Yesu bapeele balongi baye elango dibuwa pabitale kufubisha bintu bya ku mbidi. T’anka penda balongi baye abadi abamuteemesha nya. Bafadisee namu abadi panka, na abadya kupusha kalolo dyadya elango dya Yesu. Bwakinyi? Mwanda Bafadisee “babadi bafule nfwalanga.” P’abo kupusha bibambile Yesu, ababangile ‘kumusepa.’—Luka 15:2; 16:13, 14.

Anka byabya tabibadi bibofushe Yesu nya. Bebalungwile shi: “Anwe, anwileesha bu balulame ku meeso a bantu, anka Efile Mukulu awuku bii mashimba eenu. Mwanda kyaakya kii na kineemo ku meeso a bantu kii bisumanga ku meeso eEfile Mukulu.”—Luka 16:15.

Bafadisee abadi abebata na “kineemo ku meeso a bantu,” anka nsaa ibafikile ya kushintuluka kwa myanda. Bantu abadi abetumbisha bwa bintu bya pa nsenga, bwa myanda ya politike na bwa bipwilo abadi na kya kupwa kineemo. Bantu bashadile abashingulanga lukalo lwabo lwa mu kikudi abadi na ya kwikala bakaamishwe milongo. Yesu balesheshe kalolo kukitshika kwa kuno kushintuluka p’abambile shi:

“Mukanda wa bishila naa wa Batemuki mbikafikye nyaa na ku kipungo kyaa Yowano. Kubanga paapa, mukandu wibuuwa wa Bufumu bw’Efile Mukulu ubalungwilwe bantu; byabya muntu ooso eekalakasha bwa kwimutwela. Mbibofule bwa’shi eyilu na nsenga byaashimina, pee kukatusha kantu kamune kakile bupeela ku Mukanda wa bishila.” (Luka 3:18; 16:16, 17) Mayi a Yesu aalesha shi kushintuluka kukwete kukitshika naminyi?

Bakunkushi ba bipwilo ba beena Yuuda abadi abetatula bwa kulonda Miiya ya Moyiise. Tentekyesha shi, pabadi Yesu mubuule muntu meeso mu Yelusaleme, Bafadisee abambile na kwitatula shi: “Atwe twi balongi ba Moyiise! Atuuku’shi Efile Mukulu bakwile naa Moyiise.” (Yowano 9:13, 28, 29) Aku naamu kabingilo ka Miiya ibabapeele Moyiise kabadi ka kukunkusha bantu beeyishe kwi Mesiya, aye mwikale Yesu. Yowano Mubatshishi batundwile Yesu bu Mwana a mukooko a Efile Mukulu. (Yowano 1:29-34) Kubanga ku bulungudi bwa Yowano, beena Yuuda beyishe, bikishekishe balanda, abapushishe pabitale “Bufumu bw’Efile Mukulu.” Eyendo, ubadi “mukandu wibuwa” kwi booso abakuminanga kukookyela Bufumu bw’Efile Mukulu na kupeta myabi yabutusha.

Miiya ya Moyiise ibadi ilombane pa kunkusha bantu kwi Mesiya. Anka, kitungo kya kwiyilonda kibadi na kya kwimana. Bu kileshesho, Mwiya ubadi autadiila myanda kampanda bwa kutshiba dibaka, kadi Yesu badi mupatuule shi “muntu ooso apele mukashi aaye bwa kwibakila ungi, batambuka lusandji; na ooso ayibakila mukashi mupediibwe kwi mulume aaye, batambuka naamu lusandji.” (Luka 16:18) Uno mwanda ubadi ufiitshishe Bafadisee munda abo abakimbanga kulonda miiya mu myanda yooso!

Binobino Yesu alondo kilesheso bwa kushimika kasele pabitale bukata bwa kushintuluka. Kibadi akiisambila bantu babidi—ooso a kwabadi badi  na bumuntu sunga mwanda bibadi bishintulukye musango umune. P’otaluula kino kileshesho, tuula mu binangu shi mu bantu babapushanga, mubadi Bafadisee abafulanga nfwalanga bababadi abatumbisha kwi bantu.

Yesu akula shi: “Kubadi muntu mpeta badi afwala bilamba bya muulo, bii buuwa bunabeene, badi akitshi efuku dyooso madyo akata alumbulukye. Mulanda kampanda, sh’eshina bu Lazaare badi mulaale ku kitwelelo kya nshibo yaaye na mapote mbidi yooso. Badi na lukalo lwa kudya bintu bibadi bipone ku meesa a mpeta, anka mbwa ngi ibadi ayifiki mu kulamba mapote aaye.”—Luka 16:19-21.

Bafadisee abadi bafule nfwalanga, twi kukaanya bu bibadi Yesu mwibapwandjikishe na “muntu mpeta” su? Baba bakata ba bipwilo bya beena Yuuda abadi bakumiine dingi kufwala bilamba bikata bii na muulo bwa kwileesha. Kukatusha bupeta bwabo, abadi abamweneka dingi shi mbampeta ba myasu sunga angi matalwa ababadi nao. Eyendo, kwibaleesha bu bantu bafwale bilamba bya buleese bimongolokye kubaleshanga mbalo yabo ya ntumbo na kwibaleesha bu bafwale bilamba bitooka kubaleshanga kwimona kwabo kwa bu bantu balulame.—Ndanyele 5:7.

Bano bampeta, bakata ba sha kwitatula, abamonanga balanda na bantu bashadile naminyi? Abadi abebamono bu ba ‛am ha’a’rets, sunga bu beena musoko (ba pa nsenga) bashibadi abauku Miiya sunga bashii bya kwibalongyesha yanka. (Yowano 7:49) Byabya bibaleshanga bibadi ‘mulanda sh’eshina bu Lazaare’ badi na nsala  ibamutakulanga bwa kudya sunga “bintu bibadi bipone ku meesa a mpeta.” Abadi abamono bantu bashadile nka bu Lazaare e na mapote mbidi yooso, bu Efile Mukulu shyebasangeela.

Wawa mwanda wa malwa ubadi ukitshikye munda mwa mafuku, anka Yesu baukanga shi akukafiki kipidji kya kushintuluka kukata mu kwikala kwa booso beekale bu muntu mpeta na beekale bu Lazaare.

Yesu atungunuka na kuleesha kuno kushintuluka kukata mu kukitshika kwa myanda. Akula shi: Mwenda mafuku, “mulanda bafwile, abo nkumutwala kwi miikeeyilu bwa kumutuula peepi na Abrahame. Mpeta nkufwa naamu, abo nkumushiika. Mu kalunga nyembo, mpeta badi mu mpombo, pabebwesheeshe meeso, bamwene ku bula Abrahame na Lazaare ku lupese lwaye.”—Luka 16:22, 23.

Baba abatemeshanga Yesu abaukanga shi Abrahame tabafwile e mu Kalunga nyembo. Bifundwe abileesha kalolo shi ta kwi muntu su ngumune e mu kalunga Nyembo sunga mu Mashama pamune na Abrahame mulombeene kumona sunga kwakula. (Mulungudi 9:5, 10) Binobino bakata ba bipwilo, abamonanga shi Yesu akyebe kulongyesha kinyi? Badi na kya kwakula kinyi pabitale bantu bashadile na bakata ba bipwilo bafule nfwalanga?

Yesu bakatukile mu kuleesha kwakwa kushintuluka pa kwakula shi ‘Mukanda wa bishila naa wa Batemuki mbikafikye nyaa na ku kipungo kyaa Yowano. Anka, kubanga paapa, mukandu wibuuwa wa Bufumu bw’Efile Mukulu ubalungwilwe bantu.’ Byabya, bibadi ku bukwashi bwa bulungudi bwa Yowano na Yesu Kidishitu kubekeele Lazaare na mpeta bafwe ku myanda yabo ya kala sunga ku mwikeelo wabo, abapetele nshalelo mupya sunga kipaso kibadi akibamono Efile Mukulu.

Mu kwakula kwa kalolo, bantu beyishe sunga balanda abadi na nsala ya mu kikudi kubanga kala. Kadi abapetale bukwashi pa kutambula mukandu pabitale Bufumu abalungwilwe dibedi na Yowano, akupu na Yesu kunyima. Kumpala, abadi abeupusha nka bu abasangula ‘bintu bibadi bipone ku meesa a mu kikudi’ a bakata ba bipwilo. Binobino ababangile kudishibwa bya binyibinyi bi na muulo bya mu Bifundwe pa kupusha malongyesha a kukaanya a Yesu. Bi nka bu abapete mbalo ya kineemo ku meeso a Yehowa Efile Mukulu.

Mu kwilekeena na byabya, baba abadi bampeta na abadi mu mulongo wa bakata ba bipwilo abapele kupusha mukandu wa Bufumu abalungwile Yowano na ubadi Yesu mulungule mbalo yooso. (Mateo 3:1, 2; 4:17) Byabya, abafiitshile munda sunga kukalakashibwa na wawa mukandu auleesha kaalo ka kiimu ky’Efile Mukulu. (Mateo 3:7-12)  Su Yesu na balongi baye abadya kuleka kulungula mukandu w’Efile Mukulu, bibadya kuyisha mashimba a bakata ba bipwilo bafule nfwalanga. Baba bakata be nka bu mpeta a mu kileshesho bambile shi: “Abrahame nshyaami, nfwile lusa, otume Lazaare bwa’shi asabikye nsongo ya munwe waaye mu meema, afikye mu kuntalasha pa ludjimi, mwanda nee mu malwa akata mu ino ndjimi ya kaalo.”—Luka 16:24.

Anka byabya tabii na kya kukitshika nya. Bebungi ba ku bakata ba bipwilo tabakashintuluka nya. Abapwile kupela “kupushiisha Moyiise na Batemuki,” abo abadi na bifundwe bibadi na kya kwibatakula mu kukumiina Yesu bu Mesiya a Efile Mukulu na bu Nfumu. (Luka 16:29, 31; Beena-Ngalatea 3:24) Abapelele dingi sunga kwiyisha bwa kulambukishwa na baba balanda abadi bakumiine Yesu na kukuminyibwa n’Efile Mukulu. Balongi ba Yesu naamu tababadi balombeene kutweshekasha bya binyibinyi bwa kusankisha bakata ba bipwilo sunga kwibayisha mashimba nya. Mu kileshesho kyaye, Yesu balesheshe wawa mwanda mu mayi abadi ‘nshyaaye Abrahame’ mulungule mpeta shi:

“Mwan’ande, tentekyesha’shi boodi mupete mwabi mu muuwa wobe, anka Lazaare badi mumone malwa. Binobino, aye muno mwadi basambiibwa, obe naamu toomono mpombo. Naa dimo, munkatshi mwenu neetu, mwi lupongo lukata; takwi kipaso kya shi muntu akatukye kuno atadiile kwanudi, sunga’shi muntu akatukye kwakwa bwa kufika kwatudi nya.”—Luka 16:25, 26.

Abitungu shi kwakwa kushintuluka kukata kukitshikye! Mwanda ku nfudiilo, myanda ibashitulukile pankatshi pa bakata ba bipwilo abadi na kwitatula na bantu bashadile beyishe abadi bakumiine kikumbo kya Yesu na ku nfudiilo a byoso abapetele kiikiisho na kudishibwa mu kikudi. (Mateo 11:28-30) Kuno kushintuluka kubadi na kya kwikala kukile bukata myeshi ipeela pababadi bapyanyishe Miiya ya kilombeeno na kilombeeno kipya. (Yeelemiya 31:31-33; Beena-Kolose 2:14; Beena-Ebelu 8:7-13) Pabadi Efile Mukulu mupongoole kikudi kyaye kiselele mwifuku dya Pantekote mu kipwa kya 33 B.B., bibadi bimwenekye kalolo kushi mpaka shi, balongi ba Yesu abadi bakuminyibwe n’Efile Mukulu kushii Bafadisee na beena kulangwila nabo.