo.’ Aye nkwibamba shi: ‘Edaayi anwe naamu kwifuba dyande dya nfinyo.’”—Mateo 20:1-7.

Abimweneka shi bantu abatemeshanga Yesu, abelele kinangu bwa Yehowa Efile pababadi bamupushe akula bwa “Bufumu bwa mwiyilu” na “nfumu a nshibo.” Bifundwe abileesha Yehowa bu aye nabeene sh’efuba adilesha kisamba kya Isaleele. (Misambo 80:8, 9; Yeeshaya 5:3, 4) Baba be mu kipwano kya Mwiya be mu kwipushena na bafubi ba mwifuba dya nfinyo. Anka Yesu tabadi alesha myanda ya kala nya. Baleshanga mwanda ubadi aa mafuku.

Bakunkushi ba bipwilo bu Bafadisee abakatukile mu kumutompa na mwanda wa kutshiba dibaka, mbekale bu bafubi ba kwishina abafubu kushii kukooka mu mufubo w’Efile Mukulu. Be bu bafubi ba nsaa yooso abakimbi kupeta efuto dikumbane, efuto dya ndenyee umune kwifuku dya mufubo.

Batshiite mwakwidi na bangi bantu abamonanga beena Yuuda bashadile bu abafubila Efile bipeela, bu bantu abafubu mwifuba dy’Efile Mukulu dya nfinyo kipindji ky’efuku. Mu kileshesho kya Yesu, mbekale bu bantu bababata ku mudimo “buu nguba aa kasatu” (9h) sunga kunyima kw’efuku mu nguba a kasamombo (12h), mu nguba a kitema (15h) na ku nfudiilo mu nguba a ekumi na umune (17h).

Balume na bakashi abalondanga Yesu abadi abebamono bu bantu “batshipiibwe” sunga bediibwe mulwa. (Yowano 7:49) Bebungi mu nshalelo aabo, abadi balobi ba mishipa na ba kidime. Akupu ku nfudiilo kwa kipwa kya 29 B.B., “nfumu eefuba dya nfinyo” batumine Yesu bwa kwitamina baba bantu bashadile bwa kufubile Efile Mukulu bu balongi ba Kidishitu. Abadi “ba kunyima” abakula Yesu bu bafubi abafiki mu nguba a ekumi na umune (17h) bwa kufuba mwifuba dya nfinyo.

Yesu afudiisha kileshesho kyaye pa kulesha akikitshika peepi na ku nfudiilo kw’efuku pa kwakula shi: “Kyoolwa akifiki, nfumu eefuba dya nfinyo, nkulungula mulami a bintu byaaye’shi: ‘Itaanyina bafubi, ope ooso muntu efuto dyaaye, pa kubangila ku bakunyima na kupudisha na bakumpala.’ Byaabya, ba panguba eekumi naa umune babafikile, nkutambula lufwalanga lumune ku muntu. Ba kumpala, pababafikile naamu, babadi abeele kinangu shi abapete bikile, anka abo nkupeta, abo naamu, lufwalanga lumune. Pa kwilutambula, babadi abakalasheena nfumu sheefuba, abo’shi: ‘Bano bafikye ba ku nfudiilo batumikye anka nguba umune; bweebafutu kyaa-mumune n’atwe babafwambuka mu kaanya efuku dishima.’ Anka aye nkwaluula umune a kwabadi’shi: ‘Mwinaami, ntshi mukukitshine kintu kiibubi nya. Twe mwipusheene naami bwa lufwalanga lumune su? Ata efuto dyoobe, okatukye wende. Naakyebe kupa a nfudiilo uno bungi bumune noobe. Ntshi na bulungantu bwa kukita kyankyebe na bintu byande su? Byaabya we na kyuutu pa mwanda wa kalolo kande!’ Byaabya, ba nfudiilo abakeekala ba kumpala, naa ba kumpala abakeekala ba nfudiilo.”—Mateo 20:8-16.

 Balongi abadi na kya kukaanya pabitale kipindji kya nfudiilo kya kileshesho kya Yesu. Bakata ba bipwilo ba beena Yuuda abadi abepwandikisha bu “ba kumpala” abadya kufika “ba kunyima” naminyi? Na nkipaso kinyi kibadya kufika balongi ba Yesu “kumpala”?

Balongi ba Yesu bababadi abamono kwi Bafadisee na bangi bantu bu “ba kunyima” mbekale mu mulongo wa kufika “ba kumpala” mu kupeta efuto dyabo dilombane. Ku bukwashi bwa lufu lwa Yesu, Yelusaleme a ku mbidi badi na kya kufwa, akupu, Efile Mukulu badi na kya kusangula kisamba kipya, “Isaleele eEfile Mukulu.” (Beena-Galate 6:16; Mateo 23:38) Yowano Mubatshishi badi mwikiisambile pabakwile pabitale kufika kwa kubatshishibwa na kikudi kiselele. Baba abadi “ba kunyima” nyi abadi na kya kwikala ba kumpala mu kupeta lwalwa lubatshisho na kupeebwa kineemo kya kwikala bu bakamonyi ba Yesu mpaa na “kufudiile nsenga.” (Bikitshino 1:5, 8; Mateo 3:11) Su balongi bapusha kalolo kushintuluka akwisambila Yesu, be kumwena kumpala kipaso kilombene bakata ba bipwilo abafiki bu bantu “ba kunyima” kwibakwatshila nsungu.