Yesu bakatukile mu kutusha kileshesho pabitale mwikeelo ubadya kwikala nao balondji baye. Abadi na kya kwimona bu bana bakinga, bu bashadile bashi na kineemo. Balongi abadi na kya ‘kukuukila mwana bu yawa mwishina dyaye bu abakuukila Yesu.’—Mateo 18:5.

Batumibwa abakatukile mu kwieleshena mpaka pabitale e kwikala mukata munkatshi mwabo, abadi na kya kwata mayi a Yesu bu kishinkamiisho. Binobino mutumiibwa Yowano bafiki na ungi mwanda ubakatuka mu kukitshika, bakwile shi: “Twi bamone muntu abingi bikudi bibi mwishina dyobe, atwe nkukimba bya kumukanda mwanda taakulondo pamune neetu.”—Luka 9:49.

Bi kwikala shi Yowano badi amono shi nka penda batumibwa nyi be na matalwa a kupaasha bangi sunga kubinga bikudi bibi su? Su bi byabya, nkipaso kinyi ki kwikala mwina Yuuda apete ngobesha ya kutusha bikudi bibi? Yowano amono shi yawa muntu tabadi mulombene kukita myanda ya kukaanya mwanda tabadi alondo Yesu na batumibwa nya.

Yowano bakaanyine pabamulungwile Yesu shi: “Tanumukandanga nya, mwanda takwi muntu a kukita bilengyeleshi mwishina dyande, mulombene dimo kungamba bibi kuunyima. Shii mwitutune e kwatudi. Ooso eenupa kyeepela kya meema a kutoma bwa panudi lupese lwa Kidishitu, eyendo neenulungula shi taashimisha efuto dyaaye nya.”—Maako 9:39-41.

Yaaya nsaa, yawa muntu tabadi na kya kulonda Kidishitu bwa kwikala ku lupese lwa Yesu nya. Kakongye ka bwina Kidishitu takabadi kabande kwikala kwanka, biikale shi yawa muntu tabadi atambuka na Yesu taakulesha shi badi mwishikwanyi naye sunga mwina lulangwilo lwa madimi nya. Yawa muntu badi na lukumiino mwishina dya Yesu na muyile bibambile Yesu, yawa muntu taashimisha efuto dyaye nya.

Mu ungi mushindo, bibadya kwikala mulwisho ukata su bangi bantu abakokola bwa mayi na bikitshino bya batumibwa. Nyi bwakinyi Yesu bambile shi: “Yawa ooso a kalubisha umune a ku bano bapeela bankumiine, bwaye’ye mbikile buwa bamushitshika mu nshingo ebwe dikile bukata, bamuyina mu meema.” (Maako 9:42) Yesu bambile shi balongi baye abadi mpa na kya kukatusha kintu kyoso kii na muulo bu eyasa, mukoolo sunga eyiso su adibakokosha. Pa kwamba shi mbikile buwa kukutwa kwikala na kyakya kintu kii na muulo bwa kutwela mu Bufumu bw’Efile Mukulu pa mutwe wa kwikala nakyo na kadi kwediibwa mu Ngeena (Lupongo lwa Hiinome). Bi kwikala shi batumibwa abamwene buno bwina bubadi pa bwipi na Yelusaleme bwababadi abashikila butshaafu, binobino abapushiishe bibadi abilesha kulwishibwa kwa losoo.

Yesu nkwibadimusha shi: “Dimukaayi tala nwapeesha sunga umune a ku bano bapeela, mwanda neenulungula shi, mwiyilu, mikeeyilu yaabo ngimane nguba ooso kumpala kwa  Nshaami.” “Bano bapeela” be na muulo kinyi kumpala kwa Nshaye? Yesu bebalondeele bwa muntu badi na mikooko 100 kadi aye nkushimisha umune. Yawa muntu balekyele mikooko 99 bwa nkakimba umune ushimine na pabeupetele, badi musankye bikata kukila bibadi na mikooko 99. Yesu nkukumbasha shi: “Nsheenu e mwiyilu akyebe shi sunga ngumune a ku bano bapeela tashiminanga.”—Mateo 18:10, 14.

Pangi na kinangu kya bibadi abiilwileena batumibwa bwa kuuka mukile bukata, Yesu bebalungwile shi: “Ikalayi bu mungwa mu’nwe banabene, nwikale mu butaale munkatshi mwenu.” (Maako 9:50) Mungwa awikashaa bidiibwa kalolo. Mungwa wa mu kinfwanyi awikashaa mayi aakula ungi apelepeele bwa kwiakumiina, na byabya bi kukwasha bwa kulama butaale bushii bulombene kufika mu kwilwileena.—Beena-Kolose 4:6.

Mu yaaya nsaa, kubadya kutuuka mwanda ukata, na Yesu bebalungwile byabyadya kwiupwa. Bambile shi: “Su mukwenu bakulwishisha, enda kwadi okamuleeshe kito kyaaye pa buupenka bwenu. Su bateemesha, opaasha mukwenu.” Kadi su akutwa kuteemesha? Yesu akula shi: “Ata muntu umune sunga babidi bw’ashi mwanda ooso upete kitshibilo n’eyi dya tumonyi tubidi sunga tusatu.” Su byabya tambipudishe mwanda, abitungu kwiulungula “kipwilo [kakongye],” kwiuleka mu maasa mwa bakulu be kwata kitshibilo. Kadi nkitshishi a bubi su tamwibapushishe? Yesu akula shi: “Mutale buu mwina kingi kisamba na buu mufutshishi a bitadi,” bantu bashibadi mu kipwano na beena Yuuda.—Mateo 18:15-17.

Abitungu bakulu mu kakongye balonde eyi dy’Efile Mukulu. Su bapeta muntu musoole mwanda, abitungu kumupa dinyoka na kitshibilo kyabo ‘akyanyibwa mpa na mwiyilu.’ Kadi su bapeta muntu shii musoole mwanda, kitshibilo kyabo “akyangulwa mwiyilu.” Ano mayi a kulonda e na bukwashi bukata kubanga kasha kakongye ka bwina Kidishitu keekala kwanka. Nsaa yabataluula yaaya myanda, Yesu bambile: “Peebungye babidi sunga basatu mwishina dyande, ami nee munkatshi mwabo.”—Mateo 18:18-20.