Yesu na bantu babadi atambuka nabo abafikile mu Yeeriko, abo nkukita efuku dimune mwishinda na kukatuka ku Yelusaleme. Mu ungi ngakwilo, Yeeriko ibadi ibidi, kwi akala e mu kilometre kimune na kipindji, kubangila ku Looma mupya. Pabadi Yesu na kibumbu bakatukye ku kino kibundji bwa kwenda ku kingi, abafumankeene na bantu babidi bampofu abadi bapushe twatwa tuleo twa bantu. Umune a kwabadi badi n’eshina bu Bartimee.

Pabapushishe Bartimee na mwinaaye shi Yesu kwete kukila, abeelele musase shi: “Mwanaana, Mwana a Daviide, etufwile lusa!” (Mateo 20:30) Bangi bantu mu kibumbu abadi abebasaashila bwabadya kuumiina, kadi abadi banyishe kwela misaase. Pabadi Yesu mupushe kwakwa kwikakeena, badi mwimane. Aye nkuteka bantu babadi nabo bwa kwitamina baba abeele misaase. Abayile kwi bantu abeele misaase na kulungula umune a kwabadi shi: “Kankamana, ebwé, ngiu akwitâmina.” (Maako 10:49, EEM) Na muloo ooso, mpofu bakatwishe kilamba kyaye kya panundu, aye nkwimana na nkwenda kwi Yesu.

Yesu nkwibepusha shi: “Anukyebe nneenukitshiine kinyi?” Booso ba mpofu babidi nkumwiyayila shi: “Mwanaana, atukyebe meeso eetu aabuulukye!” (Mateo 20:32, 33) Yesu bapushishe lusa, aye nkukuma meeso aabo, akupu nkulungula umune a kwabadi shi: “Nda, lukumiino loobe lubakupaasha.” (Maako 10:52) Booso ba mpofu babidi ababangile kumona, abo nkubanga kutumbisha Efile Mukulu. P’abo kumona bibadi bikitshikye, bangi bantu naamu abadi batumbishe Efile Mukulu. Baba bantu abadi ba mpofu nkubanga kulonda Yesu.

Pabadi Yesu akidila mu Yeeriko, bibumbu bya bantu bibadi bimwifunyishe. Muntu ooso bakimbanga kumona yawa bapasha ba mpofu. Bantu bebungi beefunyishe Yesu mu mpese yooso, bangi kushi kufika sunga peepi naaye. Zakaayi namu badi munkatshi mwabo. Badi nfumu a baudishi ba bitadi mu Yeeriko na mu bibundji bi mu bwipi. Bu bibadi na kishisa kiipi, tabadi bya kumona bibadi abikidika nya. Binobino Zakaayi basukile kumpala, aye nkukaamina ku mutshi wa sikomore mu bwipi bweshinda dibadi adikidila Yesu. Pabadi kwakwa kwiyilu, Zakaayi bamwene byoso bibadi abikidika. Pabadi Yesu mwifubwile pabwipi na kumona Zakaayi kwiyilu, bambile shi: “Zakaayi, ika bukidi; leelo, abitungu nshaale mu nshibo yoobe.” (Luka 19:5) Zakaayi bayikile bukidi ku mutshi bwa kukukila mwenyi mukata kwaye.

Pabamwene bantu bibadi bikidikye, ababangile kuwunauna. Abo nkumona shi tabibadi bilombane bwa Yesu kufikila kwa muntu ababadi abamono bu nkitshishi a bubi nya. Zakaayi bafikile mpeta mwanda wa kupeta makuta a mu bulamalama kubadi akoongola bitadi.

Pabatwelanga Yesu kwa Zakaayi, bantu ababangile kwidila shi: “Kwa nkitshishi a milwisho kubende mu nkashaala.” Anka Yesu bamonanga  mwi Zakaayi bitundwilo bya kwilanga kwishimba. Yesu tababofwile kwishimba nya. Zakaayi bayimeene aye nkumulungula shi: “Mwanaana, naapa balanda kipindji kya pankatshi kya bintu byande, su naadi munyengye muntu kintu, naamwalwisha binanka pa kimune.”—Luka 19:7, 8.

Bibadi kishinkamisho kya kuleesha shi Zakaayi badi mwilangye kwishimba! Badi mulombeene kwela makumi ku bibadi afundu bungi bwa makuta abapetele kwi beena Yuuda belekeene, akupu aye nkutshipa bwa kwibalwisha binanka pa kimune. Byabya bibadi mpa na bitabukile bibatekanga mwiya w’Efile Mukulu. (Efilu 22:1; Beena-Levi 6:2-5) Kukatusha byabya, Zakaayi balayile bwa kwata kya pankatshi kya bintu na kwikipa balanda.

Yesu basangeele na kishima kya kwilanga kwa Zakaayi p’aye nkumulungula shi: “Leelo, kipandjilo kibatwele mu ino nshibo, mwanda, n’aye naamu mmwana a Abrahame. Mwanda Mwan’amuntu mmufikye mu kukimba, na mu kupaasha bibadi bishimine.”—Luka 19:9, 10.

Mafuku ashale kunyima, Yesu badi mushimikye kasele bwa bantu ‘bashimine’ mu lukindji lwaye lwa mwana mushimine. (Luka 15:11-24) Binobino balesheshe kileshesho kya binyibinyi kya muntu ebuwa badi mushimine, kadi bamweneka. Bi kwikala shi bakata ba bipwilo na beena kukumiina babo abadi abedidi na kwipula Yesu pa kwata Zakaayi bu muntu e na kineemo. Kadi Yesu badi mutungunukye na kukimba na kwalusha mikooko ishimine ya bana ba Abrahame.