Yesu badi kii mu Samariya sunga mu Ngalileya. Binobino Bafadisee abamwipwishe pabitale kufika kwa Bufumu bubabadi abatengyela na kunangushena shi abukafi bipikwa bibungi. Anka bebalungwile shi: “Bufumu bw’Efile Mukulu taabukafiki bu kintu akimweka na meeso nya. Taabakaakula’shi: ‘Mbuubu.’ Sunga’ shi: ‘Mbwabwa,’ mwanda Bufumu bw’Efile Mukulu bwi munkatshi mwenu.”—Luka 17:20, 21.

Bangi bebungi abamwene bu Yesu kwete kwakula shi Bufumu bukwete kumunana mu mashimba mwa bafubi b’Efile. Anka, tabibadi byabya nya, mwanda Bufumu tabubadi mu mashimba a Bafadisee bababadi abesambila kwi Yesu nya. Byabya, bubadi munkatshi mwabo mwanda Nfumu musangudiibwe a Bufumu bw’Efile Mukulu Yesu badi munkatshi mwabo.—Mateo 21:5.

Pabapwile kukatuka Bafadisee, Yesu badi mupatulwile balongi baye ingi myanda pabitale kufika kwa Bufumu. Nka bu mu matalwa aaye a Bufumu, babandjile kwibadimusha shi: “Akukafiki mafuku anukalakila kumona sunga dimune dya ku mafuku a Mwana’a-muntu, anka taanwidimono.” (Luka 17:22) Yesu badi aleesha shi kumunana kwa Mwana a muntu mu Bufumu kwi mu mafuku e Kumpala. Kumpala kwa yaaya nsaa kufika, bangi ba ku balondi abadi abekalakasha bwa kuuka yanka, anka abadi na kya kutungunuka na kutengyela mpaa na pabadi na kya kulombana nsaa y’Efile Mukulu bwa shi Mwana a muntu afikye.

Yesu atungunuka na kwakula shi: “Bantu abakenulungula shi: ‘Ngiu, e pano!’ sunga shi: ‘Ngyâwa e kwâ!’ Anka tanwendanga kwanka, tanwibalondanga. Mwanda, anka abipenyâ mukyesa [mupenyo] wa mpeshi, wamunyika ku nsongo na nsongo y’eyilu, nyi abikamunyika namu Mwana a muntu efuku dyakafiki dimo.” (Luka 17:23, 24, EEM) Balongi ba Yesu abadya kwilama naminyi bwa kupela kulonda ba mesiya ba madimi? Yesu akula shi kufika kwa Mesiya a binyibinyi akukeekala nka bu mupenyo aupenye kwibula. Kwikala kwaye kwa mu Bufumu akukamweka kwi bantu booso.

Kunyima Yesu balesheshe kwifwanena kwa myanda ya kala bwa kulesha abikekala mwikeelo wa bantu mu aa mafuku shi: “Bu bibabidi mu mafuku a Nowa, byabya ngi byaabikeekala mu mafuku a Mwan’a-muntu. . . . Sunga dimo, bu bibaadi mu mafuku a Loota, abady’abadi, abatomo, abaulu, na kuudisha, babakunanga, bayibakanga. Anka, efuku dibatukile Loota mu Sodome, Efile Mukulu banokyeeshe dya mwiyilu mpeshi a kaalo na nkamanyi, aye nkwibatuuta booso. Abikeekala kipaso kimune mwifuku adikeeleesha Mwan’a-muntu.”—Luka 17:26-30.

Yesu t’akula shi bantu mu mafuku a Nowa na Loota abadi babutudiibwe mwanda abakitanga myanda ayitungu kukita bu kudya, kutoma, kuula, kuudisha, kukuna na kwibaka nya. Nowa na Loota na bifuko byabo abakitanga n’abo namu ingi ya ku ino myanda. Anka bangi bantu abakitanga ino myanda kushii kutuula binangu ku  mpàngo y’Efile Mukulu na kuluba kipungo kibabadi. Nyi bwakinyi Yesu badi mudimushe balongi baye bwa kupela kuluba akikyebe Efile Mukulu na kwipaana mu kwikikita. Badi mwibaleshe kipaso kyabadya kupashiibwa—bwa kutungunuka na kwikala na muwa—apakafwisha Efile Mukulu kabutu mu mafuku e kumpala.

Bibadi abitungu shi balongi basuukye kulubishibwa na bintu bya pa nsenga biibefunyishe bi bu bintu bi “kumongo.” Nyi bwakinyi Yesu akula shi: “Mu dyaady’efuku, ooso ekeekala paanundu pa nshibo, su bintu byaaye bii mu nshibo, tayikanga mu kwibyata, na yaawa naamu akeekala kwifuba, taalukiilanga ku mongo. Tentekyeshaayi mukashi a Loota.” (Luka 17:31, 32) Badi mwalulukye ebwe dya mungwa.

P’aye kutungunuka na kulesha abikekala myanda nsaa ayikamunana Mwana a muntu bu Nfumu, Yesu balungwile balongi baye shi: “Bwabwa bufuku, mu bantu babidi abeekala pa lusala lumune, umune abamwata, ungi naamu bamulekye.” (Luka 17:34) Byabya abilesha shi bangi abakapete kipandjilo, bangi namu abakalekiibwa sunga kushimisha muwa wabo.

Balongi abayipwishe shi: “A nkunyi kwabikakitshika Mwanaana?” Yesu bebalulwile shi: “Kwakwa akwikala bitanda, ngi akukeebungila byoonyi bya mpungwe.” (Luka 17:37) Eyendo, bangi abakeekala nka bu byonyi bya mumba abimweneka ku bula. Bano balongi abakebungila kwi Kidishitu a binyibinyi aye mwikale Mwan’amuntu. Mu mafuku e kumpala, Yesu akapa balongi baye bya binyibinyi abipaana muwa kwi baba be na lukumiino.