Yesu bapwile kulungula balongi baye kileshesho pabitale kunyingiila mu nteko. (Luka 11:5-13) Badi na kya kwikala pangi mu Samariya sunga mu Ngalileya mubadi mushimikye dingi kasele pa lukalo lwa kupela kukooka mu kwela kwa nteko. Badi mwibashinkamiishe na bileshesho bibungi.

Bambile shi: “Kubadi, mu kibalo kampanda, nsushi shibatshinanga Efile Mukulu, sunga kuneemeka bantu. Kubadi dingi mu kyaakya kibalo, mukashi a mufwe badi afiki mu kumulungula shi; ‘Ntshibile kilumbu kii pa nkatshi pande na mwishikwanyi naami.’ Kubakiile mafuku ebungi, anka nsushi kushii kukumiina. Akupu, aye nkwakula mwanda waye’shi: ‘Sunga ntantshiinyi Efile Mukulu, sunga ntanneemeka bantu, anka bu abinfumbakasha uno mukashi-kilele, naawuku kumutshibila mwanda waye, bwa’shi tala afika mu kunkalakasha kapindji kapindji.’”—Luka 18:2-5.

Yesu balesheshe bya kwibifubila shi: “Teemeshaayi abyakula uno nsushi mubi. Efile Mukulu taatshibi biimu bya basangule baye abamwididi kaanya na bufuku su?” (Luka 18:6, 7) Yesu akyebe kwakula kinyi pabitale Nshaye?

Yesu tabakyebanga kwakula shi Yehowa Efile e bu nsushi mukutwe kululama nya. Anka, kwete kulesha kukutwa kwipushena mwanda akula shi: Sunga byekala shi yawa nsushi mukutwe kululama atshibi mwanda wa yawa mwana mukashi mwanda bamufwila kapindji na kapindji, Yehowa namu e kukita byabya. Yehowa mmululame na e n’eshimba dibuwa, akyebe kwaluula ku nkalo yeetu su t’atukooko na kumwela nteko. Twi kushinkamisha aa mayi mu bibatentekyele Yesu shi: “Neenushikwila shi, [Efile Mukulu] akatshibi mwanda wabo bukidi bukidi.”—Luka 18:8.

Bantu bashadile na balanda t’abakamba kwibakitshina myanda na kululama bu byabakamba kukitshina bantu bakata na ba mpeta nya. Anka Efile Mukulu te byabya. Apakafiki nsaa yaaye, akatshibi kiimu na kululama bwashi bantu bebubi banyokiibwe na bafubi baye namu bapete muwa wa ikalaika.

Nnanyi e na lukumiino bu lwa yawa mukashi kilele? Mu kipaso kinyi mwikale bebungi abakumiina shi Efile Mukulu “akatshibi mwanda wabo bukidi bukidi”? Yesu bapwile kuleesha lukalo lwa kunyingiila mu kwela nteko. Binobino bwa kuleesha lukumiino bu bukome bwa kwela nteko, Yesu bayipwishe shi: “Apafiki Mwan’a-muntu, asangana lukumiino pa nsenga su?” (Luka 18:8) Badi muleshe shi lwalwa lukumiino t’alukeekala lwibungi apakafiki Kidishitu nya.

Bangi ba ku bantu abateemeshanga Yesu abadi abashinkamisha shi be na lukumiino. Abemonanga abo banabeene shi mbalulame kukila bangi. Nyi bwakinyi Yesu badi mwibeele lukindji shi:

“Bantu babidi babayile mu nshibo y’Efile Mukulu mu kwiteenda, umune badi Mufadisee, mungi naamu ngudishi a bitadi. Mufadisee badi mwimane, aye nkubanga kuteka munda mwaye’ye nabeene shi: ‘Obe Efile Mukulu ande, naakutumbula bwa panshii bii bangi bantu; bangifi, bankitshishi a bubi, na abatambuka na bakashi babeene sunga dimo bu uno ngudishi a bitadi. Neeshidikaa misuusa ibidi ku lubingo, naatushaa kyekumi kya kyooso kyampete.’”—Luka 18:10-12.

 Abaukanga Bafadisee shi abeleesha bu bantu balulame. Abakitanga byabya bwa kukaanyisha bantu. Kebungi abadi abeshidika mu Dimune na mu dya Kananka mubabadi abafungula bisalwe bikata bwa shi bantu bebamone. Akupu abatushanga kyekumi sunga kya tu mitshi tupeela. (Luka 11:42) Kumpala kwa myeshi ipeela, abalesheshe kasaabu bwa bantu bashadile pa kwakula shi: “Kwi’nka penda beena kino kibumbu bashyaabauku mukanda wa bishila wa Moyiise [muyile mweneno a Bafadisee] bano bantu mbatshipiibwe.”—Yowano 7:49.

Yesu atungunuka na kileshesho kyaye shi: “Ngudishi a bitadi badi mwimane pabula, na tabadi akyebe sunga nkwibweesha meeso kwiyilu, anka badi eekupila pa kyaadi aye shi: ‘Efile Mukulu ande, nfwile lusa, ami sha-milwisho.’” Eyendo, na kwiyisha kooso, ngudishi a bitadi badi mushingule bubi bwaye. Nyi bwakinyi Yesu afudiisha shi: “Neenushikwila shi, uno mwalukiile kwaye mupwidikye, anka yaawa ungi nyaa; mwanda muntu ooso eekamisha abamwisha, yaawa naamu eeyisha, abamukaamisha.”—Luka 18:13, 14.

Byabya Yesu balesheshe patooka lukalo lwa kwikala mwiyishe. Dibadi dilongye dikile buwa bwa balongi baye, abo abalongyele mu bibalo bibemonanga Bafadisee bu balulame na kukimba kupeta myasu na bitenta. Na ndikale elango dii na muulo bwa balongi booso ba Yesu.