Kunyima kwa kukutshishwa mpàngo ibubi ya beena Sanendrine ya kumwipaa, Yesu bayile mu kibundji kya Efraime dya peepi na kuushi kwa kutunduka kwa Yelusaleme. Bashadile kwakwa na balongi baye kula na beshikwanyi naye. (Yowano 11:54) Anka, nsaa ya Kidiibwa kya lukilo kya mu kipwa kya 33 B.B. ibadi ayifubwila peepi, nyi bwakinyi Yesu badi mwilumbuule dingi bwa lwendo. Bayile dya kunundu kwa Samariya, aye nkukidila mu Ngalileya bwa musango waye wa nfudiilo kumpala kwa lufu lwaye.

Ku mbangilo kwa lwendo lwaye, pabadi Yesu ende mu kibundji na kibundji, bafumankene na bantu ekumi abadi na maladi a nsudi. Muyile abikalaa ano maladi, ngalombene kutshiba bipelabipela bipindji bya mbidi bu byala, mana sunga matwi. (Mbadiko 12:10-12) Mwiya w’Efile Mukulu ubatekanga muntu e na nsudi bwa kwela musaase shi: “Ntshi mutooshiibwe! Ntshimutooshiibwe!” akupu badi na kya kushala pa bupenka.—Beena-Levi 13:45, 46.

Muyile byabibadi, bano bantu ekumi abadi bemane ku bula na Yesu. Anka abelele musaase shi: “Yesu Mulambukishi, etufwile naamu lusa.” P’aye kwibamona na nsudi, Yesu badi mwibatumine eyi shi: “Keeleesheeyi kwi ba-tshiite mwakwidi.” (Luka 17:13, 14) Yesu balesheshe kaneemo bwa Mwiya w’Efile Mukulu ubadi aupa ba tshiite mwakwidi abadi na kya kulungula ba sha nsudi shi abapashiibwa ku maladi aabo. Akupu, abadi na kya kwikala dingi pamune na bantu bashii na maladi.—Beena-Levi 13:9-17.

Bantu ekumi be na nsudi abadi na lukumiino mu bukome bwa bilengyeleshi bya Yesu. Abayile mu kumona ba tshiite mwakwidi kumpala kwa’bo kupashibwa. Pababadi mwishinda, abapetele efuto dya lukumiino lwabo. Ababangile kumona na kupusha shi ababanga kupashiibwa!

Bantu kitema ba kubaba abadi bapashiibwe abadi batungunukye na lwendo. Kubashadile nka umune. Uno muntu, mmwina Samariya, balukile mu kutala Yesu. Bwakinyi? Yawa muntu badi na lutumbu lukata bwa byabya bibakidikile. Yawa badi mupashiibwe balukiile “afwatumbishanga Efile Mukulu n’eyi dii bukopo,” mwanda badi auku shi nnaye bamupaasha. (Luka 17:15) Pabamwene Yesu, baponene ku ngwa yaaye, aye nkumutumbula.

Yesu balungwile booso abadi bamwifunyishe shi: “Booso ekumi tambapande su? A bangi kitema beekunyi? Takwi muntu su ngumune baluka mu kutumbula Efile Mukulu, anka penda uno mwenyi!” Akupu Yesu balungwile yawa mwina Samariya shi: “Ebwe wende, lukumiino lwobe lubakupaasha.”—Luka 17:17-19.

P’aye kupaasha ba sha nsudi ekumi, Yesu balesheshe shi e na bukwashi bw’Efile Mukulu. Binobino umune a ku bantu ekumi tabadi penda mupashibwe nya, anka abimweneka shi bapetele eshinda dya muwa. Tatwi mu kipungo kilombene Yehowa kufubisha Yesu bwa kukita byabya bilengyeleshi nya. Anka, ku lukumiino mwi Yesu, twi balombene kwikala mwishinda aditwala ku muwa wa ikalaika. Tukwete kulesha shi twi na lutumbu bu bibakitshine mwina Samariya su?